Read Kuranko 1 Kɔrɛnti 8 Bible Online

1 Kɔrɛnti 8 - Kuranko bible

1 Kɔrɛnti 8

¹Nba, bɛsɛnu si kɔ soge minnu na, n bi nala wonu denu wara-koe fɔla wo ye kɛ la. Tonyɛ le ko bɛɛ ya doni lɔn kɛ rɔ. Kɔnɔ lɔnnɛ sifa wo si a ma, mɔgɛ ni wasi wola ko la. Keninteyɛ le si mɔgɛ layɛlɛ.

²Minnu miri ko anu hɛnkili waranɛ, wonu ma fenfen lɔn iko a bɛnta, anu ni a lɔn nya min.

³Kɔnɔ Alla keninɛ minnu bolo, a ya wonu lɔn.

⁴Woletɔ bɛsɛnu si kɔ soge minnu na, n si min fɔ wonuna ko la, wo le kɛ la. Ma ya a lɔn ko bɛsɛ, fen de wo la niyi sa min tɔ. Ma ya a lɔn fanan ko Alla kelen de!

⁵Hali wo, anu bi fan donu kelela ko “allanu” anubɛ “marinu” san-kole rɔ anubɛ dugu-kole kuma, ado fan wonu siya kati!

⁶Kɔnɔ Alla kelen de male bolo, ma Fa Alla min ya fan bɛɛ dan, kɔni. Male ye ale le bolo, ado Mari kelen pe le ma bolo fanan, Yisa Kirasiti, kɔni. Fan bɛɛ danta wo le baraka rɔ, ado male fanan ye wo le baraka rɔ.

⁷Kɔnɔ dɛnkɛninya-mɔgɛ bɛɛ ma kɛ lɔn. Mɔgɛ donu durunɛ bɛsɛ kɛnu na ko ha bi, fen de wo la niyi ye min tɔ, woletɔ anu sɔndɔmɛ rafaganɛ Alla wara-koe rɔ. Bɛsɛnu si kɔ soge minnu na, anu ba wonu dɔn tumɛ min, anu sɔndɔmɛ ti gbɛ soge wonu dɔn tinɛ.

⁸Ma ti ke Alla hɛnɛna dɔn-fen dɔn-koe la. Ni ma ma a dɔn, wo ti ma bɔnɔ fenfen tɔ. Ni ma ya a dɔn fanan, ma ti tɔnɔ-wo-tɔnɔ sɔrɔn wo rɔ.

⁹Wo ni a ma wo fɛrɛma. Minnu sɔndɔmɛ rafaganɛ, wola hɔrɔyɛ kɛ kana na a ma, wonu ni bui hakɛ rɔ.

¹⁰Anu sɔndɔmɛ rafaganɛ koe kɛnu tɔ kɔnɔ wole ara hɛnkili sɔrɔn kɛnu ma. Ni anu ya wo yen soge dɔnna bɛsi-kɔ-tinɛ rɔ, wo si a ma, anu fanan ni soge wo dɔn.

¹¹Wole ya a lɔn ko soge wo dɔn-koe ma yogo kɔnɔ wo si a ma, minnu sɔndɔmɛ rafaganɛ, wonu ni halaki, ado wo na-kelen-nyɔgɛ le wonu na Kirasiti fagara minnuna ko la.

¹²Nba, wo ara hakɛ bi wo na-kelen-nyɔgɛnu na ka anu sɔndɔmɛnu madumɛ bawo wonu sɔndɔmɛnu tafaganɛ le. Wo wa wo ma, wo ye hakɛ kɛla Kirasiti la worɔ.

¹³Nba, ni dɔn-fan si a ma, n na-kelen-nyɔgɛ ni hakɛ kɛ, nde nyɛrɛ ti soge dɔn tun wo rɔ mumɛ! N kana n na-kelen-nyɔgɛnu nabui hakɛ rɔ.