Read Kuranko Ɛfɛsa 5 Bible Online

Ɛfɛsa 5 - Kuranko bible

Ɛfɛsa 5

¹Woletɔ wo ni wo raya ka Alla sɔn bi bawo a diyana-dan le wole la.

² Wo ni wo nyɔgɔn keni iko Kirasiti ya wo keni nya min. A ara a nyɛrɛ niyi ma sarakɛ la malela ko la iko sarakɛ min sumɛ si a diya don Alla rɔ.

³Yɛlɛnyɛ wo, ko-kɔsɔnɛ wo, wasabɛlitayɛ wo, a ma bɛn, wo do-wo-do ni taran wole Allata mɔgɛnu tɛma.

⁴A ma bɛn, wo ni kuma-yogomɛ anubɛ kuntanya-kumɛ anubɛ kuma-gbondanɛnu fɔ foro-gbesi tinɛ. Yanni wo ni wo ma, wo ni to baraka birala Alla ye tolon!

⁵Wo ni a lɔn serr, ko yɛlannu anubɛ sɔn-yogoma-tiginu anubɛ wasabɛlɛnu ti fenfen sɔrɔn Kirasiti anubɛ Allata mansayɛ rɔ. (Wasabɛlɛnu sa Alla batola fɔ anu bi nyinina minnu ma.)

⁶Wo kana sɔn, mɔgɔ ni wo bolo labira kun-takolonya-kumɛnu na. Allata diminyɛ si na wonu denu kuma minnu ti sɔn ata kumɛ birala.

⁷Woletɔ wobɛ mɔgɔ-sufa wonu hayu kana taran wo nyɔgɔn na.

⁸Wole nyɛrɛ ye pinpi le tɔ fɔlɔ-nun kɔnɔ kebi wo mara Maritɛ la, wo ye wan-takanɛ le tɔ gbɛ! Wo ni tagama iko mɔgɛ minnu bi wan-takanɛ wo rɔ.

⁹Minnu bi waan rɔ, wonu si to ko-nyimɛnu kɛla ka ko-telennɛnu ma ka tonyɛ fɔ mɔgɛnu ye.

¹⁰Wo ni wo raya ka Mari diyana-koenu lɔn.

¹¹Wo kana bila wonu fɛ minnu bi pinpirɔ-ko-fuyinu mala, ado fɔ wo ni pinpirɔ-koe wonu nabɔ gbɛ ma.

¹²Wonu bi min mala pinpi rɔ, miliya-koe le wonu na. Hali ka wonu takaran mɔgɛnu tɛma, miliya-koe le wonu na.

¹³Koe bɛɛ wa bɔ gbɛ ma lunyɛ min, anu kɛ-nya bɛɛ si sa tele la mɔgɛnu yala,

¹⁴ado koe min bara sa tele la, dogonta ko ma wo la tun. Woletɔ anu bi a fɔla ko, “Kinɔgɔlɛ, i ni kunden, i lawuli ka bɔ furinu tɛma! Wo kɔma, Kirasiti si waan raka i ma waran!”

¹⁵Woletɔ wo ni a ma wo fɛrɛma wo tagama-nya rɔ. Wo kana tagama iko ko-lɔnbɛlɛnu. Wo ni tagama iko hɛnkilimɛnu.

¹⁶ Wo kana wo nyɛrɛ matanbani. Wo ni wo raya ko-nyima-kɛ koe ma bawo tele kɛnu ma kin.

¹⁷Wo kana ma kun-takolɔnnu na worɔ. Wo ni wo sɛbɛ don Mari sako-lɔn-koe ma.

¹⁸Wo kana sɔn, gbɛɛ ni wo rabunden. Yanni wo ni wo ma, wo fanɛ ni to ata Ni-Sɛnimɛ la.

¹⁹ Yaburi-kumɛnu ni ma wo kirabɔ-fan la. Wo ni bɛtinu bɔ ka Allata siginu sa Mari ye ka a tanto wo yisi rɔ.

²⁰Wo ni baraka bira ma Fa Alla ye fan bɛɛla ko la tumɛ bɛɛ. Wo ni baraka bira a ye ma Mari Yisa, Allata-Mɔgɔ-Yabɔnɛ tɔgɛ rɔ.

²¹Wo ni sɔnnaya wo nyɔgɔn ye Kirasitita gbiliyɛla ko la.

²² Wole musinu, wo ni sɔnnaya wola keinu ye iko wo ye a mala Kirasiti ye nya min.

²³Wo ni wo ma bawo sɛnbɛ ye kei bolo ala musi kuma iko sɛnbɛ ye Kirasiti bolo ata mɔgɛnu kuma nya min, ado Kirasiti nyɛrɛ le ata mɔgɛnuna kisilɛ la, a nyɛrɛ bagbuyi, kɔni.

²⁴Woletɔ iko chɔchi-mɔgɛnu sɔnnayanɛ Kirasiti ye nya min, wole musinu ni sɔnnaya wola keinu ye wo nya na le koe bɛɛ rɔ.

²⁵ Wole keinu, wo ni wola musinu keni iko Kirasiti ya ala mɔgɛnu keni nya min ka a nyɛrɛ niyi ni anuna ko la.

²⁶A ara ata mɔgɛnu sɛninya kuma-sɛnimɛ anubɛ yi la alako a ni anu dantɛgɛ Alla ma.

²⁷Kirasiti ya wo bɛɛ ma le alako ala mɔgɛnu ba sɔ a yakɔrɔ, anu sɛninyanɛ ni taran, fɛɛ kana taran anu na. Anu tatinyani ma, anu matɔrɔmɔnyani ma, anu kanbalibɛliya-tina-wo-tina sa anu tɔ.

²⁸Kei ni ala musi keni iko a si a nyɛrɛ bagbuyi keni nya min. Kei min bara ala musi keni, wo ara a nyɛrɛ keni,

²⁹ado ha bi, mɔgɔ ti a ban a nyɛrɛ bagbuyi la fɔ ka a nyɛrɛ matɔlɔ ka a fɛ-bira iko Kirasiti ye ala mɔgɛnu fɛ-birala nya min.

³⁰Ado nfan, bagbu kelen de ma dama la, Kirasiti bagbuyi, kɔni.

³¹ A sɛbɛnɛ Allata kitabu rɔ ko, “Kei si a fa anubɛ a na boloka ka tugun ala musi la. Anu filɛ si ma kelen na.”

³²Tonya-ba ara bɔ gbɛ rɔ kan-tina-kelan wo rɔ. Wo ye Kirasiti anubɛ ata mɔgɛnuna ko fɔla.

³³Kɔnɔ a ye male fananna ko fɔla ko kei bɛɛ ni ala musi keni iko a nyɛrɛ. Wo kɔma, musinu ni anuna keinu gbiliya.