Read Kuranko 1 Kɔrɛnti 13 Bible Online

1 Kɔrɛnti 13 - Kuranko bible

1 Kɔrɛnti 13

¹Hali n kumara kan-su-bɛɛ rɔ minnu bi san-kole rɔ anubɛ dugu-kole kɛ kuma kɔnɔ ni keninteya sa n yisi rɔ, n bara ma iko nɛgɛ-walan, ni wo ma, tɛlɛn-gbesi-kan.

² Hali kawandili-bɔ-sɛnbɛ dira n ma ka lɔnnɛ bɛɛ sɔrɔn ka gbundu-koe bɛɛ lɔn, ni wo ma, dɛnkɛninyɛ ni wara n bolo ha ka kɔnkɛnu bɔ anu gbɛ rɔ, ni keninteya sa n yisi rɔ, fenfen ma n na.

³Ni n ya n bolo-fan bɛɛ ni, ni n ya n bagbuyi ni alako n ni n nyɛrɛ matɔgɔ,[3] ni keninteya sa n yisi rɔ, wo ti ko-wo-ko nyinya n ma.

⁴Keninteyɛ si a munyu-bɛrɛkɛ. A fanɛ nyimayɛ la. A ti keliyɛ kɛ. A ti a nyɛrɛ kɔrɔbi. A ti wasi.

⁵Keninteyɛ ti kolobɛlitayɛ kɛ. A ti hɛrɛ nyini a nyɛrɛ ye. A yisi ti bɔ. Ni mɔgɔ bagara a ma, a ti wo lamara a yisi rɔ.

⁶Keninteyɛ ti sewa ko-yogomɛ la kɔnɔ a si sewa tonyɛ la.

⁷Keninteyɛ ti kuri tɔrɔyɛ kɔrɔ mumɛ! A ti ala dɛnkɛninyɛ boloka, ado yisi-latɛgɛ ye a bolo duk! Ko-wo-ko wa ma a la, a si a munyu ha!

⁸Keninteyɛ ti ban mumɛ! Wɔlɔyiya-kuma-fɔɛnu bi nyɔ kɔnɔ wonu fanan ti mɛ. Kan-gbɛrɛ-fɔɛnu bi nyɔ kɔnɔ wonu si to-a-rɔ. Lɔnnɛ ye nyɔ kɔnɔ wo bɛrɛn si tenbi.

⁹Lɔnnɛ wo, wɔlɔyiya-kumɛ wo, mala fandɛ wo bɛɛ ma kanbali wɛ.

¹⁰Kɔnɔ min kanbalinɛ, wo wa na tumɛ min, fanda-kanbalibɛlɛ kɛnu si tunu yen!

¹¹N bi denniyɛ rɔ tumɛ min, n bi kumala le iko dennɛ, n bi n mirila iko dennɛ, n bi lakɔrɔsilɛ kɛla iko dennɛ. Kɔnɔ n ya hɛnkili sɔrɔn tumɛ min, nna ko sa denniya-koe wo fenfen tɔ tun.

¹²Ma ye fan min yenna kaka, wo mani de iko fenna muninyɛ min ti yen nyɛrɛ-mafɛlan rɔ a kilɛ fɛ. Kɔnɔ wo wati wa na tumɛ min, ma si fan bɛɛ ragbɛ wass! N ma Alla wara-koe bɛɛ lɔn kaka kɔnɔ n si na Alla lɔn iko Alla ya nde lɔn nya min.

¹³Nba, kɛ sawɛ le tonɛ, dɛnkɛninyɛ wo, yigi wo, anubɛ keninteyɛ kɔnɔ keninteyɛ le kolo kɛ bɛɛ ko.