Read Kuranko Yasowa 4 Bible Online

Yasowa 4 - Kuranko bible

Yasowa 4

¹Isirɛla mɔgɛ bɛɛsi ya Yorodan bɛ tɛgɛ tumɛ min, Mari ya a fɔ Yasowa ye ko,

²“I ni mɔgɔ tan-ni-fila yabɔ bɔnsɔn kelen-kelennamɛ-bɛɛ rɔ.

³Mɔgɛ wonu ni kuru kelen-kelen bi Yorodan bɛ tɛma saraka-masɔlɛnu sɔnɛ kan min. Anu ni ta kuri wonu na anu bolo. Wo wa wo daga makɛ kan min, wo ni kuri wonu nadɛn nyɔ.”

⁴Yasowa ya mɔgɔ tan-ni-filɛ wonu kele

⁵ka a fɔ anu ye ko, “Wo ni ta Marila tɔn-kenkirɛ yarɔ Yorodan bɛ tɛma. Mɔgɔ kelen-kelennamɛ-bɛɛ ni kuru kelen-kelen bi a kanban-kunyɛ ma iko wo bɔnsɔn ye nya min.

⁶Kuri wonu si ma tamasere la wo bɔnsɔn-natoenu ye. Wola dennɛnu ba wo manyinika wati min ko kuri kɛnu kɔrɛ ye min na,

⁷wo si a fɔ anu ye ko, ‘Saraka-masɔlɛnu tara Marila tɔn-kenkirɛ la Yorodan bɛ tɛma wati min, yi gbalata.’ Kuri kɛnu si Isirɛla mɔgɛnu hɛnkili bila wo wati rɔ.”

⁸Anu ya a ma iko Yasowa ya a fɔ anu ye nya min. Woletɔ anu ya kuru tan-ni-filɛ wonu bi Yorodan ba-gbalanɛ tɛma. Anu ya kuru kelen-kelen bi iko anuna bɔnsɔn ye nya min Isirɛla bɔnsɔnnu tɔ. Anu tara kuri wonu na daga-makɛ-tina-kurɛ rɔ.

⁹Kuri minnu bɔra Yorodan ba-gbalanɛ tɛma saraka-masɔlɛnu sɔra kan min nun, Yasowa ya wonu sigi anu nyɔgɔn kuma. (Ha kaka,[5] kuri wonu bi nyɔ.)

¹⁰Saraka-masɔlɛ minnu bi tala tɔn-kenkirɛ la, wonu sɔnɛ tora Yorodan tɛma ha koe bɛɛ kanbalita iko Mari ya a fɔ Yasowa ye nya min anubɛ iko Musa fanan ya a fɔ nya min. Mɔgɛnu ya anu nakaliya bɛ tɛgɛla ka ta bɛ tɔnkɔn kelan rɔ.

¹¹Anu kera bɛ kɔgɔma tumɛ min, saraka-masɔlɛnu tara tɔn-kenkirɛ la Isirɛla mɔgɛnu yarɔ.

¹²Kɛlɛ-dannu, mɔgɔ waga bi-nani (40,000) ka bɔ bɔnsɔn kɛnu tɔ, Rubɛn, Kadi, anubɛ Manasa bɔnsɔn-talɛ, kɔni, wonu sɔra Isirɛla mɔgɛnu yarɔ ka anu daga makɛ lɛɛ rɔ yanni anu ni ke Yɛrikɔ soe iko Musa ya kumɛ wo fɔ anu ye nya min.

¹⁴Wo tele rɔ, Mari ya Yasowa gbiliya Isirɛla mɔgɛ bɛɛsi yala. Wo mara Yasowata gbiliyɛ la a siyi-tele-bɛɛ rɔ iko anu ya Musa gbiliya nya min.

¹⁵Kamasɔrɔn wo tele nyɛrɛ rɔ Yasowa ya a fɔ saraka-masɔlɛnu ye ko anu ni ta tɔn-kenkirɛ la iko Mari ya anu nawuli nya min. A ko, “Wo bɔ Yorodan bɛ tɛma.”

¹⁸Woletɔ saraka-masɔlɛnu bɔra Yorodan bɛ tɛma Marila tɔn-kenkirɛ la anu bolo. Anu kera gbole ma tumɛ min, yi sɛgira a gbɛ rɔ anu kɔma wo wati nyɛrɛ rɔ iko a ye nya min nun.

¹⁹Kabana-koe kɛ bɛɛ mara anuta karɛ fɔlɛ, a tele tan ma. Karɛ wo tele tan nyɛrɛ ma, Isirɛla mɔgɛ bɛɛ ya Yorodan bɛ tɛgɛ. Anu ya anu daga makɛ kan min, anu ya wo tɔgɔ sa Kiligali, tele-yigi wara la Yɛrikɔ dafɛ.

²⁰Kuru tan-ni-filɛ minnu bɔra bɛ tɛma, Yasowa ya wonu sigi anu nyɔgɔn kuma.

²¹Kuri wonu bi sigila nyɔ anu nyɔgɔn kuma kɔrɛ min na, Yasowa ya wo rakaran anu ye. A ya a fɔ anu ye ko, “Wati-natoe, ni wola dannu ya wo manyinika ni kuri kɛnu kɔrɛ ye min na,

²²wo ni a fɔ anu ye ko Isirɛla mɔgɛnu ya Yorodan bɛ tɛgɛ dugu-gbalanɛ kuma.

²³Wo ni a fɔ anu ye fanan ko mata Mari Alla ya yi gbala ma benbanu yarɔ iko a ya Kɔgɔ-Yi-Wulan[6] gbala nya min nun.

²⁴Mari ya kɛ ma alako mɔgɛ bɛɛsi ni a lɔn ko sɛnbɛ-bɛɛ-tigi le ale Mari la. Woletɔ anu fanan ni to Mari Alla gbiliyala habadan!”