Read Kuranko Romu 4 Bible Online

Romu 4 - Kuranko bible

Romu 4

¹Ma si nfen fɔ ma benba Iburayimala ko la? A ya hɛnkili nyamintan sɔrɔn dɛnkɛninyɛ wara-koe rɔ?

²Ni ma benba Iburayima telenta Alla yala a nyɛrɛta kɛwɔlɛnu fɛ, nyɛrɛ-matɔgɔ-kunyɛ ye a bolo nun worɔ. Kɔnɔ a ti ke a nyɛrɛ matɔgɔla Alla yala mumɛ!

³ A sɛbɛnɛ Allala kitabu rɔ ko, “Iburayima dɛnkɛninyara Alla le ma. Nba, ata dɛnkɛninyɛla ko la, Alla ya a lɔn mɔgɔ-latelennɛ la.”

⁴Mɔgɛ min bara wɔlɛ kɛ, wo si a sarɛ sɔrɔn. Ale ti ala sarɛ wo yen iko di-ma-le. A si a yen iko a sarɛ.

⁵Mɔgɔ ti ke wɔli-wo-wɔli kɛla min si a ma, a ni telen Alla yala. Alla si mɔgɔ-yilikinɛnu ma fɛɛbɔnɛnu na bawo a si wonu natelen a nyɛrɛ ma anuta dɛnkɛninyɛ fɛ.

⁶Mansa Dawuda ya mɔgɛnu bara-koe fɔ minnu telenta Alla yala hali anu ma wɔli-nyima kɛ. A ko mɔgɔ-sewanɛ le wo mɔgɛnu na.

⁷ A sɛbɛnɛ Mansa Dawuda bolo ko, “Mɔgɔ-sewanɛ le wo tigi la, minna hakɛ ma ara koto, ado Alla ara anuna hakɛ yamatogon!

⁸Mɔgɔ-sewanɛ le wo tigi la, Mari ma hakɛ yen min ma!”

⁹Mansa Dawuda ya sewɛ minna ko fɔ, wo ye Yahudiyanu denu dɔrɔn ye, ka, minnu kemininyara? Wo ma de, hali kemininyabɛlɛnu, ado ma ara a fɔ nun ko Iburayimata dɛnkɛninyɛla ko la, Alla ya a yatɛ mɔgɔ-latelennɛ la.

¹⁰Iburayima telenta Alla yala tumɛ nyamintan? A mara yanni a ni kemininya, ka, ala kemininyɛ kɔma? Yanni a ni kemininya, a telenta Alla yala.

¹¹ Iburayima telenta Alla yala ka a tɛgɛ ata dɛnkɛninyɛ ma. Wo kɔma, a kemininyara alako ala kemininyɛ ni ma koe kɛnu tamasere la. Woletɔ minnu bara dɛnkɛninya Alla ma, Iburayima mara wonu bɛɛsi benba la. Alla ara wonu lɔn mɔgɔ-latelennɛ la, hali anu kemininyabɛlɛ.

¹²Minnu kemininyanɛ, wonu fanan benba le ale Iburayima la kɔnɔ ka a tɛgɛ anuna kemininyɛ, wo ma. Iburayima mara anu benba la bawo yanni a ni keminiya tumɛ min, a ye dɛnkɛninyɛ min tɔ nun, anu denu fanan taranta dɛnkɛninya kelan wo rɔ.

¹³ Alla ya lanyiri kiri Iburayima anubɛ a bɔnsɔn ye ko duninya si ma anutɛ la. Ka a fɔ ko a ya lanyiri kɛ kiri bawo Iburayima ya Allata tɔn-kitabu bira, wo ma. Kɔnɔ a kirita ala dɛnkɛninyɛla ko la. Woletɔ Alla ya a lɔn mɔgɔ-latelennɛ la,

¹⁴ ado Alla ya lanyiri min kiri, ni wo kirita tɔn-biralɛnu denu dɔrɔn ye, mɔgɔla dɛnkɛninyɛ ara ma fuyi la worɔ. Allala lanyiri fanan ma ko nyinya.

¹⁵Nɛbi Musata tɔn-kitabu wara-koe ara a ma, Allala diminyɛ ara yigi ma kan ma. Kɔnɔ Allata tɔn-kitabu sa kan min, tɔn-tinyɛ sa nyɔ hali!

¹⁶ Alla ya lanyiri min kiri, mɔgɛ si wo tɔnɛ sɔrɔn dɛnkɛninyɛ fɛ. Wo mara le alako lanyiri wo ni ma di-ma-le la. Lanyiri wo kirita Iburayima anubɛ a bɔnsɔnnu ye kɔnɔ a sa tɔn-biralɛnu dɔrɔn ye. Minnu bara dɛnkɛninya Alla ma iko Iburayima ya a ma nya min, a ye wonu fanan ye, ado ma dama benba le Iburayima la dɛnkɛninyɛ fɛ.

¹⁷ Iko a sɛbɛnɛ Allala kitabu rɔ nya min, Alla ya a fɔ Iburayima ye ko, “N bara i ma sibolo-siyaman benba la,” ado lanyiri wo kanbalita bawo Iburayima dɛnkɛninyara Alla ma. A lanɛ a la ko Alla si furinu nawuli, ado Allata kumɛ si a ma, fan minnu sa nyɔ nun, wonu ni taran nyɔ.

¹⁸ Yigi-wo-yigi sa Iburayima ma wati min den-sɔrɔn-koe rɔ, a dɛnkɛninyara, ado a ya a yigi sa Allata lanyiri-kirinɛ kuma. Woletɔ a mara “sibolo-siyaman benba la.” Iko a sɛbɛnɛ Allala kitabu rɔ nya min, a ko, “I kegeyɛ si siyaya iko lolenu.”

¹⁹ Hali Iburayima ya a lɔn ko a siyi ma ara dɔgɔya, ala dɛnkɛninyɛ ma dɔgɔya. A tora doni, a sɔrɔn ni san kɛmɛ bɔ, ado ala musi Sira ma den sɔrɔn bɛ.

²⁰A ma ala dɛnkɛninyɛ boloka. Ka a tɛgɛ lanyiri wo ma, a ma sika Alla rɔ. Ala dɛnkɛninyɛ ya a sɛnbɛ kuma sa, woletɔ a ya Alla tanto,

²¹ado a lara a la serr, ko Alla ara lanyiri min kiri a ye, a si wo lakanbali.

²²Woletɔ Iburayimata dɛnkɛninyɛ ya a ma, Alla ya a “yatɛ mɔgɔ-latelennɛ la.”

²³Kumɛ wonu sɛbɛni ma Iburayima dɔrɔnna ko la.

²⁴Anu sɛbɛnɛ male fananna ko la. Alla ya male yatɛ mɔgɔ-latelennɛnu na bawo ma ara dɛnkɛninya Alla ma, min ya ma Mari Yisa lawuli ka a bɔ furinu tɛma, kɔni.

²⁵ Yisa fagara alako ma hakɛnu ma ni koto. A wulita alako ma la ni telen Alla ye.