Read Kuranko 1 Kɔrɛnti 3 Bible Online

1 Kɔrɛnti 3 - Kuranko bible

1 Kɔrɛnti 3

¹N na-kelen-nyɔgɛnu, n ma ke kumala wo ye iko n si kuma wonu ye minnu bi Allata Ni-Sɛnimɛ kɔrɔ nya min. Fɔ n ni kuma wo ye iko mɔgɛ min bilanɛ duninya kɛ fɛ anubɛ den-pulannu dɛnkɛninyɛ rɔ.

² N ya kin-yi di wo ma bawo wo ma ke bɛ dɔn-fen-bɛrɛ-dɔn ma nun. Hali kaka, wo ti ke a dɔnna

³bawo wo miriya anubɛ duninya-mɔgɛnutɛ, kelen de! Ha ka, keliyɛ anubɛ sɔsɔlɛ ye wo nyɔgɔn tɛma. Wonu denu si a yira ma la ko wo ye ko-ladanna iko dɛnkɛninyabɛlɛnu bi a mala nya min.

⁴ Do wa a fɔ ko, “Nde ye Pɔli le fɛ,” do ko, “Nde ye Apalasi le fɛ,” wo wa wo ma, wo sa ko-ladanna worɔ iko duninya-mɔgɛnu, wa?

⁵Nfen bi a mala, mabɛ Apalasi kolo wo yala? Allala wɔli-kɛlɛ le male la dɔrɔn. Wo dɛnkɛninyara Yisa ma tumɛ min, ma ya wo dɛnbɛ. Mari ya wɔlɛ min di ma kelen-kelennamɛ-bɛɛ ma, ma ye wɔlɛ wo le kɛ tinɛ tolon!

⁶ Nde le ya sugi fui, Apalasi ya a yi sa kɔnɔ Alla le ya a ma, a fɛrɛnta ka sabati.

⁷A fuila wo, a yi-kɛla wo, fen ma wonu na. Alla min bi a mala, fui-fan ni fɛrɛn ka sabati, wo le kolo.

⁸A fuila wo, a yi-kɛla wo, dan-nafara wo dan-nafara sa wonu tɛma. Alla si wonu barayi iko anu kelen-kelennamɛ-bɛɛ wɔlita nya min.

⁹Allata wɔli-kɛ-nyɔgɛnu denu bi ma dama la. Allata sɛnɛ le wole la. Ado nfan, Allata bɔn le wo la fanan.

¹⁰Allata hinɛ fɛ, n bara nna wɔlɛ kɛ iko bon-sɔla-hɛnkilimɛ. N ya bɔn wo kurukɛ, wo kɔma, mɔgɔ-gbɛrɛ ya a dagɛ lawuli. Kɔnɔ mɔgɔ kelen-kelennamɛ-bɛɛ ni a ma a fɛrɛma bɔn wo sɔ-tinɛ,

¹¹ado Alla ara ban Kirasiti Yisa kelen pe mala bɔn wo kurukɛ la. Kurukɛ-gbɛrɛ ti ke kɛla tun ale kɔma.

¹²Do si sɛnɛ bi, ni wo ma, wodi-gbɛ, ni wo ma, kuru-da-gbɛlɛ ka a sɔ bon-kurukɛnɛ wo kuma. Kɔnɔ donu si kɔlɔma bi, ni wo ma, kalɛ, ni wo ma, binyɛ.

¹³Kɔnɔ Kirasiti wa na tumɛ min, mɔgɔ kelen-kelennamɛ-bɛɛta wɔli-kɛ-gbɛ si bɔ gbɛ rɔ bawo tɛ si mɔgɛ bɛɛta wɔli-kɛ-gbɛ labɔ gbɛ rɔ wulɔn tele. Tɛ si a kɔrɔbɔ ka a mɔlɔn labɔ gbɛ rɔ.

¹⁴Ni bɔn wo kananta, wo sɔlɛ si ata barayi sɔrɔn.

¹⁵Kɔnɔ ni minta wɔli-kɛ-gbɛ mintanta, wo tigi si bɔnɔ a rɔ worɔ. Ale nyɛrɛ si kisi kɔnɔ a si ma iko anu bara a labɔ tɛ rɔ le.

¹⁶ Wo ya a lɔn ko Alla-Bato-Bɔn le wole la serr, ado wo ya a lɔn fanan ko Allata Ni-Sɛnimɛ siginɛ wo rɔ!

¹⁷Woletɔ ni mɔgɔ-wo-mɔgɔ ya Alla-Bato-Bɔn latinya, Alla si wo tigi kasara pɔ! A ye wo nya bawo Alla-Bato-Bɔn sɛninyani de, ado ata Bato-Bɔn le wole la.

¹⁸Mɔgɔ-wo-mɔgɔ kana a nyɛrɛ yanfa. Ni min mirinɛ ko hɛnkilimɛ le ale la duninya kɛ rɔ, a fisa, duninya ni a lɔn kuntan la alako a si hɛnkili-bɛrɛ sɔrɔn nya-min.

¹⁹ Duninya kɛ ya min lɔn hɛnkilimayɛ la, kuntanyɛ le wo la Alla yala. Iko a sɛbɛnɛ Allala kitabu rɔ nya min ko, “Alla si hɛnkilimɛnu bira anu nyɛrɛta halliyɛ rɔ.”

²⁰ A sɛbɛnɛ kan tinɛ do rɔ tun Allala kitabu rɔ ko, “Hɛnkilimɛnu miriya Mari yala, ko-fuyi le wo la.”

²¹Woletɔ mɔgɔ-wo-mɔgɔ kana a nyɛrɛ wasi ko a ye kun-tigi do le fɛ bawo wotɛ le fan damasi la.

²²Nde, Pɔli wo, Apalasi wo, Pita wo, duninya kɛ wo, niyi wo, sayɛ wo, fan minnu bi nyɔ kaka wo, fan minnu bi sina wo, wotɛ le wo bɛɛ la,

²³ado Kirasititɛ le wole fanan na, Allatɛ le Kirasiti la.