Read Kuranko 1 Tɛsalonaika 2 Bible Online

1 Tɛsalonaika 2 - Kuranko bible

1 Tɛsalonaika 2

¹Ma na-kelen-nyɔgɛnu, wole nyɛrɛ ya a lɔn ko ma ara wati min nyɔgɔn kɛ wo fɛ, wo ma kɛ fu!

² Yanni ma ni ke wo ma Tɛsalonaika, Filipai kɛnu bara ma bira boloko-yogomɛ-kɛ. Mɔgɛnu ya ma lafɛya nyɔ kɔnɔ hali wo, mata Alla ya yisi-latɛgɛ di ma ma ko ma ni ata kibara-nyimɛ fɔ wo ye.

³Ma ya kibara-nyimɛ min nake, ma ma wo lake ka a tɛgɛ foninyɛ anubɛ ni-yogoyɛ ma. Ma ma ma raya ka mɔgɔ-wo-mɔgɔ yanfa.

⁴Iko Alla ara ma lakɔrɔsi nya min, a ye a fɛ, ma ni kibara-nyimɛ fɔ mɔgɛnu ye wo nya na le. A ya wɔlɛ wo bɛɛ kerifa ma la. Ma wa kuma, ma sa ma rayala ka mɔgɛnu hɛnɛ fɔ Alla min bi ma yisi lakɔrɔsila.

⁵Wo ya a lɔn serr, ko ma ma darɔ-diyɛ kɛ wo ye alako wo ni mala kumɛ bira. Ma sa bilala mɔgɔna-wodi fɛ, ado ma sa ma nyɛrɛ diyana-koenu kɛla dogɔn rɔ. Alla le ma sere la!

⁶Ma ma ma raya ka tɔgɛ sɔrɔn hadama-den wo hadama-den bolo, wole wo, mɔgɔ-gbɛrɛ wo.

⁷Kirasitita kilayɛ le male la. Sɛnbɛ ye ma bolo nun ka a lagbɛlɛya wo kuma. Kɔnɔ ma dinyanɛ tora wo fɛ iko musu-denbɛ si dinya ala dannu kɔrɔ nya min.

⁸Nba, ka a tɛgɛ mala keninteyɛla ko ma wole ye, ma rabɛnnɛ ka Allala kibara-nyimɛ lake wo ma hali ka ma nyɛrɛ niyi fanan sa wo kuma. Wo diyara ma ye kati!

⁹Ma na-kelen-nyɔgɛnu, wo hɛnkili ye mala wɔlɛ anubɛ mala nyagbɛ ko, yɔ! Ma tenbi Allala kibara-nyima-kawandili bɔla wo ye, ma tora wɔlila ma bole la su-ni-tele alako ma kana wo tɔrɔ.

¹⁰Ma siginɛ wo fɛ tumɛ min, ma sɛninyanɛ, ma telennɛ, fɛɛ ma taran ma la wole dɛnkɛninya-mɔgɛnu tɛma. Wo nyɛrɛ le wo sereyɛ la anubɛ Alla.

¹¹Wo ya a lɔn ko ma ya wo kelen-kelennamɛ-bɛɛ bira iko denbɛnu si anuna dannu bira nya min.

¹²Ma ya wo makawandi ko wo yisi ni kimɛ. Ma ya wo madiya ko wo ni tagama-nyimɛ kɛ ka Alla hɛnɛ, ado ale le ara wo kele ka wo ladon ata mansayɛ anubɛ ala gbiliyɛ rɔ.

¹³Ma ye baraka birala Alla ye tumɛ bɛɛ ko ma nara Allala kumɛ la wo ye tumɛ min, wo ya a lamɔɛn ka a bira a kilɛ fɛ. Wo ma a bira iko a bɔra mɔgɛ le bolo. Wo ya a bira iko Allata kumɛ, ado Allala kumɛ ye wɔlila wole dɛnkɛninya-mɔgɛnu burɔ hali kaka.

¹⁴ Ma na-kelen-nyɔgɛnu, koe minnu mara Allata mɔgɛnu na Yudiyanuna nyamanɛ rɔ, wo le wara ma wole fanan na. Wo ya tɔrɔya-su min sɔrɔn wo nyɛrɛta nyamanita-mɔgɛnu bolo, anu denu fanan ya wo sufa sɔrɔn Yahudiyanu bolo fɔlɔ-nun.

¹⁵ Wonu denu ya Mari Yisa faga anubɛ Allata nɛbinu. Anu ya male gben nyamanɛ wo burɔ. Anu sa Alla hɛnɛna ni, ado anu bi mɔgɛ bɛɛ kan ma!

¹⁶Anu bi anu tayala nun ka male lakala alako ma kana kisi-ko-kuma-kawandili bɔ sibolo-gbɛrɛnu ye. Anu bi hakɛ min kɛla tumɛ bɛɛ, wo dan-natenbi le, ado Allala fondo-bɔɛ ara a laban anu kuma!

¹⁷Ma na-kelen-nyɔgɛnu, hali ma bɔnɛ wo fɛ wati-ni kɔrɔ, wo yen-sɔgɛ ye ma la bɛrɛkɛ! Hali ma sa wo fɛ, ma ye wo fɛ ma yisi rɔ, ado ma ya ma raya ko ma ni wo yen tun, yɔ!

¹⁸Wo sɔgɛ ya ma bira kati! Nde, Pɔli ya n taya sɛgi-koe ma wo wara. A ma dan kinyama kelen ma kɔnɔ Setanɛ ya kilɛ tɛgɛ ma ma.

¹⁹Wole Tɛsalonaika kɛnu, ma yigi anubɛ mala sewɛ le wole la. Mari Yisa wa na tumɛ min, ma si wasi wole rɔ iko mɔgɔ wa mansaya-fulɛ don ma kunyɛ la.

²⁰Ɔnde, wole le si a ma, n ni wasi wo rɔ ka nyagalen!