Read Kuranko Ɛfɛsa 2 Bible Online

Ɛfɛsa 2 - Kuranko bible

Ɛfɛsa 2

¹ Wole faganɛ fɔlɔ-nun Alla yala wola kuma-birabɛlitayɛ anubɛ hakɛ bolo.

²Wo bilanɛ duninya kɛ kila-yogomɛnu fɛ wo wati le tɔ. Ni-yogo-sɛnbɛ-tigi min bi wola minɛ rɔ, wo ya wo leta kilɛ bira, ado ni-yogo kelan wo ye kun-tigiyɛ kɛla Allata kuma-birabɛlɛnu kun na kaka.

³Tonyɛ le wo la, ma dama manɛ nun iko mɔgɛ wonu. Ma tagamanta iko ma fɛrɛ-natanu bi nya min ka ma nyɛrɛ bagbuyi anubɛ hɛnkili-diyana-koenu ma. Ka a tɛgɛ ma sɔn wonu ma, a bɛnta, Allata fondo-bɔɛ ni kɛ ma iko doinu ka ma tɔrɔ a nya-bɛrɛbɛrɛ ma!

⁴Ma faganɛ fɔlɔ-nun mala kuma-birabɛlitayɛ bolo kɔnɔ hali wo, Allata hinɛ waranɛ ma ma. Ala keninteyɛ kolo ma ye min kɛ, a ya ma lawuli tun alako ma ni ni-kurɛ sɔrɔn Kirasiti baraka rɔ. Ma kisinɛ Allata hinɛ le fɛ.

⁶Ma faganɛ nun ma hakɛnu tɔ min kɛ, a ya mabɛ Kirasiti Yisa lawuli ma nyɔgɔn fɛ. Kaka, ma ye kun-tigiyɛ kɛla a fɛ ata sɛnbɛ baraka rɔ.

⁷Alla ya a latɛgɛ wo nya na le alako a ni ala hina-waranɛ labɔ gbɛ ma, ado a ya hinɛ wo yira ma la Yisa Kirasiti le tɔ.

⁸Woletɔ ma kisinɛ Allata hinɛ le fɛ dɛnkɛninyɛ baraka rɔ, ado male tɔrɔ-gba ma wo la. Allata kɔ-fan le wo la.

⁹Nyɛrɛ-matɔgɔ mumɛ sa a rɔ bawo wo ma kɛ ma nyɛrɛta sɛnbɛ fɛ.

¹⁰Alla nyɛrɛ le ya ma dan. A ya ma dan ko-nyimɛ kɛ-koe le la. Ma tenbi Yisa Kirasiti rɔ, ma si to ko-nyimɛ kɛla bawo ale nyɛrɛ ara ban wonu tabɛnna ma ye, bi ko ma!

¹¹Sibolo-gbɛrɛnu denu bi wonu na, Yahudiyanu ma de! Yahudiya minnu si kemininya ka a yira ko Allatɛ le anu denu na, wonu bi a fɔla wole ma ko, “Alla-lɔnbɛlɛ-bilakorenu.” (Ado nfan, kemininyɛ wo ye mala hadama-den-bole le la.)

¹²Wo ye nya min nun fɔlɔ, wo ni wo hɛnkili to wo ko. Wo wati ya a taran, wo ma ma wɛ Kirasititɛ la. Wo ye sibolo-gbɛrɛyɛ la nun. Wo sa Allata mɔgɔ-yabɔnɛnu tɛma nun. Wo kɔma, Alla ya sarama-kan min kiri anubɛ ala mɔgɛnu tɛma, wota fenfen sa wo rɔ nun. Wo tumɛ ya a taran, Alla sa wo bolo nun, ado yigi sa wo ma mumɛ!

¹³Ka a tɛgɛ Yisa Kirasiti ma, wole minnu fɛ-yan Alla la nun, wo gbɛrɛnnɛ Alla ma kaka. Kirasiti Yisa yele mara wola sarakɛ la.

¹⁴Kirasiti nyɛrɛ ara na yisi-kimɛ la ma ye bawo a ara male Yahudiyanu anubɛ wole sibolo-gbɛrɛnu ma kelen na. Yasɛ min bara mabɛ wole sibolo-gbɛrɛnu fara ka to ma nyɔgɔn kɔnna, ata sayɛ le ya yasɛ wo wayan ma tɛma.

¹⁵ A ya yili kiri Yahudiyanuna tɔn anubɛ anuna sereyanu na alako a ni mabɛ wole sibolo-gbɛrɛnu ma kelen na a nyɛrɛ ye. A ya yisi-kimɛ lana ma tɛma ka le.

¹⁶ Kirasiti ya sɔgɔ-labɔɛ ban ma tɛma ala sayɛ fɛ kɔlɔma ma. A ya ma latugun ma nyɔgɔn na ka ma ma kelen na alako a ni na ma la Alla ma.

¹⁷ Woletɔ Kirasiti ara kibara-nyimɛ-kawandili bɔ mɔgɛ bɛɛ ye. I mara sibolo-gbɛrɛ la min fɛ-yan Alla la nun wo, i mara Isirɛla mɔgɛ la min fɛ-ma-yan a la nun wo, kibara-nyimɛ ye ma filɛ bɛɛ ye.

¹⁸I mara Isirɛla mɔgɛ la wo, i mara sibolo-gbɛrɛ la wo, Kirasiti le si a ma, ma ni sɔ ma Fa Alla yakɔrɔ ata Ni-Sɛnimɛ baraka rɔ.

¹⁹Woletɔ wole sibolo-gbɛrɛnu, mɔgɔ-gbɛrɛ ma wo la tun, ado sundan ma wo la tun. Wo ara ma duguran la kaka Allata mɔgɛnu tɛma. Wo ye Allata denbayɛ rɔ gbɛ!

²⁰Kilayɛnu anubɛ nɛbinu mara bon-kurukɛ-fan la min kɛ, wole ara ma a bon-dagɛ la, ado Kirasiti nyɛrɛ le bɔn wo sɛbɛna-kuru-tɔnɔnamɛ la.

²¹Bɔn wo ladan-fan bɛɛ tugunnɛ anu nyɔgɔn na ale le baraka rɔ. Bɔn wo si to koloyala ka ma Alla Bato-Bon-sɛnimɛ do la Mari baraka rɔ.

²²Bɔn wo le malebɛ wole sibolo-gbɛrɛnu na. Alla mayiginɛ a rɔ ata Ni-Sɛnimɛ baraka rɔ.