Read Kuranko Yasowa 22 Bible Online

Yasowa 22 - Kuranko bible

Yasowa 22

¹Yasowa ya Rubɛn bɔnsɔn anubɛ Kadi bɔnsɔn anubɛ Manasa bɔnsɔn-talɛ kele.

² A ya a fɔ anu ye ko, “Wo ara Marita wɔli-kɛlɛ Nɛbi Musala kumɛ bɛɛ bira nya min nun, wo ya nta kumɛ fanan bira ka n gbiliya wo nya le.

³Wo ya wo wakila ka to wo na-kelen-nyɔgɛnu fɛ iko wo sarata a ma nya min fɔlɔn. Wo ara mɛ wo munyula wo bɛɛ ma iko wota Mari Alla ya a fɔ wo ye nya min.

⁴Wota Mari Alla ya lafɛrɛ di wo na-kelen-nyɔgɛ Isirɛla mɔgɛnu ma iko a ya lanyiri kiri anu ye nya min. Woletɔ wo ni sɛgi wola nyamanɛ rɔ Yorodan bɛ kɔma tele-bɔɛ wara la Nɛbi Musa ya min di wo ma.

⁵Wo ni Marila tɔn bɛɛsi bira ka lanayɛ kɛ a ye ka a bato wo yisi bɛɛ la iko Nɛbi Musa ya a fɔ wo ye nya min. Wo ni wola Mari Alla keni wo yisi bɛɛ la.”

⁶Yasowa duwara anu ye ka anu nata anu barɛ.

⁷A ya a fɔ anu ye ko, “Wo nɔnfulu-tigi le ye tala gbɛ wo warɛ bawo wo ya fen-siyaman sɔrɔn wo yogenu na, kolo-fan wo, wodi-gbɛ wo, sɛnɛ wo, nɛgɛ wo, silɛɛ wo, anubɛ kura-siyaman. Wo ta a tala wobɛ wo na-kelen-nyɔgɛnu tɛma.”

⁹Rubɛn bɔnsɔn anubɛ Kadi bɔnsɔn anubɛ Manasa bɔnsɔn-talɛ tara anu barɛ Kaliyadi nyamanɛ rɔ Yorodan bɛ kɔma tele-bɔɛ wara la. Anu ya anu ta-nyɔgɛ Isirɛla mɔgɛnu to Sailo.

¹⁰Rubɛn bɔnsɔn anubɛ Kadi bɔnsɔn anubɛ Manasa bɔnsɔn-talɛ ye sɛgila anu barɛ tumɛ min, yanni anu ni ke Yorodan bɛ ma tele-yigi wara la, anu ya saraka-mintan-tinɛ sɔ Keliloti soe[27] burɔ Yorodan bɛ da kɔrɔ. Saraka mintan tinɛ wo kolo, ado a mafɛlan kin. Wo kɔma, anu ya bɛ tɛgɛ ka ta Kaliyadi nyamanɛ rɔ.

¹¹Kɔnɔ Isirɛla mɔgɛ toenu ya a lamɔɛn tumɛ min ko anu ta-nyɔgɛnu bara saraka-mintan-tinɛ ladan, anu ya anu nyɔgɔn nadɛn Sailo soe burɔ ka ta anu ta-nyɔgɛnu kan ma.

¹³Kɔnɔ yanni kɛlɛ-dannu ni ta anu kɛlɛ tinɛ, anu ya Saraka-Masɔla Ɛliyasala den Finihasi lata Kaliyadi nyamanɛ rɔ, Rubɛn bɔnsɔn anubɛ Kadi bɔnsɔn anubɛ Manasa bɔnsɔn-talɛ ma. Anu ya mɔgɔ kelen-kelen yabɔ bɔnsɔn tan wo bɛɛ rɔ ka bila Finihasi fɛ Kaliyadi.

¹⁵ Anu kera Kaliyadi nyamanɛ rɔ Rubɛn bɔnsɔn anubɛ Kadi bɔnsɔn anubɛ Manasa bɔnsɔn-talɛ warɛ tumɛ min, anu ya a fɔ anu ye ko, “Nfenna wo ara kɛ nyɔgɔn ko-yogomɛ ma ma benba Isirɛlata Alla la ka saraka-mintan-tinɛ ladan wo nyɛrɛ ma? Wo ye bilala Mari fɛ tun, ba?

¹⁷ Wo ara hakɛ min kɛ kɛ, wo mani de iko ma ya hakɛ min kɛ Piyɔri soe burɔ tumɛ min, Mari ya ma tɔrɔya kiraya-fitinɛ la. Ha bi, ma ye tɔrɔla wo sufa hakɛla ko la. Ha kaka, wo ye a fɛ ka hakɛ wo sufa kɛ tun, ba?

¹⁸Wo ye a fɛ ka wo kan-kɔ sɔ Mari la kaka, wa? Ni wo ya wo ma, wati do si na a si diminya ma dama ma.

¹⁹Kɔnɔ ni wola nyamanɛ tinyanɛ, wo ni bɛ tɛgɛ ka na ma warɛ kelenna bawo mata Mari Allala saraka-mintan-tina-bɛrɛ ye ma warɛ. Yanni wo ni saraka-mintan-tinɛ sɔ wo nyɛrɛ ma min si ma dama ma hakɛ-tiginu na, wo ni na mata nyamanɛ rɔ. Ma si kan tinɛ do di wo ma wo si sigi kan min.

²⁰ Ekan ya hakɛ min kɛ, wo ara nyina wo ko, wa? A ya Marila kumɛ tinya ka fan donu kankan anu bɛnnɛ ka minnu di Mari ma. Ekan kelen pe ma faga hakɛ wola ko la. Isirɛla mɔgɛ bɛɛ tɔrɔta kankanyɛ wola ko la.”

²¹Rubɛn bɔnsɔn anubɛ Kadi bɔnsɔn, anubɛ Manasa bɔnsɔn-talɛ ya Isirɛla bɔnsɔn kebila-kun-tiginu yabi ko,

²²“Mata Mari Sɛnbɛ-Bɛɛ-Tigi, ma ya wo lɔn. Ma ya min ma, Mari ya wo lɔn, ado ma ye a fɛ, wole fanan ni wo lɔn. Ma ma kɛ ma ka murutiya Mari ma. Ni ma murutiyara Mari ma ka ma kan-kɔ sɔ a la, nba, wo na ma faga gbɛ!

²³Ni ma ya Marila kumɛ tinya ka saraka-mintan-tinɛ sɔ ka mata sarakɛ bɔ a kuma, Mari ni ma halaki.

²⁴“Ma ya wo ma bawo ma sa a fɛ, wola dannu ni a fɔ mala dannu ma tumɛ do ko, ‘Mata Mari Alla, wota Mari ma wo la.’ Wola dannu kana a fɔ tun ko, ‘Mari ya Yorodan bɛ ma dan la ma tɛma alako ma kana ke ma nyɔgɔn ma wona tun, wole Rubɛn anubɛ Kadi bɔnsɔn-mɔgɛnu na, kɔni.’ Anu kana a fɔ tun ko, ‘Wota ko sa mata Mari Allata koe rɔ.’ Woletɔ sinan-ko wo bɔnsɔn-natoe kana mala dannu nasɛgi Mari bato-koe ma.

²⁶“Woletɔ ma ya saraka-mintan-tinɛ kɛ sɔ ka ma misalɛ la wola dannu anubɛ mata dannu ye. Ma si Mari bato ma nyɔgɔn fɛ ka mala sarakɛ bɛɛ bɔ Marita Fani-Bɔn la kan-tina-kelen. Wola dannu kana a fɔ mala dannu ma ko, ‘Mata Mari, wota Mari Alla ma.’

²⁸“Kɔnɔ ni wola dannu ya a fɔ mala dannu ma ko mata sa wota Mari Alla wara-koe rɔ, anu si saraka-mintan-tinɛ kɛ yira anu na ka ma tamasere la anu ye. Ma sa sarakɛnu mintanna a kuma. Tamasere le kɛ la dɔrɔn!

²⁹“Male ti ma kan-kɔ sɔ Mari la kaka ka saraka-mintan-tina-dogbɛrɛ sɔ ma si sarakɛ mintan kan min fɔ ni ma tara Marita Bɔn nyɛrɛ yakɔrɔ.”

³⁰Finihasi anubɛ Isirɛla bɔnsɔn kebila-kun-tiginu ya wo bɛɛ lamɔɛn tumɛ min, Rubɛn bɔnsɔn anubɛ Kadi bɔnsɔn anubɛ Manasa bɔnsɔn-talɛ ya min bɛɛ fɔ, wo ya anu wasa.

³¹Finihasi ya anu yabi ko, “Ma ara a lɔn gbɛ ko Mari ye ma tɛma bawo wo ma hakɛ kɛ Mari la iko ma mirinɛ a ma nya min nun. Ma si na Mari Allata tɔrɔyɛ min sɔrɔn nun, wo ara ma damasi kisi wo ma.”

³²Finihasi anubɛ kun-tigi wonu sɛgira Kenan nyamanɛ rɔ ka anu dantɛgɛ Isirɛla mɔgɛnu ye.

³³Isirɛla mɔgɛ bɛɛsi sewara ka Mari tanto dantɛgɛlɛ wola ko la. Anu ma ta anu kɛlɛ tun.

³⁴Rubɛn bɔnsɔn anubɛ Kadi bɔnsɔn ya saraka-mintan-tinɛ wo tɔgɔ sa “Sereyɛ.” Anu ko, “Sereyɛ le wo la mabɛ Isirɛla mɔgɛ toenu tɛma ko Mari le mata Alla la.”