Read Kuranko Yasowa 20 Bible Online

Yasowa 20 - Kuranko bible

Yasowa 20

¹Mari ya a fɔ Yasowa ye ko, “I ni a fɔ Isirɛla mɔgɛnu ye ko anu ni soe donu yabɔ mɔgɛnu si kisi kan min iko n ya a fɔ Nɛbi Musa ye nya min fɔlɔn.

³Ni mɔgɛ do ya a ta-nyɔgɛ do faga, a ma min nawuli a ma, a ni a nyɛrɛ maburi ka ta soe wo do rɔ woletɔ a si kisi. Ni wo ma, furi wota mɔgɛnu si a tayili sara.

⁴“A wa a buri tumɛ min ka ta ke soe wo don-dɛ ma, anu si kiti tɛgɛ kan min, a ni koe wo bɛɛ rakaran mɔgɔ-banu ye nyɔ. Wonu si a fɛsɛfɛsɛ worɔ ni a si don soe burɔ. Anu ni kan tinɛ do di a ma a si a sigi kan min.

⁵Ni mɔgɛnu nara a sagaranna, mɔgɛ minnu bi soe wo burɔ, anu kana kei wo don anu bolo bawo kei wo ma a faga-koe lawuli a ma diminyɛ bolo.

⁶Mɔgɛ wo min ya mɔgɔ-fagɛ kɛ, wo ni to lakisi-soe wo burɔ ha a kiti ni tɛgɛ soe-mɔgɛ bɛɛ yala. Ni a ya yo sɔrɔn, anu ni a to lakisi-soe wo burɔ ha kiti tɛgɛra Saraka-Masɔla-Kun-Tigi minta wati rɔ, wo ni faga tumɛ min. Wo kɔma, a si sɛgi a wara soe rɔ.”

⁷Anu ya lakisi-soe minnu yabɔ tele-yigi wara la mɔgɛ si kisi kan min, wo le Kidɛsi la, Nafatalita kɔnkɔ-nyamanɛ rɔ anubɛ Sɛkɛm min bi Ifɛrɛmta kɔnkɔ-nyamanɛ rɔ anubɛ Hiburɔn min bi Yudata nyamanɛ rɔ.

⁸Anu ya lakisi-soe minnu yabɔ Yorodan bɛ kɔma tele-bɔɛ wara la, wo le Bisa, Rubɛnta nyamanɛ rɔ wulɛ rɔ anubɛ Ramɔti min bi Kaliyadi nyamanɛ rɔ Kadita nyamanɛ rɔ anubɛ Kolan min bi Manasata nyamanɛ rɔ Basan nyamani-kɔrɛ rɔ.

⁹ Isirɛla mɔgɛnu ya soe kɛnu yabɔ alako anubɛ sundannu si kisi kan min. Ni mɔgɔ-wo-mɔgɔ ya mɔgɔ faga, a ma min nawuli a ma, a ni ta soe wo do rɔ. A sagarannɛ ti ko ma a la nyɔ rɔ. Anu ti a faga fɔ a wa yiliki sɔrɔn wati min.