Read Kuranko Yasowa 18 Bible Online

Yasowa 18 - Kuranko bible

Yasowa 18

¹Anu banta kɛlɛ kɛla wati min, Isirɛla mɔgɛ bɛɛsi nara Sailo. Saraka-masɔlɛnu anubɛ anu madɛnbɛnɛnu ya Marita Fani-Bɔn sɔ nyɔ.

²Kɔnɔ Isirɛla bɔnsɔn wɔrɔnfilɛ ma anuta nyamanɛ sɔrɔn bɛ wo wati rɔ.

³Yasowa ya a fɔ Isirɛla mɔgɛnu ye ko, “Mata Mari Alla ya nyamanɛ min di wo ma, nfenna wo ma ta ka wo bi ka a ma wotɛ la?

⁴Yuda ya atɛ sɔrɔn nun dugu la Dalɛ Faganɛ[25] dafɛ, ado Yusufu bɔnsɔn fanan ya anutɛ sɔrɔn kantɔ Yorodan bɛ dafɛ. Awa kaka, wo ni mɔgɔ sawa yabɔ ka bɔ bɔnsɔn wɔrɔnfila toe wo kelen-kelennamɛ-bɛɛ rɔ. Anu ni na n bara. Nde si anu nata worɔ ka nyamanɛ wo mafɛlɛn ka nyamanɛ wo suman.

⁶Anu ba ban nyamanɛ wo sumanna tumɛ min, anu ni a rafara sigi-tina wɔrɔnfila la ka a sɛbɛ ka na wo dantɛgɛlɛ la n ma. N si nyamanɛ wo rafara ka mata Mari sako lɔn koron-nakɛ fɛ. Bɔnsɔn bɛɛ si atɛ sɔrɔn wo fɛ.

⁷Lifayi bɔnsɔn ma nyamanɛ fenfen sɔrɔn bawo Marila saraka-masɔlɛ le anu denu na. Kadi, Rubɛn, anubɛ Manasa bɔnsɔn-talɛ, wonu bara anutɛ sɔrɔn nun Yorodan bɛ kɔma tele-bɔɛ wara la iko Nɛbi Musa ya a di anu ma nya min.”

⁸Woletɔ mɔgɛ wonu tara ka nyamanɛ wo ratagama. Anu banta a ratagamana tumɛ min, anu nara ka anu dantɛgɛ Yasowa ye. Anu ya nyamanɛ wo rafara sigi-tina wɔrɔnfila la ka wo bɛɛ sɛbɛ iko anu bɔnsɔn ye nya min. Anu ya soe wo bɛɛ tɔgɛ sɛbɛ ka na wo la Yasowa wara Sailo soe rɔ.

¹⁰Yasowa ya nyamanɛ wo ratala bɔnsɔn wɔrɔnfilɛ wonu na koron-nakɛ fɛ iko a di Mari ye nya min.

¹¹Bɔnsɔn-to wɔrɔnfilɛ min tora, Bɛnyamɛ bɔnsɔn-mɔgɛnu fɔlɔn ya anuta nyamanɛ sɔrɔn. Anuta nyamanɛ tora Yuda bɔnsɔn anubɛ Yusufula dan Ifɛrɛmta nyamanɛ tɛma.

¹²Anuna dan ya a dabira Yorodan bɛ ma kantɔ ha ka ke kɔnkɔ-kerikerinya ma min bi Yɛrikɔ kantɔ. Wo le tara ha tele yigi ka tenbi kɔnkɔ-nyamanɛ la ha ka ke wulɛ ma Bɛti-Efɛn soe dafɛ.

¹³Ka bɔ nyɔ, dan wo le tara fanan ka ke kɔnkɔ-kerikerinya ma min bi Lusi soe dugu la (min tɔgɛ fanan Bɛtɛli). A yigira a ma ka ta ke ha Ataroti-Ada soe ma min bi kɔnkɛ kuma Bɛti-Hɔrɔn soe dafɛ.

¹⁴Ka bɔ Ataroti-Ada soe ma, dan wo tara dugu la ha ka ke Kiriyati-Beyali soe ma (min tɔgɛ fanan Kiriyati-Yirɔm) min bi Yuda bɔnsɔn bolo. Bɛnyamɛta nyamanɛ-dan le wo la min bi tele-yigi wara la.

¹⁵Ala dugula dan ya a dabira Kiriyati-Yirɔm soe ma ha ka ta ke Nɛfatowa tenkenu ma.

¹⁶Dan wo le yigira tun kɔnkɛ kɔrɔ min yɛ layiginɛ Hinom lɛɛ ma min bi Rɛfayim folo-kunyɛ la. Ka bɔ nyɔ, a tara dugu la ka tenbi Hinom lɛɛ la ka ta ke kɔnkɔ-bolɔn do ma min bi Yerusalɛm soe kantɔ ha ka ta ke Ɛnrogɛli tenke ma.

¹⁷Dan wo le tara kantɔ Ɛnsimɛsi tenke wara la ka ta ke Kɛlailoti soe ma min bi Adumim kɔnkɔ gbɛrɛn kilɛ kan kɔma. Dan wo le yigira tun ha Bohan kuru-gbui ma (Bohan, Rubɛnla dan le wo la min tɔgɛ sara kuru-gbui wo kuma).

¹⁸Dan wo le tenbira kɔnkɔ-bolɔn do la kantɔ min yɛ layiginɛ Yorodan-ba-lɛɛ ma.

¹⁹Dan wo le yigira dugu la tun ka ta tenbi Bɛti-Hɔgala kɔnkɔ-bolɔn la, kantɔ-wara la. Nyɔ-dugula dan danta Yorodan bɛ labilɛ Dalɛ Faganɛ[26] ma.

²⁰Yorodan bɛ mara Bɛnyamɛta nyamanɛ-dan la tele-bɔɛ wara la.

²¹Soe minnu dira Bɛnyamɛ bɔnsɔn ma, wo le kɛnu na, Yɛrikɔ, Bɛti-Hɔgala, Ɛmɛki-Kisisi,

²²Bɛti-Araba, Sɛmareyim, Bɛtɛli,

²³Afim, Para, Ɔfara,

²⁴Kifarahamoni, Ɔfɔni, anubɛ Kiba. Wo bɛɛsi lakofunɛ so tan-ni-fila, anu dafɛ-so-nɛnu bɔnɛ a la.

²⁵Kibiyon, Rema, Birɔti,

²⁶Misipa, Kɛfira, Mosa,

²⁷Rɛkɛm, Ɛrɛpili, Tarala,

²⁸Sila, Ilɛfi, Yebusi (min tɔgɛ fanan Yerusalɛm), Kibiya, anubɛ Kiriyati-Yirɔm soe wonu fanan dira Bɛnyamɛ bɔnsɔn-mɔgɛnu ma. Wo damasi lakofunɛ so tan-ni-nani, anu dafɛ-so-nɛnu bɔnɛ a la.