Read Kuranko Romu 16 Bible Online

Romu 16 - Kuranko bible

Romu 16

¹Ma na-kelen-nyɔgɔ-musi Fibi min bi wɔlila Kɛnkariya chɔchi la, n bi a matɔgɔla.

²Wo ni a rabira Mari tɔgɔ rɔ iko a bɛnnɛ wole, Allala mɔgɛnu ni a ma nya min. A makoe ye min bɛɛ la wo bolo, wo ni a dɛnbɛ wonu na bawo a ara nde dɛnbɛ anubɛ mɔgɔ siyaman.

³ N bi Pusila anubɛ Akuwila kɔndɔnna, mabɛ minnu bi wɔlila Kirasiti Yisa ye.

⁴Anu bara anu niyi fili nde ye. Mabɛ sibolo-gbɛrɛnuna chɔchi bɛɛ ye baraka birala anu ye.

⁵Chɔchi-mɔgɛ minnu si anu nadɛn anuna bɔn la, wonu fanan kɔndɔn n ye. Wo ni n diyana-mɔgɛ Ipinɛta kɔndɔn. Ale le fɔlɔn mara dɛnkɛninya-mɔgɛ la Kirasiti ye Esiya nyamanɛ rɔ.

⁶Mariyama fanan kɔndɔn min wɔlita wo ye bɛrɛkɛ!

⁷Andonaika anubɛ Yuniya kɔndɔn n ye. N Yahudiya-nyɔgɛ le wonu na minnu bi yele la n fɛ nun. Anu malɔnnɛ bɛrɛkɛ kilayɛnu tɛma, ado anu fɔlɔn dɛnkɛninyara nde ko.

⁸Ampilati kɔndɔn n ye. N diyana-mɔgɛ le ale la Marita diyanayɛ rɔ.

⁹Yurabanasi fanan kɔndɔn n ye ma wɔli-kɛ-nyɔgɛ le Kirasitila wɔlɛ rɔ. Wobɛ n diyana-mɔgɛ Sataki kɔndɔn.

¹⁰Apɛlɛsi fanan kɔndɔn minta lanaya-koe ara bɔ gbɛ rɔ Kirasiti ye. Aritobulula denbayɛ fanan kɔndɔn.

¹¹Hɛrodiyan fanan kɔndɔn. N Yahudiya-nyɔgɛ le. N na-kelen-nyɔgɔ dɛnkɛninya-mɔgɛnu kɔndɔn minnu bi Nasisala denbayɛ rɔ.

¹²Tarifina anubɛ Tarifosa kɔndɔn n ye minnu wɔlita Mari ye bɛrɛkɛ anubɛ n diyana-mɔgɛ Perasi. Ale fanan wɔlita Mari ye duk!

¹³ N bi Rufasi kɔndɔnna minta wɔlɛ da-rakolo Mari ye anubɛ a na min bara n tabira iko ala dan.

¹⁴Asinkariti kɔndɔn n ye anubɛ Filegan anubɛ Hemisi anubɛ Patirobasi anubɛ Hemasi anubɛ n na-kelen-nyɔgɔ dɛnkɛninya-mɔgɔ-toe bɛɛ minnu bi anu fɛ.

¹⁵Filologasi anubɛ Yuliya kɔndɔn anubɛ Nirusi anubɛ a na-kelen-nyɔgɔ-musi anubɛ Olimpa anubɛ Allala mɔgɛ min bɛɛ ye anu fɛ nyɔ.

¹⁶Wo ni wo nyɔgɔn kɔndɔn ka wo nyɔgɔ ramɔnsɔn[10] iko na-kelenmɛnu. Kirasitila chɔchi-mɔgɛ bɛɛ ye wo kɔndɔnna.

¹⁷N na-kelen-nyɔgɛnu, n bi wo madiyala ko wo ni a ma wo fɛrɛma mɔgɛ wonuna ko la minnu bi dan-nafarɛ kɛla wo tɛma. Wonu bi mɔgɛnu nasamala ka anu bɔ anuna dɛnkɛninyɛ rɔ. Wo ara karan-bɛrɛ min sɔrɔn, anu bi wo tinyana. Wo ni wo masɛgi mɔgɛ wonu na feu,

¹⁸ado minnu bi ko-sufa wonu mala, wonu sa wɔlila ma Mari Yisa, Allata-Mɔgɔ-Yabɔnɛ ye fɔ anu nyɛrɛ buyi. Anu bi mɔgɔ-magbalanɛnu yanfala anuna kuma teleka-telekɛnu anubɛ matɔgɔlɛ fɛ.

¹⁹Mɔgɛ bɛɛ ara wola lanaya-koe lamɔɛn kibara-nyimɛla ko la. Woletɔ n sewanɛ wola ko la. N bi a fɛ, wo ni ma hɛnkilimɛnu na ko-nyimɛ warala kɔnɔ wo ni ma mɔgɔ-magbalanɛnu na ko-yogomɛ warala.

²⁰Alla min bi yisi-kimɛ dila ma ma, wo ti mɛ Setanɛ kasarala wo kin kɔrɔ. Ma Mari Yisala hinɛ ni to wo fɛ.

²¹ N wɔli-kɛ-nyɔgɔn Timoti ye wo kɔndɔnna anubɛ n Yahudiya-nyɔgɛnu Lusiya anubɛ Yeson anubɛ Sosipata fanan.

²²Nde, Tatiyasi min bi kɛdi kɛ sɛbɛla Pɔli ye, n bi wo kɔndɔnna Mari tɔgɔ rɔ.

²³ N yiyalɛ, Keyasi, chɔchi si ladɛn minna bɔn la, a ye wo kɔndɔnna. Irasita min bi soe-wodi-lamarala anubɛ ma na-kelen-nyɔgɔn Kuwata, wonu fanan bi wo kɔndɔnna. [

²⁴Ma Mari Yisa, Allata-Mɔgɔ-Yabɔnɛta hinɛ ni to wo dama fɛ.]

²⁵Ma ni gbiliyɛ di Alla ma bawo ale le si ke ka wo lasɔ wola dɛnkɛninyɛ rɔ yiri iko Yisa, Allata-Mɔgɔ-Yabɔnɛ wota kibara-nyimɛ ye nya min, n bi min nakela wo ma, kɔni, ado tonyɛ kɛ dogonnɛ wo ma nun kebi fɔlɔ

²⁶kɔnɔ kaka, tonyɛ wo ara bɔ gbɛ rɔ nɛbinuna sɛbɛlɛnu tɔ. Sibole bɛɛ nara ke gbundi wo lɔnna Allala kumɛ fɛ, ado Alla ye nyɔ habadan! Woletɔ mɔgɛnu ni dɛnkɛninya a ma ka ala kumɛ bira.

²⁷Alla kelen pe min kelan ye hɛnkilimɛ la, alamɛ gbiliyɛ dira ale ma Yisa Kirasiti baraka rɔ habadan! Amina!