Read Kuranko 1 Kɔrɛnti 14 Bible Online

1 Kɔrɛnti 14 - Kuranko bible

1 Kɔrɛnti 14

¹Nba, wo ni wo raya keninteyɛ ma worɔ. Wo ni wo niyi sa Allata Ni-Sɛnimɛta fandɛnu kuma katarala fandɛ wo ma min si a ma, wo ni Allala kumɛ fɔ a kila-bɛrɛ fɛ.

²Min bi kan-gbɛrɛ fɔla, wo sa kumala mɔgɔ ye fɔ Alla bawo mɔgɔ sa a kan lamɔɛnna. A ye gbundu-koenu denu fɔla Allata Ni-Sɛnimɛ baraka la wo la.

³Kɔnɔ min bi Allala kumɛ fɔla, wo ye kumala mɔgɛnu denu ye. Kumɛ wo si mɔgɛnu dɛnbɛ ka anu sɛnbɛ don anubɛ ka anu yisi kimɛ.

⁴Min bi kan-gbɛrɛ fɔla, wo ye a nyɛrɛ le dɔrɔn dɛnbɛna kɔnɔ min bi Allala kumɛ fɔla, wo ye chɔchi bɛɛ le dɛnbɛna.

⁵Ni wo dama si ke kan-gbɛrɛ fɔla, wo si a diya don n tɔ. Kɔnɔ min di n ye wo ko, wo le, ko wo dama ni Allala-kuma-fɔ-fandɛ sɔrɔn, ado Allala-kuma-fɔɛ tenbira kan-gbɛrɛ-fɔɛ la. Kɔnɔ ni mɔgɔ do taranta nyɔ min si a kan latenbi alako chɔchi-mɔgɛ bɛɛ ni dɛnbɛnɛ sɔrɔn wo fɛ, nba, wo fisa.

⁶N na-kelen-nyɔgɛnu, ni n nara wo wara ka kuma kan-gbɛrɛ rɔ, wo si nfen nyinya wo ma? Ni n ma koe do lankɛnɛmaya wo ye ka bɔ Alla bolo, ni n ma lɔnnɛ do di wo ma, ni n ma wɔlɔyiya-kumɛ fɔ wo ye, ni n ma karan do di wo ma, n ti ko-wo-ko nyinya wo ma.

⁷Hali fɔli-fan minnu nadannɛ mɔgɛnu bolo iko fuli anubɛ bɔlɔn, wonu bi sigi min sala, mɔgɛ si sigi wo lɔn kama, ni sigi wo yabasannɛ?

⁸Ado nfan, min bi kɛlɛ-buri fɛla, ni wo ma a fɛ a kilɛ fɛ, yon si a rabɛn kɛlɛ-kɛ-koe la?

⁹A ye wo nya na le. Wo ye min fɔla, mɔgɛ si wo nya-yen kama, ni wo ye a fɔla kan-gbɛrɛnu tɔ? Wo manɛ kuma-fuyi le la!

¹⁰Kan-siyaman bi duninya rɔ kɔnɔ hali wo, kelen sa min kɔrɔ sa a la.

¹¹Kɔnɔ ni n sa kan wo lamɔɛnna, kan wo fɔlɛ si ma iko mɔgɔ-gbɛrɛ nde yala. Nde si ma iko mɔgɔ-gbɛrɛ, mɔgɛ wo fanan yala.

¹²Nba, wole fanan bi wo nya na le. Wo hɔnnɛ Allata Ni-Sɛnimɛta fandɛ fanan na min kɛ, a fisa, wo ni wo raya ka wonu sɔrɔn min si chɔchi dɛnbɛ.

¹³Min bi kan-gbɛrɛ fɔla, wo ni Alla matara ko a ni sɛnbɛ sɔrɔn ka anu kɔrɛ fɔ mɔgɛnu ye,

¹⁴ado ni n ya Alla matara kan-gbɛrɛ rɔ, n sɔndɔmɛ ye tarali kɛla kɔnɔ n miriya ma wo la.

¹⁵N ni nfen ma worɔ? N si Alla madiya n sɔndɔmɛ la kɔnɔ n si Alla madiya fanan n miriya la. N si bɛti bɔ n sɔndɔmɛ la, wo kɔma, n si bɛti bɔ fanan n miriya la.

¹⁶I wa baraka bira Alla ye i sɔndɔmɛ la ladɛn kuma, minnu ma kan wo lɔn, wonu si a fɔ kama ko, “Amina?” I ye min fɔla, anu ma wo lɔn.

¹⁷Hali ila baraka-birɛ kin nya bɛɛ ma Alla yala, mɔgɔ-gbɛrɛ ti dɛnbɛnɛ sɔrɔn wo rɔ hali!

¹⁸N bi baraka birala Alla ye ko nde ye kan-gbɛrɛ fɔla ka tenbi wo dama la.

¹⁹Kɔnɔ n tenbi Alla batola chɔchi la, yanni n ni kuma waga-yirika-siyaman fɔ kan-gbɛrɛ rɔ, a fisa, n ni kuma loli pe fɔ mɔgɛnu si min nya-yen ka donu karan wo la.

²⁰N na-kelen-nyɔgɛnu, wo kana ma iko dennɛnu wo miriyanu tɔ. Wo ni ma den-pulan la ko-yogomɛ kɛ-koe rɔ kɔnɔ wo ni ma kinanu na wo miriyanu tɔ.

²¹ A sɛbɛnɛ Allala kitabu rɔ ko, “Mari ko a si kuma ata mɔgɛnu ye. A si mɔgɛ donu nana wo karan tinɛ kan-yabasannɛ la. A ko wo ma mɔgɛ minta kan lamɔɛn, wonu si ata kumɛ fɔ wo ye kɔnɔ hali wo, a ko ata mɔgɛnu ti anu tole masɔ wo kan la.”

²²Woletɔ kan-gbɛrɛ-fɔɛ ye dɛnkɛninyabɛlɛnuna ko la, dɛnkɛninya-mɔgɛnu ma de! Kɔnɔ Allala-kuma-fɔɛ ye dɛnkɛninya-mɔgɛnuna ko la, dɛnkɛninyabɛlɛnu ma de!

²³Nba, ni wole kan-gbɛrɛ-fɔlɛnu nadɛnta wo nyɔgɔn fɛ chɔchi burɔ ka kan-gbɛrɛ-fɔɛ dabira, mɔgɔ-kurɛ wa taran wo tɛma, ni wo ma, dɛnkɛninyabɛlɛ, a si a fɔ worɔ ko wo dama ara yuwaya.

²⁴Kɔnɔ ni wo dama ya Allala kumɛ fɔ, mɔgɔ-kurɛ wa taran wo tɛma nyɔ, ni wo ma, dɛnkɛninyabɛlɛ, a si min namɔɛn, wo si a ma, a ni a hakɛ lɔn ka a nyɛrɛ yiliki.

²⁵A si a sɔ ala ko-dogonnɛnu na. Wo kɔma, a si a nyɛnkin ka Alla bato ka a sɔ a la ko, “Tonyɛ le, Alla ye wo tɛma yan!”

²⁶N na-kelen-nyɔgɛnu, n bi nfen ma kɛ la? Wo wa wo ladɛn Alla bato tinɛ, a fɛrɛ sa fɔ koe bɛɛ ni ma chɔchi-dɛnbɛn-koe la. Bɛti do ye mɔgɔ kelen bolo, mɔgɛ do ye karan kɛla, dogbɛrɛ ye ko-rayirɛ kɛla ka bɔ Alla bolo, dogbɛrɛ ye kumala kan-gbɛrɛ rɔ, mɔgɔ-gbɛrɛ ye a kan latenbila ka a kɔrɛ fɔ.

²⁷Ni mɔgɛ do ye kumala kan-gbɛrɛ rɔ, mɔgɔ fila, ni wo ma, sawa dɔrɔn ni kuma. Wonu ni kuma kelen-kelenyɛ ma, ado fɔ mɔgɔ-gbɛrɛkɛ ni wo latenbi.

²⁸Ni mɔgɔ sa nyɔ min bi a latenbila, mɔgɔ kana kuma ladɛn wo rɔ. A ni kuma a nyɛrɛ yisi anubɛ Alla ye dɔrɔn.

²⁹Mɔgɔ fila, ni wo ma, sawa minnu bi Allala kumɛ fɔla, wonu ni kuma kɔnɔ anu tenbi kumala, a toenu ni wo lakɔrɔsi.

³⁰Kɔnɔ ni mɔgɛ do siginɛ ladɛn wo rɔ, Alla wa kumɛ do fɔ a ye, min bi kumala wo wati rɔ, wo ni a made fɔlɔn.

³¹Wo dama ni Allala kumɛ fɔ kelen-kelenyɛ ma. Wo le si a ma, wo dama ni karan, ado wo sɛnbɛ si koloya.

³²Allala-kuma-fɔɛ dinɛ minnu ma, wonu ni anu nyɛrɛ bira

³³bawo Alla sa nyinina ko-yabasan ma, fɔ yisi-kimɛ. Allala mɔgɛ bɛɛ wa anu nadɛn chɔchi la,

³⁴musinu ni anu made chɔchi ladɛn rɔ. A ma bɛn anu ni kuma. Iko a sɛbɛnɛ Nɛbi Musala tɔn rɔ nya min, anu kana kun-tigiyɛ kɛ keinu kuma.

³⁵Ni anu bi a fɛ ka ko-wo-ko lɔn, anu ni anuna keinu manyinika bɔn la. Musi wa kuma chɔchi ladɛn rɔ, a si a nyɛrɛ lamiliya wo la.

³⁶Allala kibara-nyimɛ da ma bira wole Kɔrɛnti kɛnu barɛ, ado a ma na wole dɔrɔn ma.

³⁷Ni mɔgɔ-wo-mɔgɔ ye a mirila ko Allala kilayɛ le ale la, ado ni min ko Allata Ni-Sɛnimɛta fandɛ ye a bolo, ale nyɛrɛ ni a lɔn ko n bi min sɛbɛla wo ma, Marita tɔn le wo la.

³⁸Kɔnɔ ni a ma a tole masɔ nna kumɛ kɛ la, wo fanan kana wo tole masɔ a la.

³⁹Woletɔ n na-kelen-nyɔgɛnu, Allala-kuma-fɔ-sɔgɛ ni wo bira kɔnɔ wo kana tɔn sigi kan-gbɛrɛ-fɔɛ la.

⁴⁰Koe bɛɛ ni kɛ a kin na anubɛ a kilɛ fɛ.