Read Kuranko 1 Tɛsalonaika 3 Bible Online

1 Tɛsalonaika 3 - Kuranko bible

1 Tɛsalonaika 3

¹ A laban, a ma kun ma rɔ tun, ma ya a latɛgɛ ko ma ni to ma dan na Atɛn soe burɔ

²ka ma na-kelen-nyɔgɛ Timoti lata wo ma. Mabɛ ale ye wɔlila ma nyɔgɔn fɛ Alla ye ka Kirasitita kibara-nyimɛ-kawandilɛ bɔ. Ma ya Timoti lata wo ma alako wo ni wo sɛbɛ don wola dɛnkɛninyɛ ma.

³Ma ya wo ma alako wo fenfen kana sɛgi wo kɔma tun nyagbɛ kɛnuna ko la. Wole nyɛrɛ ya a lɔn ko fɔ ma ni nyagbɛ kɛnu tayen iko Alla sako ye nya min.

⁴Hali ma taranta wo fɛ tumɛ min, ma ya a fɔ wo ye ko fɔ ma ni tɔrɔyɛ sɔrɔn, ado ma tɔrɔta iko wo ya a lɔn nya min!

⁵Wo le ya a to, n ma ke a birala n tɔ tun. N ya Timoti lata wo ma alako a ni wola dɛnkɛninyɛ ragbɛ. N kilannɛ nun ko Setanɛ ara wo yakɔrɔ-mamɔ ka mala wɔlɛ bɛɛ ma fuyi la!

⁶ Dɛnkɛninyɛ ye wo bolo nya min wo, keninteyɛ ye wo bolo nya min wo, Timoti ara na wo lake ma ma. A ara a fɔ ma ye ko miriya-nyimɛ ye wo bolo ka a bɛn ma ma, ado iko ma yen-sɔgɛ ye wo la nya min, wo yen-sɔgɛ ye male fanan na wo nya na le.

⁷Woletɔ ma na-kelen-nyɔgɛnu, hali mala tɔrɔyɛ anubɛ mala nyagbɛ kolo, wola dɛnkɛninyɛ ya ma sɛnbɛ don.

⁸Wo sɔni tora Marila ko la min kɛ, wo ara ma yisi sa buda!

⁹Nba, kaka ma ye baraka birala Alla ye wolela ko la. Ma ye baraka birala a ye sewɛ wola ko la min bi male rɔ. Ma sɛwanɛ mata Alla yala ka a tɛgɛ wole ma.

¹⁰Su-ni-tele, ma ye a matarala ma yisi bɛɛ la alako a ni sɔn ma ni wo yen tun. Wo kɔma fanan, ni ma nara wo wara, wo makoe ye min na dɛnkɛninyɛ rɔ, ma ni wo dɛnbɛ wola ko la.

¹¹Alamɛ ma Fa Alla anubɛ ma Mari Yisa ya kilɛ rabɛn ma ye ka na ke wo ma!

¹²Alamɛ Mari ya wola keninteyɛ lakoloya wo nyɔgɔn ye anubɛ mɔgɛ bɛɛ ye dɛɛ! A ni to a lakoloyala iko matɛ koloyanɛ wole wara la nya min.

¹³Alamɛ wo yisi ragbɛlɛyara alako ma Mari Yisa anubɛ ata mɔgɔ-sɛnimɛnu[1] ba na tumɛ min, wo sɛninyanɛ ni taran ma Fa Alla yala.