Read Kuranko Yasowa 14 Bible Online

Yasowa 14 - Kuranko bible

Yasowa 14

¹Yasowa anubɛ Saraka-Masɔla-Kun-Tigi-Wɛ Ɛliyasa anubɛ Isirɛla bɔnsɔn kebila-kun-tigi, wonu ya Kenan nyamanɛ fara Isirɛla mɔgɛnu tɛma ka le.

² Nyamanɛ min bi Yorodan bɛ anubɛ kɔgɔ-yi tɛma, anu ya wo ratala koron-nakɛ fɛ bɔnsɔn kɔnɔntɔ anubɛ a talɛ tɛma iko a di Mari ye nya min.

³ Nyamanɛ min bi Yorodan bɛ kɔma tele-bɔɛ wara la, Musa ya wo di bɔnsɔn fila anubɛ a talɛ ma fɔlɔn.

⁴Yusufu bɔnsɔn fanan farata bɔnsɔn fila la, Ifɛrɛm anubɛ Manasa. Musa ma nyamani-fenfen di Lifayi bɔnsɔn ma, fɔ kan-tina-kundunɛnu anuna kolo-fannu si anu de-nyini kan min anubɛ soe donu anu si sigi kan min.

⁵Isirɛla mɔgɛnu ya wo nyamanɛ ratala anu nyɔgɔn tɛma iko Mari ya a fɔ Musa ye nya min.

⁶ Yuda bɔnsɔn-mɔgɛ donu nara Yasowa wara Kiligali. Kelabu min bɔra Kɛnasi bɔnsɔn rɔ (a fa tɔgɛ le Yɛfunɛ), wo ya a fɔ Yasowa ye ko, “Mari ya min fɔ Musa ye male mɔgɔ filɛla ko la wo tumɛ ma ye Kɛdɛsi-Baniya, i ya wo lɔn.

⁷ Marila wɔli-kɛla, Nɛbi Musa ye ma latala tumɛ min ka Kenan nyamanɛ mafɛlɛn, n sɔrɔn ara san bi-nani bɔ wo wati rɔ. Ma nara ka ma dantɛgɛ Nɛbi Musa ye iko ma ya nyamanɛ wo yen nya min.

⁸Mabɛ n ta-nyɔgɛ minnu tara, wonu ko ma ti mɔgɛ wonu nɔ. Wonu ya a ma, Isirɛla mɔgɛnu kilanta. Kɔnɔ male ya Marila kumɛ bira.

⁹ Woletɔ Nɛbi Musa ya lanyiri kiri n ye ko n tagamanta nyamanɛ min bɛɛ rɔ, wo si ma malebɛ nna dannutɛ la.

¹⁰“Mari ye lanyiri kɛ kirila Nɛbi Musa ye wati min, ma ye yilan-yilanna wo wati rɔ nun. N sɔrɔn ara san bi-nani bɔ wo wati rɔ nun. Ka a bi wo wati ma ha ka ke kaka ma, san bi-nani ani san loli (45) ara sa wo kuma. Kaka, n bara san bi-segin ani san loli (85) bɔ,

¹¹n kɛndɛ kɛn kɛlɛ-kɛ-tinɛ iko Nɛbi Musa ye n natala wati min ka Kenan nyamanɛ mafɛlɛn.

¹²Awa, i ni kɔnkɔ-nyamanɛ kɛ di n ma iko Mari ya lanyiri kiri n ye nya min. Ma ya ma dantɛgɛ tumɛ min, ma ya a fɔ ko mɔgɔ-kinama-wɛnu bi nyɔ. (Anaki bɔnsɔn le kɛnu na.) Anu siginɛ so-wɛnu tɔ minnu nafoonɛ tarɛ la. Kɔnɔ kaka, ni Mari ye n fɛ, n si mɔgɛ kɛnu gben nyamanɛ kɛ rɔ.”

¹³Yasowa duwara Kelabu ye ka Hiburɔn soe di a ma. Soe wo ye ala dannu bolo ha bi[21] bawo Kelabu bilara Isirɛlata Mari Alla fɛ.

¹⁵Yanni soe wo ni di Kelabu ma wati min, a tɔgɛ le nun Araba. Araba, kɛmɔgɔ-ba le wo la nun Anakim mɔgɛnu tɛma min tɔgɛ sara soe wo kuma. Nba, wo kɔma, nyamanɛ wo taranta yisi-kimɛ rɔ.