Read Kuranko Yasowa 11 Bible Online

Yasowa 11 - Kuranko bible

Yasowa 11

¹Kɛlɛ min mara dugula wara la, Hesɔ Mansa Yebin ya wo wara-koe lamɔɛn tumɛ min, a ya kilaya-lakalamɛ lata a dafɛ-mansɛnu ma ko anu ni anu nadɛn Isirɛla mɔgɛnu kɛlɛ-koe la. Kilayɛ wo kera mansɛ kɛnu ma, Medon mansɛ min tɔgɛ Yobabu, anubɛ Simirɔn mansɛnu anubɛ Akisafu mansɛnu anubɛ mansɛ minnu bi kantɔ-kɔnkɔ-nyamanɛ rɔ anubɛ mansɛ minnu bi Yorodan lɛɛ Kalili dalɛ dugula Dɔɔ soe tɔgɔfɛ. Kumɛ wo kera Kenan mansɛnu ma minnu bi Yorodan bɛ tɔnkɔn filɛ bɛɛ rɔ anubɛ Amora mansɛnu anubɛ Hɛti mansɛnu anubɛ Perasa mansɛnu anubɛ Yebusi mansɛnu minnu bi kɔnkɔ-gburukulinu kuma anubɛ Hefa mansɛnu minnu siginɛ Hɛrɔman kɔnkɔ-wɛ kɔrɔ Misipa nyamanɛ rɔ.

⁴Mansa-siyamɛ wonu nara anuta kɛlɛ-dannu na anu bolo min dan ti ban lɔnna. Anu nara anuna kirindinu na anu bolo.

⁵Mansɛ wo dama ya anu daga makɛ Mɛrɔm yi dafɛ Isirɛla mɔgɛnu faga-koe la.

⁶Mari ya a fɔ Yasowa ye ko, “I kana kilan mɔgɛ kɛnu na. N si mɔgɛ kɛnu don wo bolo. Yanni kɛ-nyɔgɔn-tumɛ sina, anu bɛɛ si faga. Wo ni anuna soeenu kin-kɔma-fasɛnu natɛgɛ ka anuna kirindinu mintan.”

⁷Woletɔ Yasowa anubɛ ala kɛlɛ-dannu tara ka anu natɛrɛna anu kɛlɛ tinɛ Mɛrɔm yi dafɛ.

⁸Mari ya mɔgɛ wo bɛɛ don Isirɛla mɔgɛnu bolo. Anu ya anu bɛɛ gben ha ka ke Saidon soe burɔ anubɛ Misirofa-Maim ha ka ke Misipa lɛɛ rɔ tele-bɔɛ wara la. Mɔgɔ-wo-mɔgɔ ma to a niyi la. Anu ya anu bɛɛsi faga.

⁹Yasowa ya a ma iko Mari ya a fɔ a ye nya min ka anuna soeenu kin-kɔma-fasɛnu natɛgɛ ka anuna kirindinu mintan.

¹⁰Yasowa anubɛ ala mɔgɛnu sɛgimatoe tumɛ min, anu ya Hesɔ mansɛ bira ka a faga. (Hesɔ, mansa-soe le wo la nun.)

¹¹Anu ya soe wo mɔgɛ bɛɛsi faga ka so-kun kelan wo mintan gburr!

¹²Anu ya nyamanɛ wo bɛɛ tinya ka a mansɛ wo bɛɛ bira ka anu faga iko Nɛbi Musa ya a fɔ anu ye nya min fɔlɔn.

¹³Kɔnɔ Yasowa ma so-wo-so mintan min sɔnɛ gburukulinu kuma fɔ Hesɔ soe kɛ kelen pe.

¹⁴Isirɛla mɔgɛnu ya fen-nyimɛ bɛɛ bi anu nyɛrɛ ye anubɛ kolo-fannu kɔnɔ anu ya nyɔ-mɔgɛ bɛɛ faga.

¹⁵Mari ya min bɛɛsi fɔ Musa ye, Musa ara wo bɛɛ fɔ Yasowa ye nun. Yasowa ya wo bɛɛ bira iko Mari ya a fɔ Musa ye nya min.

¹⁶Yasowa ya nyamanɛ wo bɛɛ bira, dugula-nyamanɛ wo, kantɔ-nyamanɛ wo, kɔnkɔ-nyamanɛ wo, gburukuli minnu bi tele-yigi waralɛ wo, Kosɛn nyamanɛ wo, anubɛ Yorodan bɛ dafɛ-nyamanɛ bɛɛ.

¹⁷Ka a dabira Halaka kɔnkɛ ma dugu la Idɔm soe da kɔrɔ, ha ka ta ke Beyali-Kadi soe ma kantɔ Lɛbanan lɛɛ rɔ Hɛrɔman kɔnkɛ kɔrɔ, Yasowa ya wo bɛɛ nɔ.

¹⁸Yasowa mɛra wo mansɛnu kɛlɛla wati-yan kɔrɔ kɔnɔ a ya anu bɛɛsi bira ka anu damasi faga,

¹⁹fɔ so kelen pe minnubɛ Yasowa sarata yisi-kimɛ ma anu nyɔgɔn tɛma. Wo le Kibiyon soe, Hefa bɔnsɔn-mɔgɛ donu siginɛ kan min.

²⁰ Mari ya Isirɛla yogenu yisi gbɛlɛya alako anu ni Isirɛla mɔgɛnu kɛlɛ. Wo le ya a ma, Isirɛla mɔgɛnu si anu bira ka anu nato dogbe! Anu ma anu buri anu kɔrɔ. Mari ya a fɔ Musa ye nun ko anu kana kinikini anu fenfen ma.

²¹Wo wati rɔ, Anakim bɔnsɔn-[17] mɔgɛ minnu siginɛ kɔnkɔ-nyamanɛ rɔ Hiburɔn soe burɔ wo, Diba soe burɔ wo, Anaba soe burɔ wo, Yudata nyamanɛ rɔ wo, anubɛ Isirɛla kɔnkɔ-nyamanɛ mumɛ damasi rɔ, Yasowa ya wonu siyaman faga.

²²Yasowa ya kɛlɛ kɛ kan min, Anakim bɔnsɔn-mɔgɛ bɛɛ fagara nyɔnu tɔ. Kɔnɔ donu tora Kesa soe burɔ anubɛ Kati soe burɔ anubɛ Asadadi soe burɔ bawo kɛlɛ ma ke wɛ nyɔ.

²³Yasowa ya nyamanɛ wo bɛɛ bira-a-la iko Mari ya a fɔ Musa ye nya min nun. Yasowa ya nyamanɛ wo bɛɛ ratala Isirɛla kebilɛnu na. Wo kɔma, anu ya anu sulen kɛlɛ-kɛ ma.