Read Kuranko 2 Kɔrɛnti 11 Bible Online

2 Kɔrɛnti 11 - Kuranko bible

2 Kɔrɛnti 11

¹Wo yandi! Hali n kuntanyanɛ doni, wo ni wo munyu n kɔrɔ.

²N bi wo makeliyala iko Alla ye wo makeliyala nya min. Wo bɛɛ mani de iko sunkurun-nasɔlɔni-bɛrɛ, n bara min furu-koe lanyiri kiri mɔgɔ kelen pe ye, Kirasiti, kɔni.

³ N kilannɛ ko fenfen kana wo hɛnkili yabasan iko duguma-fan ya ma mama Hawa yanfa ala foninya-wɛ la nya min. Wo kana bɔ wola keninteya-bɛrɛ rɔ min bi wo bolo Kirasiti wara la.

⁴Min bɛɛ ye nala wo wara ka Yisala kawandili-dogbɛrɛ bɔ wo ye, wo sewanɛ wonu na ka wo munyu wonu kɔrɔ. Male ya Yisala kawandilɛ min bɔ, kelen ma wonu na. Nba, wo ara niyi anubɛ kibara-nyimɛ min bira foninya-kilayɛnu bolo, wonu faranɛ matɛ ma feu! Wo ya Allata Ni-Sɛnimɛ anubɛ kibara-nyimɛ min sɔrɔn male bolo, kelen ma anu na feu!

⁵N mirini ma ko nde dɔgɔ ka tenbi wola kilaya-makawanɛ wonu na hali doni!

⁶Tumado, nde ma kusan kumala kɔnɔ n sa wo nya lɔnnɛ rɔ. Ma ara wo gbɛ wo ye koe bɛɛ rɔ.

⁷N ya Allala kibara-nyimɛ-kawandili bɔ wo ye tumɛ min, n ma wo manyinika fenfenna ko la. N ya n nyɛrɛ famayigi alako wo ni gbiliyɛ sɔrɔn. Wo yoge wo yala, wa?

⁸N bi wɔlila wo tɛma tumɛ min, chɔchi-gbɛrɛnu ya n sara. A mani de nun iko n bi chɔchi wonu kankanna le nun alako n si wo dɛnbɛ nya min.

⁹ N bi wo tɛma tumɛ min nun, ni n makoe bilara fenfen na, n ma wo yakɔrɔ-mamɔ n dɛnbɛn-koe la. N makoe ye fan min bɛɛ la, ma na-kelen-nyɔgɛ minnu bɔra Masidoniya, wonu nara wo bɛɛ la n ye. Iko a ye nya min kebi fɔlɔ, n ti ma dunɛ la wo ye mumɛ! Alamɛ a tora wo nya fanan.

¹⁰N bara n keli Kirasitita tonyɛ rɔ min bi n tɔ. Akeya sigisɔn-mɔgɛ fenfen ti ke n nakalala n nyɛrɛ-matɔgɛ kɛ la.

¹¹N ya kɛ fɔ nfenna? N ya wo fɔ bawo n ma wo keni, wa? Alla ya a lɔn ko wola ko di n ye kati!

¹²N bi min ma tinɛ kaka, n si to wo kɛla bawo foninya-kilaya-makawanɛ doi wonu kana nyɛrɛ-matɔgɔ-kunya sɔrɔn ka a fɔ ko male ye wɔlila nya min, anu fanan bi wɔlila wo nya na le.

¹³Kilayɛ wonu, kilaya-bɛrɛ ma anu na kɔnɔ anu bi anu nyɛrɛ mala iko Kirasitita kilayɛnu denu bi anu na serr! Foninya-kilayɛ le anu na minnu bi foninyɛ fɔla anuna wɔlɛla ko la.

¹⁴Nba, kabana-ko ma wo la! Hali Setanɛ si ke a nyɛrɛ mala iko waanta melika!

¹⁵Wo kana kawa ni Setanɛta wɔli-kɛlɛnu ya anu nyɛrɛ ma iko Allala wɔli kɛla bɛrɛnu. Anuta wati wa ban duninya kɛ rɔ, anu ya min ma, anu si wo sarɛ sɔrɔn, yɔ!

¹⁶N ni a fɔ tun, mɔgɔ-wo-mɔgɔ kana a miri ko kuntan le nde la. Kɔnɔ ni min bi a mirila wo nya, nba, wo tigi ni n tabira iko kuntan. N ni n nyɛrɛ matɔgɔ doni.

¹⁷Nba, n bi min fɔ tinɛ kaka, Mari ma n sɔ wo fɔ tinɛ. N bi n nyɛrɛ-matɔgɔla min kɛ, n bi kumala iko kuntan.

¹⁸Mɔgɔ siyaman bi anu nyɛrɛ matɔgɔla anuna kɛwɔlɛnuna ko la. Nde fanan si ke wo nyɔgɔn mala,

¹⁹ado wole le dɔrɔn bi hɛnkilimɛnu na! Wo le ya a to, wo sewanɛ ka wo munyu kuntannu kɔrɔ! A sa wo nya, wa?

²⁰Ni mɔgɛ ya wo bira ka wo ma iko yɔɔn ka wo bolo labira ka wo kensunya ka yoo wo ma ka wo dɛ ratii, wo si wo munyu mɔgɔ-su wo kɔrɔ.

²¹N bi miliyala ka a fɔ wo ye ko n ma ke wo mala! Ma yɛ ra ma fara wo nya. Ni mɔgɛ do si sisi a nyɛrɛ matɔgɔla fan dola ko la, nde fanan si sisi le wo mala. (N bi kumala iko kuntan.)

²²Hiburunu le anu na, wa? Wo le nde fanan na. Anu bi Yahudiyanuna dina rɔ, wa? Nde fanan bi a rɔ. Iburayima bɔnsɔn le anu na, wa? Wo le nde bɛrɛni na.

²³ Kirasitita wɔli-kɛlɛ le anu na, wa? Nde wɔlita ka tenbi anu denu na pirr! Anu bara n nadon yele la kinyama siyaman ka tenbi anu na. Mɔgɛnu bara n gbesi ka tenbi anu denu na. Sayɛ ara foo n na ka tenbi anu denu na. (Kɛ bɛɛ rɔ, n bi kumala iko hɛnkilibɔnɛ.)

²⁴ Kinyama loli kɔrɔ, Yahudiyanu bi n gbesila bosɛ-nya bi-sawa ani kɔnɔntɔ (39) la.

²⁵ Romu kɛnu ya n gbesi gbelekɛ la kinyama sawa. Anu ya n mabon kuri la kinyama kelen. Kulɔn tinyara n na kinyama sawa. Lunyɛ do, n ya su kelen anubɛ tele kelen bɔ kɔgɔ-yi rɔ.

²⁶ Nna tagama-siyamɛ rɔ, n taranta yi-fɛ-masibɛ rɔ anubɛ kankannu-masibɛ rɔ anubɛ n na-kelen-nyɔgɔ Yahudiyanu-masibɛ rɔ. Sibolo-gbɛrɛnu fanan ya a lagbɛlɛya n kuma. So-burɔ-masibɛ wo, wulɛrɔ-masibɛ wo, kɔgɔ-yirɔ-masibɛ wo, foninya-dɛnkɛninya-mɔgɛnu-masibɛ rɔ wo, n ya n munyu wo bɛɛ kɔrɔ.

²⁷N taranta wɔlɔ-wɛ anubɛ yakɔrɔ-mamɔɛ rɔ. N kira n ya-la tuma siyaman. Kɔnkɛ ya n bira. N kan lagbalata. Tuma siyaman, dɔn-fan ma n tabɔ. Yiya sa n bolo. Fɛrɛya-bɔ sa n bolo.

²⁸Min sanɛ kɛ bɛɛ kuma, chɔchi bɛɛla hɔnyɛ ye n na tele-wo-tele min si n niyi ragbɛrɛn n ma.

²⁹Ni nta mɔgɛ dola sɛnbɛ ma ara dɔgɔya, nde fananta sɛnbɛ ma si dɔgɔya. Ni mɔgɛ do ya nta mɔgɛ do ladon hakɛ rɔ, wo si n yisi tɔrɔ ha ka a dan natenbi.

³⁰Ni fɔ n ba n nyɛrɛ matɔgɔ le, n si n nyɛrɛ matɔgɔ wo koenu tɔ minnu si nna sɛnbɛbɔninyɛ yira.

³¹Alamɛ ma Mari Yisa Fa Alla tɔgɛ ni tanto tolon! Alla le ya a lɔn ko n sa foninya fɔla.

³² N bi Damasika soe burɔ tumɛ min, sigisɔn-mansɛ min bi Mansa Arɛtasi kɔrɔ, wo ya a kandannɛnu sɔ soela foolɛ rɔ n bira-koe la.

³³Kɔnɔ n diyana-mɔgɛnu ya n nayigi sende rɔ ka n natenbi tarɛ kɔma alako n ni bɔ anu bolo.