Read Kuranko Yasowa 24 Bible Online

Yasowa 24 - Kuranko bible

Yasowa 24

¹Yasowa ya Isirɛla bɔnsɔn bɛɛsi kele Sɛkɛm soe rɔ, katarala a kina wo, a mɔgɔ-ba wo, a kun-tigi wo, anubɛ a kiti-tɛgɛlɛnu ma. Wonu dama nara anu sɔ anu nyɔgɔn fɛ Marila Bɔn yakɔrɔ.

² Yasowa ya Isirɛlata Mari Allata kumɛ latenbi mɔgɛnu ma ko, “Wati-yan-tenbinɛ, wo benba minnu bi Yufereti bɛ kɔma, wonu ya bɛsi-fuyinu kɔ. Iburayima anubɛ Nehori fa Tɛra ya bɛsɛ do kɔ.

³ Kɔnɔ Mari ya wo benba Iburayima labɔ nyamanɛ wo rɔ ka Yufereti bɛ tɛgɛ ka na a la Kenan nyamanɛ kɛ rɔ. A ya kegeya-siyaman di a ma. A ya den kelen di a ma min tɔgɛ Isiyaka.

⁴ Wo kɔma, a ya den fila di Isiyaka ma, Yakoba anubɛ Isɔ. A ya kan tinɛ di Isɔ ma Idɔm kɔnkɛla minɛ rɔ. Wo kɔma, Yakoba anubɛ ala dannu tara Iyipiti.

⁵ “Wo kɔma, a ya Musa anubɛ Aruna lata Yakobanu ma. A ya tɔrɔya-belebele-wɛ lana Iyipiti mɔgɛnu kuma kɔnɔ a ya wole labɔ nyamanɛ wo rɔ.

⁶Kɔnɔ Iyipiti mɔgɛnu ya anuna kirindinu bi ka Isirɛla mɔgɛnu sagaran ha ka ta ke Kɔgɔ-Yi-Wulan[28] ma.

⁷ Isirɛla mɔgɛnu wɔrɔndɔra ko ale Mari ni anu dɛnbɛ. A ya anu dɛnbɛ ka pinpi-belebele-wɛ don anubɛ Iyipiti mɔgɛnu tɛma. A ya yi-belebele-wɛ keri Iyipiti mɔgɛnu kuma ka anu faga. Wo ya a lɔn a ya min ma Iyipiti mɔgɛnu na. Wo kɔma, wo ya san-siyaman bɔ wula-da-rakolɔn rɔ.

⁸ “A ko a nara wo la Amoranuta nyamanɛ rɔ min bi Yorodan bɛ kɔma tele-bɔɛ wara la. Anu ya wo kɛlɛ kɔnɔ ale Mari ya nɔlɛ di wo ma. A ya anu bɛɛ kasara wo yarɔ. Wo ya anuna nyamanɛ bi anu bolo.

⁹Mansa Balaki min bi Mohabu nyamanɛ rɔ, wo ya kɛlɛ lawuli wole, Isirɛla mɔgɛnu kan ma. Mansɛ wo ya a fɔ Beyorila den Belam ye ko a ni Isirɛla mɔgɛnu danka.

¹⁰ Kɔnɔ ale Mari ko a ma a wɔlɔ matɔlɔ Nɛbi Belamta kuman-kan la, fɔ ka a fɔ ko a ni duwa Isirɛla mɔgɛnu ye. A ya wo kisi ka bɔ Mansa Balaki bolo.

¹¹ “Wo ya Yorodan bɛ tɛgɛ ka na Yɛrikɔ. Nyɔ-mɔgɛnu ya wo kɛlɛ. Amoranu wo, Perasanu wo, Kenannu wo, Hɛtinu wo, Hefanu wo, Kakasanu wo, anubɛ Yebusinu, wonu dama ya wo kɛlɛ fanan kɔnɔ ale Mari ko a ya nɔlɛ di wo ma wo bɛɛ kuma.

¹² A ya a ma, anu kumakɔra ka Amora mansa filɛ wonu gben anuna nyamanɛ rɔ. Wole ma wonu gben wota kɛlɛ-kɛ-fannu na.

¹³ A ya nyamanɛ anubɛ soenu di wo ma wo ma wɔli minna ko la, ado wo ma anu sɔ. A ko wo ya dɔn-fen-siyaman sɔrɔn nyamanɛ wo rɔ, wo ma wɔli minnuna ko la.”

¹⁴Woletɔ Yasowa ya a fɔ Isirɛla mɔgɛnu ye ko, “Wo ni mata Mari gbiliya ka a bato wo yisi bɛɛ la ka wo telen a ye wati bɛɛ. Wo benbanu ya bɛsi-fuyi minnu kɔ Yufereti bɛ kɔma anubɛ Iyipiti nyamanɛ rɔ, wo ni wonu nakɛ a rɔ. Wo ni mata Mari kelen pe le bato.

¹⁵Kɔnɔ ni wo rabɛnni ma ka Mari bato, wo si min bato worɔ, wo ni wo latɛgɛ bi. Tumado wo benbanu ya bɛsɛ minnu kɔ Yufereti bɛ kɔgɔma nun, ni wo ma, wo siginɛ Amora minnu tɛma, wo ye a fɛ ka wonuna bɛsɛnu kɔ kɔnɔ mabɛ nta denbayɛ si Mari kelen pe le bato.”

¹⁶Isirɛla mɔgɛnu ya a yabi ko, “Ma ti bɛsɛnu kɔ ka Mari to nyɔ mumɛ!

¹⁷Mata Mari Alla le Alla kelen pe la min ya ma benbanu bɔ yɔɔnyɛ rɔ Iyipiti nyamanɛ rɔ. Ma ya kabana-ko-wɛnu yen ma nyɛrɛ yɛ la wo tumɛ ma ye yilan-yilanna wulɛ rɔ. A ya ma tanka ma kɛlɛ-nyɔgɛnu ma ma tagamanta kan-tina min bɛɛ rɔ.

¹⁸Sibolo-gbɛrɛ bɛɛ minnu siginɛ nyamanɛ kɛ rɔ nun, Mari ya wonu gben ma yarɔ hali Amoranu fanan. Woletɔ male si Mari Alla bato bawo mata Mari le.”

¹⁹Yasowa ya a fɔ Isirɛla mɔgɛnu ye ko, “Wo ti ke Mari Alla batola bawo a sɛnima, ado a ti sɔn a senɛ ma wo bolo. Ni wo bilara a la, a ti wo hakɛnu makoto.

²⁰Ni wo ya bɛsi-wo-bɛsi kɔ ka wo ban Mari la, a si wo tɔrɔya ata fondo-bɔɛ la. A ya ata ko-nyimɛ min kɛ wo ye nun fɔlɔ, a si wo halaki wo gbɛ rɔ.”

²¹Isirɛla mɔgɛnu ya a fɔ a ye ko, “Ma si Mari Alla le bato serr!”

²²Yasowa ya a fɔ anu ye ko, “Wo sere ye wo nyɛrɛ burɔ ni wo si Mari Alla bato.” Mɔgɛnu ya a yabi ko, “Ɔnde, i wara tonyɛ fɔ. Ma sere le ma nyɛrɛ la.”

²³Yasowa ya a fɔ anu ye tun ko, “Awa kaka, wo ni wola bɛsɛnu nakɛ a rɔ ka Isirɛlata Mari Alla bato wo yisi bɛɛsi la.”

²⁴Isirɛla mɔgɛnu ya a fɔ Yasowa ye ko, “Ma si mata Mari Allata kumɛ bira ka ale kelen pe le bato!”

²⁵Wulɔn tele rɔ, Yasowa ya a ma, Isirɛla mɔgɛnu ya sarama-kan kiri anubɛ anuta Mari tɛma Sɛkɛm soe rɔ. A ya tɔnnu di anu ma anu si minnu bira.

²⁶Yasowa ya koe kɛnu sɛbɛ Marita tɔn-kitabu rɔ. A ya kuru-belebele-wɛ bi ka wo sigi kɔlɔma kɔrɔ Marita kan-tina-sɛnimɛ da kɔrɔ.

²⁷Yasowa ya a fɔ mɔgɛ bɛɛsi ye ko, “Kuri kɛ si ma tamasere la wo ye. Mari ya min fɔ wo ye, a si ma hɛnkili bila koe wo bɛɛ la. Ni wo ya wo ban wola Mari la, kuri kɛ si wo hɛnkili labila ko wo ara wola sarama-kan tinya.”

²⁸Yasowa ya Isirɛla mɔgɛ bɛɛsi lata anu halala-nyamanɛnu tɔ.

²⁹Marita wɔli-kɛlɛ, Nunna den Yasowa, wo sɔrɔn ya san kɛmɛ ani san tan (110) bɔ tumɛ min, a ya so-sɛgi-kɛ.

³⁰ Anu ya a togon a nyɛrɛta soe burɔ Timina-Sira min bi Kasa kɔnkɛ kantɔ-wara la Ifɛrɛmta kɔnkɔ-nyamanɛ rɔ.

³¹Yasowa ye a kɛndɛ la wati min, Isirɛla mɔgɛnu ya Mari bato. Yasowa fagara tumɛ min, mɔgɔ-ba minnu ya kabana-ko-siyamɛ wonu yen Mari bolo, Isirɛla mɔgɛ toenu tora Mari batola wonu fɛ.

³² Isirɛla mɔgɛnu nara Yusufu kolenu na ka bɔ Iyipiti nyamanɛ rɔ. Anu ya a togon dugu-kundunɛ do rɔ Sɛkɛm soe burɔ Yusufu fa Yakoba ya min san wodi-gbɛ kɛmɛ la Hemorila dannu ma. Dugu-kundunɛ kɛ dira Yusufu bɔnsɔn-mɔgɛnu ma nun fɔlɔ.

³³Arunala den Ɛliyasa fagara. Anu ya a togon Ifɛrɛmta kɔnkɔ-nyamanɛ rɔ Kibiya soe burɔ min dira ala den Finihasi ma nun fɔlɔ.