Read Kuranko Kalesiya 2 Bible Online

Kalesiya 2 - Kuranko bible

Kalesiya 2

¹ San tan-ni-nani kɛ kɔma, mabɛ Banabasi tara Yerusalɛm tun. Taita fanan bilara n fɛ.

²N tara bawo Alla le ya a lagbɛ n ye ko n ni ta. Mabɛ chɔchi-mɔgɔ-banu ya ma kun nayigi. N ya kibara-nyimɛ-kawandili bɔ sibolo-gbɛrɛnu ye nya min, n ya wo faranfasi anu ye ladɛn wo rɔ. N bara wɔlɛ min kɛ fɔlɔ-nun wo, n bi min kɛla kaka wo, n sa a fɛ, wo fenfen ni ma fuyi la.

³N ta-nyɔgɛ Taita, Kiriki le wo la kɔnɔ hali wo, chɔchi-kunyɛnu ma a fɔrɔsɛ kemininya-koe ma anuna tɔn fɛ.

⁴Nba, mɔgɛ donu bara anu nyɛrɛ ma na kelannu na ka kofu ma ma ladɛn wo kuma. Mɔgɛ wonu donta ma kuma iko ko-lakɔrɔsilɛnu alako hɔrɔyɛ min bi ma bolo Yisa Kirasiti rɔ, anu ni wo bi ma bolo. Wonu bi nyinina a ma, ko ma ni ma yɔɔn la anuna tɔn kɔrɔ.

⁵Kɔnɔ ma ye a fɛ ka kibara-nyimɛ mara wo ye nun a kilɛ fɛ, woletɔ ma ma sɔn lakɔrɔsilɛ wonu bolo hali doni bɛrɛni!

⁶ Wonu donu bara anu nyɛrɛ ma mɔgɔ-banu na kɔnɔ hali anu mara mɔgɔ-banu na, nna ko sa wo rɔ. Alla ti mɔgɔ ma mɔgɔ-ba la ala yanyɛ anubɛ ala kinyɛ fɛ, ado mɔgɔ-ba wonu ma a fɔ n ye ko n ni nta kumɛ yɛlɛma sibolo-gbɛrɛnuna ko la.

⁷Ado nfan, anu denu ya a yen ko Alla ara dunɛ di n ma ka kibara-nyimɛ-kawandili bɔ sibolo-gbɛrɛnu ye iko a ara dunɛ di Pita ma nya min ka kibara-nyimɛ-kawandili bɔ Yahudiyanu ye.

⁸Alla wɔlita nde rɔ ka ala kilayɛ lake sibolo-gbɛrɛnu ma iko Pita ya ala kilayɛ lake Yahudiyanu ma nya min.

⁹Yemesi anubɛ Pita anubɛ Yɔni, mɔgɛnu ya minnu lɔn anuna mɔgɔ-banu na, kɔni, mɔgɛ wonu ya a yen ko Alla le ya wɔlɛ kɛ di n ma ata hinɛ fɛ. Anu ya anu bole sa mabɛ Banabasi bole tɔ alako ka a yira ko ma bɛɛ ara ma kelen na. Ma dama sɔnta ko male ni mata wɔlɛ kɛ sibolo-gbɛrɛnu tɛma, anu denu ni anuta wɔlɛ kɛ Yahudiyanu tɛma.

¹⁰Anu ya a fɔ ma ye ko ma ni ma hɛnkili to bolo-kolɔnnu ko anu tɛma, ado wo kɛ-sɔgɛ ye n na nun, yɔ!

¹¹Pita nara Antiyaki tumɛ min, n ya a makuma dɛnkɛninya-mɔgɛnu yala bawo a ma ko-telennɛ kɛ.

¹²Pita anubɛ ma na-kelen-nyɔgɔ dɛnkɛninya-mɔgɛ sibolo-gbɛrɛnu denu duruta fen-dɔn kɛla miran kelen tɔ nun. Kɔnɔ Yemesi ya mɔgɛ donu nana tumɛ min, a ya a bɔ wonu fɛ. A ma sɔn ka fen-dɔn anu fɛ tun bawo a kilanta Yahudiyanu na minnu ko fɔ sibolo-gbɛrɛnu ni kemininya iko anu denu.

¹³Ma na-kelen-nyɔgɔ Yahudiya doinu fanan kilanta iko Pita. Hali Banabasi fanan bilara anu fɛ anuna kilan wo bolo.

¹⁴N ya a yen tumɛ min ko anu sa ko-telennɛ kɛla iko kibara-nyimɛ ya a fɔ nya min. N ya a fɔ Pita ye anu dama yala ko, “Yahudiya le ile la kɔnɔ i sɔnta nun ka ma iko sibolo-gbɛrɛ. Nfenna worɔ, i si sibolo-gbɛrɛnu fɔrɔsɛ alako anu ni ma iko Yahudiyanu?”

¹⁵Kebi ma bakuri, Yahudiya le ma la. Hakɛ-tigi ma male la iko anu bi min fɔla wole sibolo-gbɛrɛnu ma.

¹⁶ Hali wo, ma ya a lɔn ko mɔgɔ wa dɛnkɛninya Yisa Kirasiti ma, a telennɛ le Alla yala dɛnkɛninyɛ wo fɛ worɔ. Mɔgɔ ti ke telenna tɔn-birɛ fɛ mumɛ! Male fanan bara dɛnkɛninya Kirasiti Yisa ma alako ma ni telen Alla yala mala dɛnkɛninyɛ fɛ nya min.

¹⁷Nba, ni male ara ma raya ka Alla hɛnɛ, a ni taran tun ko hakɛ-tigi le male la iko sibolo-gbɛrɛnu bi nya min, wo kɔrɛ le ko Kirasiti le ya ma sɔ hakɛ-kɛ-koe la, wa? Alamɛ ma kisira wo ma.

¹⁸N bara tɔn wara-koe min wayan, ni n ya wo sɔ tun, wo ye a yirala ko nde ara sama ka ma tɔn-tinyalɛ la.

¹⁹Nba, a mani de iko n bara faga tɔn wara-koe ma, ado n sa Yahudiyanuna tɔn-kitabu kɔrɔ tun alako n ni to Allatɛ rɔ nya min. A mani de iko malebɛ Kirasiti le fagara ma nyɔgɔn fɛ kɔlɔma ma.

²⁰Woletɔ nde belini ma tun fɔ Kirasiti min belinɛ nde rɔ. N bi nya min kaka, n bi wo nya dɛnkɛninyɛ le fɛ Allala den Yisa rɔ. Wo le ya n keni ka faga ndela ko la.

²¹N ti n kan-kɔ sɔ Allala hinɛ la mumɛ! Ni mɔgɛ si ke telenna Alla ye tɔn-birɛ fɛ, Kirasiti fagara le worɔ fufafu!