Read Kuranko 1 Kɔrɛnti 11 Bible Online

1 Kɔrɛnti 11 - Kuranko bible

1 Kɔrɛnti 11

¹ Nba, wo ni wo sanka nde ma iko nde ye n sankala Kirasiti ma nya min.

²N si wo tanto bawo wo ye wo hɛnkili tola n ko tuma-wo-tuma ka koe wonu bira n ya wo karan minnu na.

³Kɔnɔ n bi a fɛ, wo ni a lɔn ko Kirasiti ye kei bɛɛ kun na. Kei le ala musi kun na. Kɔnɔ Alla le ye Kirasiti fanan kun na.

⁴Woletɔ kei tenbi Alla matarala, ni wo ma, ka wɔlɔyiya-kumɛ fɔ nyama tɛma, ni a kunyɛ yamatogonnɛ, a ye ala kun-tigi Kirasiti le lafɛyala wo la.

⁵Kɔnɔ musi min bi Alla matarala, ni wo ma, ka wɔlɔyiya-kumɛ fɔ nyama tɛma, ni a kunyɛ yamatogonni ma, a ye ala kun-tigi le lafɛyala, ala kei, kɔni. Dan-nafara mumɛ sa ale anubɛ musu-kun-gbananɛ[2] tɛma a lamiliya-koe la.

⁶Ni musi sa a fɛ ka a kunyɛ yamatogon, a fisa, a ni a kun-sigi matɛgɛ. Kɔnɔ ni musi kunyɛ siinɛ, ni wo ma, a matɛgɛnɛ, miliya-koe le wo la ale ye. A fisa, a ni a kunyɛ yamatogon.

⁷ Hali kei ma a kunyɛ yamatogon bawo Allala muninyɛ anubɛ Allala gbiliyɛ le ale la. Kɔnɔ musi le ye ala keila gbiliyɛ labɔla gbɛ rɔ.

⁸ N bi wo fɔla bawo Alla ma kei dan ka bɔ musi rɔ kɔnɔ musi le bɔra kei rɔ.

⁹Alla ma kei ladan musila ko la kɔnɔ musi le ladanta keila ko la.

¹⁰Nba, ka a tɛgɛ wo ma, musi ni a kunyɛ yamatogon ka a yira ko a ye ala keila sɛnbɛ kɔrɔ, ado wo si melikanu fanan wasa minnu bi ma kumafɛlɛnna.

¹¹Kɔnɔ hali wo, ma tenbi wɔlila Mari ye, kei ni musi sɔrɔn a dɛnbɛn-koe la, musi fanan ni kei sɔrɔn a dɛnbɛn-koe la,

¹²ado iko musu fɔlɔtɛ bɔra kei rɔ nya min, kei fanan sɔrɔnta musi bolo wo nya na le. Nba Alla le ya fan bɛɛ dan.

¹³A bɛnnɛ ko musi ni Alla matara nyama tɛma a kunyɛ yamatogonni ma, wa? Wo nyɛrɛ ni kiti wo tɛgɛ,

¹⁴ado Alla ya mɔgɛ dan nya min, wo nyɛrɛ ye wo karanna ko ni kei kun-sigi siya, miliya-koe le wo la ale ye.

¹⁵Kɔnɔ musila gbiliyɛ le a kun-sigi la bawo Alla ya kun-sigi-yanmɛ di a ma a kunyɛ-yamatogon-koe la.

¹⁶Kɔnɔ ni mɔgɔ-wo-mɔgɔ ye a fɛ ka sɔsɔli sa kɛla ko la, n si kɛ le dɔrɔn fɔ wola ko la. Male wo, Allata chɔchi doinu wo, namu-wo-namu sa batoli-kɛ-tinɛ ma tɛma kɛ kɔma.

¹⁷Hali wo, n bi koe min fɔla wo ye kɛ la, n sa wo matɔgɔla wo rɔ. Wola chɔchi-ladɛnnu sa ko-rabɛn-kɛla fɔ ka tinyalɛ kɛ.

¹⁸A fɔlɔtɛ, mɔgɛnu bara a fɔ n ye ko wo wa wo ladɛn tumɛ min, dan-nafarɛ ye wo nyɔgɔn tɛma, ado n lanɛ a la ko tonyɛ ye wo donu tɔ,

¹⁹ado a fɛrɛ sa fɔ wo ni taran kan kelen tɔ alako minnu bi ko-latelennɛ kɛla Alla ye, wonu ni gbɛ wo tɛma.

²⁰Wo wa wo ladɛn tumɛ min, wo sa nala Marita kimanɛ dɔn tinɛ fɔ wo nyɛrɛta ladiyɛ.

²¹Wo tenbi fen dɔnla, mɔgɔ kelen-kelennamɛ-bɛɛ ye fen dɔnna iko a di a ye nya min. Anu ti doinu makɔni, woletɔ do kɔnkɔtoe tenbi, do kun tafinnɛ gbɛɛ-minyɛ bolo.

²²Bon sa wo bolo wo si fen-dɔn kɛ kan min ka wo min, wa? Ka, a di wo ye, Allala chɔchi la ni fɛya ka bolo-kolɔnnu namiliya, wa? Wo miriya ye kama? N si nfen fɔ wola ko la? N ni wo matɔgɔ, wa? Ade, n ti wo matɔgɔ mumɛ!

²³Mari ya n karan min na, n ya wo le latenbi wo ma. N ko anu ya Mari Yisa don a yogenu bolo suyi min tɔ, a ya biredi bi

²⁴ka baraka bira Alla ye. A ban a rakerila, a ko, “N fɛrɛ-bɔnkɛ le kɛ la min bi wola ko la. Wo ni kɛ dɔn alako wo yili ni to n ko nya min.”

²⁵ Anu ban biredi wo dɔnna, Yisa ya yi-lafɛ fanan bi wo nya. A ko, “Allatalata sarama-kan-kurɛ min kirinɛ n yelela ko la, wo le kɛ la. Wo ni kɛ min alako wo ni to wo mirila n ma nya min.”

²⁶Wo tenbi biredi kɛ dɔnna ka wo min tuma-wo-tuma, wo si wo miri Marita saya-koe ma ka to a fɔla ha a ni na tumɛ min,

²⁷ado ni mɔgɔ-wo-mɔgɔ ma Marita biredi dɔn ka a min Marita yi-lafɛ la a kilɛ fɛ, wo tigi ara kiti lana a nyɛrɛ kuma. A ara yilikiyi sɔrɔn bawo a ma Mari fɛrɛ-bɔnkɛ anubɛ a yele gbiliya.

²⁸Woletɔ yanni wo ni Marita biredi dɔn ka wo min Marita yi-lafɛ la, wo kelen-kelennamɛ-bɛɛ ni wo nyɛrɛ lakɔrɔsi ka wo nyɛrɛ fɛsɛfɛsɛ.

²⁹Ni min ya biredi kɛ dɔn ka a min yi-lafɛ kɛ la, a ma a miri Mari fɛrɛ-bɔnkɛ ara min ma a ye, a tenbi a dɔnna ka a min, a si kiti lana a nyɛrɛ kuma.

³⁰Ka a tɛgɛ wo ma, wo siyaman rafaganɛ, wo kirɛ, ado donu bara faga wo rɔ!

³¹Kɔnɔ ni ma ya ma nyɛrɛ lakɔrɔsi fɔlɔn a kilɛ fɛ, Alla ti ma kiti.

³²Mari ye ma kitila ka ma tɔrɔ kaka alako mabɛ dɛnkɛninyabɛlɛnu kana halaki ma nyɔgɔn fɛ kiti-tɛgɛ-lunyɛ.

³³Woletɔ n na-kelen-nyɔgɛnu, wo wa wo ladɛn Marila kima-dɔn-koe rɔ tumɛ min, wo ni wo nyɔgɔn makɔni.

³⁴Wo wa wo ladɛn fen dɔn tinɛ tumɛ min, yanni wo ni kiti sɔrɔn Alla bolo, ni kɔnkɛ ye wole do la, a bɛnnɛ wo tigi ni fen-dɔn-kɛ ala bɔn la. N ba na kɛ kɔma tumɛ min, wo ya n manyinika minnu na wola kɛdi rɔ, n si wonu natelen.