Read Kuranko Kɔlɔsi 2 Bible Online

Kɔlɔsi 2 - Kuranko bible

Kɔlɔsi 2

¹N bara wɔli-gbɛlɛmɛ min kɛ wobɛ Leyodisiya kɛnu ye, n ni wo lalɔn wo la. N bara tɔrɔ dɛnkɛninya-mɔgɛ donu ye minnu ma n yen bɛ.

²N ya wo ma le alako bɛɛ ni yisi-latɛgɛ sɔrɔn. Bɛɛ ni ma kelen na keninteyɛ rɔ. Bɛɛ ni lɔnni-kanbalinɛ sɔrɔn duk, woletɔ wo si Allata gbundu-koe lɔn. Kirasiti nyɛrɛ le gbundu-koe wo da-nyin la.

³Kɔnɔ ka tenbi wo la, Allata hɛnkili anubɛ ala lɔnnɛ bɛɛ dogonnɛ ale Yisa rɔ.

⁴Nba, n bi kɛ fɔla wo ye, wo kana sɔn, mɔgɔ-wo-mɔgɔ ni wo mayuwaya sɔsɔli-takolɔn fɛ, hali anu kusanyara kumala nya-wo-nya.

⁵Hali n bagbuyi sa wo fɛ, nna hɛnkili ye wo ko, ado n sewanɛ ka wo sɔnɛ yen dɛnkɛninyɛ rɔ wo nyɔgɔn fɛ Kirasiti rɔ.

⁶Nba, wo ara sɔn Yisa Kirasiti la min kɛ, ko a ni ma wo Mari la, wo ni to ala kumɛ birala wo nya.

⁷Wo ni wo suli layigi ale rɔ pon, iko kɔlɔma ye suli layigila dugi la nya min! Wo si a ma, wo si sɛnbɛ sɔrɔn ale rɔ. Wo sɛnbɛ ni don wola dɛnkɛninyɛ rɔ iko wo karanta nya min. Ka a tɛgɛ a ara min ma wo ye, wo ni to baraka birala a ye dɛɛ!

⁸Wo ni a ma wo fɛrɛma. Mɔgɔ-wo-mɔgɔ kana wo yanfa anuta kun-takolonya-karan fɛ ha wo ni ma yɔɔn la. Karan wo bɔnɛ mɔgɔya-kɛ-nya anubɛ duninya-nyina-kun-tiginu de tɔ. Yanfɛ wo sa bɔla Kirasiti bolo muk,

⁹ado Alla wara-koe-mumɛ-bɛɛ taranta Kirasiti le tɔ.

¹⁰Wo ara nimaya-kanbalinɛ sɔrɔn ale le tɔ. Ale le kolo nyina-kun-tiginu anubɛ sɛnbɛ-tiginu ko.

¹¹Wo ara kemininya-su-bɛrɛkɛ sɔrɔn Kirasiti rɔ, fɛrɛta-kemininya ma min na. Ale Yisa ya wo fɛrɛ-bɔnku-nata bɔ wo rɔ ata sayɛ fɛ iko kemininyɛ si do bɔ mɔgɔ fɛrɛ la nya min.

¹² Wo batasira tumɛ min, wo togonta Kirasiti fɛ. Wobɛ Kirasiti lawulita wo nyɔgɔn fɛ fanan batasilɛ rɔ bawo wo dɛnkɛninyanɛ ale Kirasiti le ma. Allata sɛnbɛ le ya a lawuli ka bɔ furinu tɛma.

¹³ Wole Kɔlɔsi kɛnu, wo faganɛ le fɔlɔ-nun, wo hakɛ bolo. Wo ma hɔrɔya bɛ ka bɔ wo gba-kɔrɛnu tɔ mumɛ! Alla ya wo hakɛ bɛɛ makoto lunyɛ min, a ya ni-kurɛ di wo ma Kirasiti rɔ wulɔn le.

¹⁴ Ma hakɛ minnu sɛbɛnɛ ma kan ma nun anubɛ ma kirinɛ tɔn minnu na, Alla ara wonu gbangban Yisata kɔlɔma ma ka anu ban feu!

¹⁵Nyina-kun-tiginuna sɛnbɛ wo, fanka-tiginuna sɛnbɛ wo, Kirasiti ya wo bɛɛ tinya kɔlɔma ma wulɔn le. A ya anu nayarabi ka a lagbɛ ko a ara anu nɔ feu!

¹⁶ Woletɔ wo kana sɔn, mɔgɔ-wo-mɔgɔ ni tɔn sigi wo ma tun wola dɔn-fen-koe anubɛ minni-fen-koe la. Hali tele-sɛnima-koe wo, karɛ-kura-koe wo, Sulen-Tele-koe wo, wo ara hɔrɔya tɔn wonu ma.

¹⁷Ninɛ le tɔn wo bɛɛ la dɔrɔn. A bɛrɛbɛrɛ le Kirasiti la.

¹⁸Wo kana sɔn, mɔgɔ-wo-mɔgɔ ni wo yiliki min bi a nyɛrɛ gbiliyala ko-rayen rɔ ka a famayigi foninyɛ rɔ. Wo kana don melika-bato-koe rɔ. Mɔgɔ sifa wo wasinɛ hadama-danta miriya le la fufafu!

¹⁹ Kirasiti min bi mɔgɛ bɛɛ kunyɛ la, anu tugunni ma wo la. Kirasiti bagbuyi bɛɛ belinɛ Alla baraka le tɔ. A kolo latugun tinɛnu anubɛ a fasɛnu denu bi a mala, ma bagbuyinu ni kiri anu nyɔgɔn na, ado ma bagbuyi ye koloyala iko a di Alla ye, a ni koloya nya min.

²⁰Wobɛ Kirasiti ara faga wo nyɔgɔn fɛ worɔ. Ale ya wo hɔrɔya ka wo bɔ nyina-kun-tiginu fanka kɔrɔ duninya kɛ rɔ. Nfenna worɔ, wo ye ko ladanna iko duninya kɛtɛ le wole la? Nfenna wo ye tɔn kɛ sufanu birala? Wo ye a fɔla ko—

²¹“I kana kɛ bi,” “I kana wo mafɛlɛn i nagan ma,” “I kana i tugu doi wo la.”

²²Tɔn kɛnu tɛgɛnɛ dɔn-fen anubɛ minni-fen-koenu denu ma. Wo wa ban anu dɔnna tumɛ min, a si ma iko fenfen sa nun. Hadama-danta miriya le wo la.

²³Nba, melika-batoe fɔrɔsɛ la wo, foninya-famayigiyɛ wo, nyɛrɛ-bagbuyi-tɔrɛ wo, tɔn wonu mani de iko hɛnkili ye anu tɔ kɔnɔ wonu ti ko-wo-ko nyinya bagbuyi-natanu-bira-koe rɔ.