Read Kuranko 1 Kɔrɛnti 10 Bible Online

1 Kɔrɛnti 10 - Kuranko bible

1 Kɔrɛnti 10

¹ N na-kelen-nyɔgɛnu, ma benba minnu bilara Musa fɛ, n bi a fɛ, wo ni wo yili to wonu ko. Banda-fin-gbɛ le ya anu yamatogon ha anu dama kɛndɛ tenbira Kɔgɔ-Yi-Wulan rɔ.

²Banda-fin-gbɛ min bi anu kun na anubɛ anu ya yi min tɛgɛ, wo ya a ma iko anu batasinɛ le, ado anu mara Nɛbi Musa gba-fɛ-bilalɛnu na batasilɛ wo fɛ.

³ Anu dama ya dɔn-fen kelan wo dɔn min bɔra Alla bolo.

⁴ Anu dama ya yi kelan min, Alla ya min nabɔ farɛ rɔ, ado Kirasiti nyɛrɛ le farɛ wo la min bilara anu fɛ.

⁵ Kɔnɔ hali wo, Alla diminyara anu siyaman ma. Woletɔ anu furinu bolokanɛ tora wula-da-rakolɔn rɔ.

⁶ Nba, misalɛ le wo bɛɛ la male ye ka ma lalɔn ko ma kana mala natanu sa ko-yogomɛnu kuma iko wonu ya a ma nya min.

⁷ Ma kana bɛsɛnu kɔ iko wonu denu ya a ma nya min, ado a sɛbɛnɛ Allata kitabu rɔ ko, “Anu ya anu de-nyini ka anu min. Wo kɔma, anu wulita Alla-lɔnbɛlɛnuna dɔn-kɛ-nya bila.”

⁸ Ma kana yɛlɛnyɛ kɛ wona iko wo do ya a ma nya min, ha anu mɔgɔ waga mogan-ni-sawa (23,000) fagara tele kelen kɔrɔ.

⁹ Ma kana Mari kɔrɔbɔ wona iko wo do ya a ma nya min, ha duguma-fannu ya anu faga.

¹⁰ Ma kana kɔrɔtɔ iko wo donu ya a ma nya min, ha niyi-bɔ-melika ya anu kasara.

¹¹Koe kɛ bɛɛ mara anu na alako a ni ma misalɛ la mɔgɛ doinu ye. Koe kɛnu sɛbɛra ma ye alako ka ma lalɔn bawo male ye wati-laban tɔ.

¹²Woletɔ ni min bi a mirila ko a sɔnɛ gben, wo ni a ma a fɛrɛma alako a kana na bu boloko-yogomɛ-kɛ.

¹³Kɔrɔbɔlɛ wa kɛ wo ma tumɛ min, wo ni wo yili to kɛ ko ko kɔrɔbɔlɔ-su wo duruta kɛla mɔgɔ-gbɛrɛnu fanan na. Alla ti nyina ala lanyiri-kirinɛ ko. A ti sɔn kɔrɔbɔlɛ su-wo-su ni ke wo ma, wo ti min nɔ. Kɔnɔ kɔrɔbɔlɛ wa kɛ wo ma tumɛ min, a si kilɛ yira wo la alako wo si a nɔ nya min.

¹⁴Woletɔ n diyana-mɔgɛnu, wo ni wo matanka bɛsi-kɔ-koenu ma.

¹⁵N bi kumala wole ye iko mɔgɔ si kuma hɛnkilimɛnu ye nya min. N bi min fɔ tinɛ, wole nyɛrɛ ni wo kɔrɔbɔ ni tonyɛ le, ka, ni tonya ma.

¹⁶ Ma tenbi Marita kima dɔnna chɔchi la, ma si baraka bira Alla ye. Ma wa ma min yi-lafɛ wo la tumɛ min, ma ye ta-nyɔgɔnyɛ le kɛla Kirasiti yele le tɔ wo la. Ma si biredi min takeri fanan, ma wa biredi wo dɔn tumɛ min, ma ye ta-nyɔgɔnyɛ kɛla Kirasiti fɛrɛ-bɔnkɛ le tɔ wo la.

¹⁷Hali ma siyayanɛ, ma bɛɛ ara ma bagbu kelen na bawo ma damasi ara biredi-gbu kelen dɔn.

¹⁸ Wo ni wo miri Isirɛla mɔgɛnu ma. Minnu bɛɛsi ye saraka-sogenu dɔnna, anu bɛɛsi yisi sanɛ anu nyɔgɔntɛ kuma saraka-dɔn wo fɛ.

¹⁹N bi nfen ma kɛ la? Mɔgɛnu bi bɛsɛ min kɔla wo, anu bi a kɔla dɔn-fan min na wo, fen-kolomɛ le wonu na, wa?

²⁰ Ade! N bi min fɔ tinɛ, wo le ko anu bi sarakɛ min bɔla wo la, anu sa wo bɔla Alla ye fɔ nyinɛnu, ado n sa a fɛ, wo ni ta-nyɔgɔnyɛ kɛ nyinɛ wonu fɛ.

²¹A ti bɛn wo ni wo min Marita yi-lafɛ la, wo ni ta wo min nyinɛnuta yi-lafɛ la fanan. Wo kana fen-dɔn-kɛ Marita tebulu la, wo wa ban, wo ni ta fen dɔn nyinɛnuta tebulu fanan na.

²² Ka, a di ma ye, keliyɛ ni don Mari rɔ, wa? Ma miriya ko ma sɛnbɛ kolo atɛ ko woletɔ a ti ma tɔrɔ, wa?

²³ Anu bi a fɔla ko, “Male ye nyinina min ma, tɔn sa ma kuma wo ma tinɛ.” Tonyɛ le kɔnɔ koe bɛɛ ti ma munanfaga. Nde bɛrɛn si a fɔ ko, “N bi nyinina min ma, tɔn sa n kuma wonuna ko la.” Tonyɛ le kɔnɔ koe bɛɛ ti ma lata ya rɔ.

²⁴Mɔgɔ ti to i nyɛrɛ makoe nyinyala dɛɛ kɔnɔ a fisa, i ni mɔgɔ-gbɛrɛnu dɛnbɛ ka wonu fanan makoe nyinya.

²⁵Anu bi soge min bɛɛ mayirala feri-kɛ-tinɛ, wo ni wonu dɔn fasai! Hali wo ma nyinikali kɛ wo sɔndɔmɛla ko la,

²⁶ ado iko a sɛbɛnɛ Allata kitabu rɔ nya min ko, “Duninya anubɛ fan min bɛɛsi ye a rɔ, Maritɛ le wo bɛɛ la.”

²⁷Ni dɛnkɛninyabɛlɛ do ya wo kele fen dɔn tinɛ, i wa ta, ni a ya min sigi wo kɔrɔ, wo ni wo dɔn. Wo kana nyinikali kɛ wo sɔndɔmɛla ko la.

²⁸Kɔnɔ ni mɔgɛ do ya a fɔ wo ye ko, “Dɔn-fan kɛ dinɛ bɛsɛnu denu ma kɔɔ,” wo kana dɔn-fan wo dɔn ka a tɛgɛ mɔgɛ wo sɔndɔmɛla ko ma.

²⁹Ka a fɔ ko wo kana a dɔn wo nyɛrɛ sɔndɔmɛla ko la, wo ma de, fɔ ale min ya wo fɔ wo ye. Nba, mɔgɛ do si nyinikalɛ sa ko, “Ni mɔgɔ sɔndɔmɛ ya a tɔrɔ, wo si a ma, n bi nyinina min ma, n ti wo ma, wa? N ma hɔrɔya ka n diyana-koenu ma, wa?

³⁰Ni n ya baraka bira Alla ye nna dɔn-fanla ko la, nfenna worɔ, mɔgɛ si a fɔ ko n bara ko-yogomɛ le ma?”

³¹Woletɔ ni wo ye fen dɔnna, ni wo ye wo minna, ni wo ye ko-wo-ko kɛla, wo ni wo bɛɛ kɛ alako Alla ni gbiliyɛ sɔrɔn wo bɛɛ rɔ.

³²Wo kana ma tɔrɔya-sebu la Yahudiyanu anubɛ sibolo-gbɛrɛnu ye, wo ta-nyɔgɛ dɛnkɛninya-mɔgɛnu, kɔni.

³³Wo ni a ma wo fɛrɛma iko nde ye a mala nya min. N bi n tayala ka mɔgɛ bɛɛ hɛnɛ koe bɛɛ rɔ. N sa n mirila ko-nyimɛ ma n nyɛrɛ ye dɔrɔn fɔ mɔgɛ bɛɛ ye alako anu denu ni kisi.