Read Kuranko Yasowa 1 Bible Online

Yasowa 1 - Kuranko bible

Yasowa 1

¹Mari Allata wɔli-kɛla Nɛbi Musa fagara tumɛ min, Nunna den Yasowa min bi ale dɛnbɛna nun, wo sigira a gbɛ rɔ. Nɛbi Musa fagara tumɛ min, Mari kumara Yasowa ye ko,

²“Nna wɔli-kɛla Musa ara so-sɛgi-kɛ nyina. Wobɛ Isirɛla mɔgɛnu ni wo rabɛn kaka ka Yorodan bɛ kɛ tɛgɛ. N bi nala nyamanɛ min dila wo ma, wo ni ta wo rɔ.

³ Ka a dabira dugula wulɛ rɔ, ha ka ta ke kantɔ Lɛbanan kɔnkɛnu ma, ha ka ke Hɛti nyamanɛ rɔ ka a dabira Yufereti ba-belebele ma tele-bɔɛ wara la ka ke kɔgɔ-yi ma tele-yigi wara la, wo wa wo kian sɔ kan-bo-kan, n si nyɔ bɛɛ di wo ma. N si a di wo ma iko n ya lanyiri kiri Musa ye nya min.

⁵ Mɔgɔ-wo-mɔgɔ ti ile, Yasowa nɔ i siyi-tele-bɛɛ rɔ. N tora Musa fɛ nya min, n si to ile fanan fɛ wo nya na le. N si to i fɛ tuma-wo-tuma. N ti i boloka dɛɛ!

⁶ I ni i yisi gbɛlɛya ka i kerinteya. I si sɔ mɔgɛnu yarɔ ka ma anuna kɛlɛ-den-kun-tigi la. N ya nyamanɛ min di wo benbanu ma, i si mɔgɛnu gben nyɔ rɔ.

⁷I ni i yisi gbɛlɛya ka i wakila. I ni nna kumɛ bira iko n ya tɔnnu fɔ Musa ye nya min. Hali tɔn kelen, i kana nyina wo ko. I wa ta kan-bo-kan wo rɔ, n si to i fɛ ka i wara-koe sabati.

⁸I ni i miri nta tɔnnu ma ka i hɛnkili to wonu ko su-ni-tele. Minnu sɛbɛnɛ tɔn kɛ rɔ, i ni a ma i fɛrɛma wo bɛɛla ko la. Ni i ya wo ma, i wara-koe si sabati.

⁹N ma a fɔ i ye fɔlɔ nun ko i ni i yisi ragbɛlɛya ka i kerinteya, wa? I kana kilan, i yisi kana tinya. I tara kan-bo-kan, nde, ita Mari Alla si to i fɛ nyɔ.”

¹⁰Yasowa ya a fɔ kun-tiginu ye ko anu ni ta kumɛ kɛ latenbi mɔgɛnu ma ko,

¹¹“Wo ni dɔn-fannu tabɛn. A tele sawa nyɔgɛ ma, wo si wuli ka Yorodan bɛ tɛgɛ. Mata Mari Alla ya nyamanɛ min di ma ma, ma ni ta nyɔ rɔ.”

¹²Isirɛla bɔnsɔn minnu tɔgɛ Rubɛn, Kadi, ani Manasa bɔnsɔn-talɛ, Yasowa ya a fɔ wonu ye ko,

¹³“Nɛbi Musa ya kumɛ min fɔ wo ye nun, wo ni wo hɛnkili to wo ko, ko Mari si nyamanɛ kɛ di wo ma.

¹⁴Wola musinu, wola dannu, anubɛ wola kolo-fannu, wonu si to yan. Kɔnɔ wola kɛlɛ-dannu si ta Isirɛla bɔnsɔn toenu yarɔ Yorodan bɛ kɔma

¹⁵ ha anu ni anuta nyamanɛ sɔrɔn yisi-kimɛ rɔ. Wo kɔma, wo ni sɛgi wo warɛ Yorodan bɛ kɔma yan.”

¹⁶Anu ya Yasowa yabi ko, “I wara koe min bɛɛ fɔ ma ye, ma si wo bɛɛ ma. I wa ma lata kan min, ma si ta nyɔ,

¹⁷ado ma si ila kumɛ bira iko ma ya Nɛbi Musatɛ bira nya min. Mari Alla ni to i fɛ iko a tora ale fɛ nya min nun.

¹⁸Ni mɔgɔ-wo-mɔgɔ ya ila kumɛ masɔsɔ wo, ni a ya a kalabanteya wo, wo tigi si faga. Kɔnɔ i ni i yisi ragbɛlɛya ka i kerinteya.”