Read Kuranko Filipai 3 Bible Online

Filipai 3 - Kuranko bible

Filipai 3

¹Kumɛ kɛ kundɔn, n na-kelen-nyɔgɛnu, alamɛ Mari ya sewa-ba di wo ma. N bara koe minnu sɛbɛ fɔlɔ-nun, a ti gba n na ka wo koenu fɔ tun. Ni n ya wo ma, a si wo tanka nyagbɛ ma.

²Wo ni a ma wo fɛrɛma ko-yogoma-kɛlɛnuna ko la. Minnu bara nɔrɔ fɛrɛ-tɛgɛ-koe ma, wuli le wonu na,

³ado male ara kemininya-bɛrɛ sɔrɔn. Anu denu ma de! N bi wo fɔla bawo male ye Alla batola ata Ni-Sɛnimɛ baraka rɔ. Male ara nyagalen ma tagama-nyala ko la Yisa Kirasiti rɔ. Mɔgɛnu bi min mala anu fɛrɛnu na, male ti ma yigi sa wo kuma hali doni!

⁴Ni mɔgɔ-wo-mɔgɔ ye a mirila ko a si kisi wo-sufa koe wonuna ko la, nde si ke wo mala ka tenbi anu denu na.

⁵ N sɔrɔn ya lɔgɔkun kelen bɔ tumɛ min, n kemininyara wulɔn le. Isirɛla kɛ le nde la n sɔrɔn-nya fɛ ka bɔ Bɛnyamɛ bɔnsɔn rɔ. Hiburu nyɛrɛ-nyɛrɛ le nde la. Yahudiyanuna tɔn-kitabu-bira-kilɛ fɛ, Farisi[1] le nde la.

⁶ N bara n taya ha n ya a lagbɛlɛya chɔchi kuma, ado ni mɔgɛ si ke mala telenbagɛ la tɔn-birɛ fɛ, fɛɛ-wo-fɛɛ ma taran n na wo rɔ.

⁷Hali koe minnu manɛ tɔnɛ la nta miriya rɔ nun, wonu bara ma bɔnɛ la n ye kaka Kirasitila ko la.

⁸Wo koenu dɔrɔn ma. N bara ko-koron-bɛɛ lɔn bɔnɛ la feu! Koe min tenbinɛ kɛ dama la, wo le ka Kirasiti Yisa lɔn n Mari la, kɔni. N bara koe wo bɛɛ boloka ale Yisala ko la ka wo bɛɛ lɔn yefe-gbalɛ la alako n ni Kirasiti sɔrɔn.

⁹N bi a fɛ, n ni tugun ale la feu! N nyɛrɛta telenbagayɛ wo fenfen sa n bolo tun. Mɔgɛ si tɔnɛ sɔrɔn koe minnu fɛ iko tɔn-birɛ, n bara n kan-kɔ sɔ wonu na. N bara telenbagayɛ min sɔrɔn Kirasiti rɔ, wo le ye n bolo kaka. Telenbagayɛ wo bɔnɛ Alla le bolo. A suli ye dɛnkɛninyɛ le tɔ.

¹⁰N bi nyinina min ma gbɛ, wo le ko n ni Kirasiti lɔn anubɛ a lawuli-sɛnbɛ. N bi a fɛ, n ni tɔrɔ iko ale tɔrɔta nya min anubɛ ka faga iko ale fagara nya min.

¹¹A yigi ye n ma ko Alla si nde nyɛrɛ lawuli ka bɔ sayɛ rɔ iko Mari Yisa.

¹²N ma a fɔ ko n kɔntɛ ara kɛ n ye. N da fani ma wɛ kɔnɔ n bi n tayala dɛɛ, ado Yisa ara ban nde rabirala ka n ma atɛ la.

¹³Nba, n na-kelen-nyɔgɛnu, n ma n miri lefan ko n bara ban kela kɔnɔ n bara ko-kelen-pe latɛgɛ, wo le ko koe minnu bi n kɔma, n ni nyina wonu ko ka n se-koe-bɛɛ kɛ yarɔ-koenu ma.

¹⁴Alla wa n kele ko n ni yɛlɛ san ma ka habadan-nimayɛ kɛ Yisa Kirasiti baraka rɔ, nta barayi le wo la. Woletɔ n bi n burila ka n telen dan wo la, yɔ!

¹⁵Male min dama kanbalinɛ Kirasiti rɔ, a bɛnta miriya wo ni taran ma dama bolo, ado ni miriya-dogbɛrɛ ye mɔgɛ do bolo, alamɛ Alla ya wo labɔ gbɛ rɔ wo tigi ye.

¹⁶Kɔnɔ a fɛrɛ sa fɔ ma ni to tala yarɔ iko ma ara wuli a mala nya min nun.

¹⁷ N na-kelen-nyɔgɛnu, wo dama ni to n nadegenna. N bara ma misali-bɛrɛ la wo ye. Woletɔ minnu bi wo nyɔgɔn kɛla, wo ni to wonu mafɛlɛnna.

¹⁸N bara kɛ fɔ wo ye fɔlɔ-nun ko siyaman, ado kaka, n bi a fɔla tun, n ya-yi ye bɔla. Mɔgɔ siyaman bi nyɔ minnu bi anu tayala ka Kirasiti faga-ko-kɔrɛ tinya.

¹⁹Wonuna ban le nyahanama la bawo anuta Alla le anu bagbuyi-natanu na. A bɛnnɛ, anu ni miliya koe minnu na, anu wasinɛ wonu tɔ. Anu bi anu mirila duninyata-fannu denu dɔrɔn ma.

²⁰Kɔnɔ Arinyɛnitɔ-duguran le male la. Ma ye gbaranna mala kisilɛ Mari Yisa, Allata-Mɔgɔ-Yabɔnɛ la ko a ni na ka bɔ Arinyɛni tɔ.

²¹A si ma bagbu-rakolɔn kɛnu yɛlɛma ka anu ma iko a nyɛrɛ bagbu-sɛninyanɛ ye nya min. A si ata sɛnbɛ lawɔli alako a si fan bɛɛ don a nyɛrɛ fanka kɔrɔ nya min.