Read Kuranko 1 Kɔrɛnti 7 Bible Online

1 Kɔrɛnti 7 - Kuranko bible

1 Kɔrɛnti 7

¹Nba, wo ya kɛdi min sɛbɛ n ma, n bi nyinina wola nyinikalɛ wonu denu yabila. Ni kei tora kei-gbanayɛ rɔ, tana ma wo la.

²Kɔnɔ yɛlɛnyɛ ara siyaya min kɛ, a fisa, kei bɛɛ ni musi furu. Musi bɛɛ ni sigi kei-wara-sigi rɔ.

³Kei ni a nyɛrɛ di ala musi ma. Musi ni a nyɛrɛ di ala kei ma. Anu ni anu nyɔgɔn makoe bɛɛ nyinya.

⁴Sarati sa musi bolo a fɛrɛ-bɔnkɛ kuma fɔ ala kei. Sarati fanan sa kei bolo a fɛrɛ-bɔnkɛ kuma fɔ ala musi.

⁵Wo kana wo ban wo nyɔgɔn bolo fɔ ni wo sɔnta wo ma alako wo si fɛrɛ sɔrɔn ka Alla matara wati-ni kɔrɔ nya min. Wo kɔma, wo si taran wo nyɔgɔn fɛ tun alako Setanɛ kana wo kɔrɔbɔ wo nyɛrɛ birabɛlitayɛla ko la.

⁶Kɔnɔ n bara min fɔ kɛ la, tɔn ma. N ya a fɔ wo dɛnbɛn-koe le la dɔrɔn.

⁷Ni mɔgɛ bɛɛ mara iko nde ye nya min, wo di n ye bawo musi sa nde bolo. Alla ya sɛnbɛ di mɔgɛ do ma ka koe do ma, a ta-nyɔgɛ ti ke min mala. A ya do fanan di do ma, a ta-nyɔgɛ ti ke min mala.

⁸Nba, kemini-gbananu wo, musu-gbananu wo, furunya-musinu wo, n bi kɛ fɔla wonu denu ye. A bɛnnɛ wo siginɛ ni to wo dan na iko nde ye nya min.

⁹Kɔnɔ ni wo ti ke wo nyɛrɛ mabirala, nba, keinu ni musi furu, musinu fanan ni sigi furi rɔ, ado ka furi kɛ anubɛ ka sigi kei-wara-sigi rɔ, wo fisa fɛrɛ-bɔnku-nata-tɔrɔyɛ ko.

¹⁰ Nba, wole furu-nyɔgɔn filɛ, n bi kɛ fɔla wole le ye kɔnɔ nta tɔn ma kɛ la, Maritɛ le. Wole musinu kana wola keinu boloka.

¹¹Kɔnɔ ni min ya ala kei boloka, a kelan ni to worɔ. A kana ta kei-gbɛrɛkɛ wara. Ni a ma sɔn wo ma, a ni sɛgi ala kei fɔlɔtɛ ma. Kei fanan kana ala musi boloka mumɛ!

¹²Wole a mɔgɔ-toenu wo, n bi a fɔla wo ye ko ni musu-dɛnkɛninyabɛlɛ ye kei-dɛnkɛninyanɛ bolo, ado musi wo ara sɔn a ye, a kana musi wo boloka. (Nde nyɛrɛ le ye kɛ fɔla, Mari ma de!)

¹³Dɛnkɛninya-musi fanan, ni a siginɛ kei-dɛnkɛninyabɛlɛ warɛ, ado a di kei wo ye ko musi wo ni to a bolo, musi wo kana ala kei boloka.

¹⁴N bi wo fɔla bawo dɛnkɛninya-musi si sɛninyɛ lana ala kei-wara-sigi rɔ. Dɛnkɛninya-kei fanan si sɛninyɛ lana ala furi rɔ. Ni a sa wo nya, anuna dannu si ma iko Alla-lɔnbɛlɛnuta dannu. Ka a tɛgɛ dɛnkɛninya-mɔgɛ wo ma, dan wonu bara dantɛgɛ Alla ma worɔ.

¹⁵Ile dɛnkɛninya-musi, tumado, ila misali-nyimɛ si a ma, ila kei ni dɛnkɛninya. Ile dɛnkɛninya-kei, tumado, ila misali-nyimɛ si a ma, ila musi ni dɛnkɛninya. Hali wo, ni a sɔgɛ ya dɛnkɛninyabɛlɛ bira ka dɛnkɛninya-mɔgɛ wo boloka, nba, tana ma. Dɛnkɛninya-mɔgɛ, a keima wo, a musuma wo, anu filɛ fenfen kirini ma bawo Alla ya wo kele yisi-kimɛ le ma.

¹⁷Alla ya mɔgɔ kelen-kelennamɛ-bɛɛ kele tumɛ min, anu ni to iko Mari ara a latɛgɛ anu ye nya min. N bi mɔgɛnu karanna kɛ le la chɔchi bɛɛ la.

¹⁸Alla ya wo kele tumɛ min, ni wo ya a taran min bara kemininya nun, a kana a raya ka kemininya tamasere wo bɔ a ma. Ni wo ya a taran, donu ma kemininya wɛ, hali a ma kemininya tun.

¹⁹N bi wo fɔla bawo kemininyɛ wo, kemininyabɛliyɛ wo, dan-nafara wo dan-nafara sa wo la Alla yala bawo Allata tɔn-birɛ, wo le kolo.

²⁰Mɔgɔ kelen-kelennamɛ-bɛɛ ni to iko anu bi nya min Alla ya anu kele wati min.

²¹Alla ya i kele tumɛ min, wo ya i taran yɔɔnyɛ le tɔ, wa? Tana ma wo la. Ni i ya fɛrɛ sɔrɔn ka hɔrɔya, wo fanan ma yogo.

²²Ni min bi yɔɔnyɛ rɔ, Mari ya i kele tumɛ min, i wara hɔrɔya i hakɛnu ma Mari bolo. Ni hɔrɛ le ile la Kirasiti ya i kele tumɛ min, i wara ma yɔɔn la Kirasiti kɔrɔ wo rɔ.

²³Alla ya wo san da-gbɛlɛ le la, woletɔ wo kana ma mɔgɔ-gbɛrɛnuna yɔɔn la.

²⁴N na-kelen-nyɔgɛnu, wo ni to ta-nyɔgɔnyɛ rɔ Alla fɛ kɔnɔ wo kelen-kelennamɛ-bɛɛ ni to iko a ara wo kele nya min nun.

²⁵Nba, kemini-pose, anubɛ sunkurun-posenu,[1] a bɛnta, wole si min ma, Alla ma wo fɔ n ye kɔnɔ n si nta miriya fɔ wo ye, ado Marita kinikini-wɛ ara a ma, n ba kumɛ min fɔ, mɔgɛnu si ke lala wo la.

²⁶N ba kaka-tɔrɔyɛ yen, n ya n miri ko a fisa, mɔgɛ ni to a gba-kɔrɛ rɔ.

²⁷Ni musi taranta i bolo nun, i kana i raya ka a boloka. Ni kemini-gbana le i la, i kana musi nyini.

²⁸Ni min ya furi kɛ, a ma hakɛ kɛ. Ni musi taranta kei-wara-sigi rɔ, a ma hakɛ kɛ. Wo sifanu bi tɔrɔyɛ minnu sɔrɔnna wati bɛɛ, n bi a fɛ ka wo tanka wonu denu ma.

²⁹N na-kelen-nyɔgɛnu, n bi min ma, wo le kɛ la. Wati ma yan tun. Ka a bi bi ma, musu-tiginu ni to iko musu sa minnu bolo.

³⁰Minnu bi dila, wonu ni to iko di-kɛbɛlɛnu. Minnu sewanɛ, wonu ni to iko sewabɛlɛnu. Minnu bara fannu san, wonu ni ma iko wo ti to anu bolo.

³¹Minnu bi duninya-fannu nawɔlila, wonu ni to iko anuna ko sa wonu tɔ. Wo fenfen kana ila wɔlɛ tinya Alla bolo, ado duninya kɛ ye nya min bi, a tenbimatoe le.

³²A di n ye, wo kana hɔn fenfenna ko la. Kemini-gbana ye hɔnna Marita wɔlɛla ko la bawo a di a ye, a ni Mari hɛnɛ.

³³Kɔnɔ musu-tigi ye hɔnna duninya-koenu denuna ko la, a si ala musi hɛnɛ nya min,

³⁴ado anu bi hɔnya filɛ wo tɛma. Ile musu-gbana wo, ile sunkurun-nasɔlɔnɛ wo, i ye hɔnna Marila wɔlɛla ko la bawo, a di i ye, i fɛrɛ-bɔnkɛ wo, i niyi wo, i ni wonu nyɛrɛ dantɛgɛ Alla ma. Kɔnɔ musi min bi furi rɔ, ale ye hɔnna duninya-koenu denu na bawo a di a ye, a ni ala kei hɛnɛ.

³⁵N bi kɛ fɔla wo dɛnbɛn-koe le la. N sa n tayala ka wo fɔrɔsɛ mumɛ! N bi a fɛ dɔrɔn, wo ni to ko-latelennɛnu kɛla. Wo ni wo nyɛrɛ di Marita wɔlɛ ma fasai!

³⁶Nba, tumado, kei do ara musi mabira nun kɔnɔ anu filɛ ara a latɛgɛ ko anu kana furi kɛ wɛ. Wo kɔma, kei wo ni a miri ko a sa ko-nyimɛ kɛla sunkurɔn wo wara la bawo fɛrɛ-bɔnku-nata ara tagbaya a ma. Ni a ya a miri ko a bɛnta a ni a furu, nba, a ni a furu. Hakɛ ma wo la hali!

³⁷Kɔnɔ ni a ya a latɛgɛ ko a kana a furu, ado mɔgɔ sa a fɔrɔsɛla, ni a si ke a nyɛrɛ mamarala, hali a ma sunkurun wo furu worɔ. A ye ko-nyimɛ le kɛla wo la,

³⁸ado mɔgɛ min bi furi kɛla, wo ye ko-nyimɛ le kɛla. Min ma musi furu, wotɛ fisa de!

³⁹Musi min bi furi rɔ, fananta ala kei ye a niyi la, a ye ala kei kɔrɔ. Kɔnɔ ni ala kei fagara, a ara hɔrɔya worɔ. Ni a di a ye, a ni ta kei-gbɛrɛkɛ warɛ kɔnɔ fɔ kei wo ni ma dɛnkɛninya-mɔgɛ la.

⁴⁰Hali wo, ndeta miriya rɔ, musi wo si sewa ni a ma sigi kei wara tun, ado n lanɛ a la ko Allala Ni-Sɛnimɛ le ye n nabilala kɛ la.