Read Kuranko Yasowa 6 Bible Online

Yasowa 6 - Kuranko bible

Yasowa 6

¹Yɛrikɔ mɔgɛnu ya tarɛ dɛ latogon bawo anu kilannɛ Isirɛla mɔgɛnu na. Mɔgɔ-wo-mɔgɔ ma ke bɔla, mɔgɔ-wo-mɔgɔ ma ke donna.

²Mari ya a fɔ Yasowa ye ko, “N si Yɛrikɔ mɔgɛnu don wo bolo anubɛ a mansɛ anubɛ a kɛlɛ-kɛla-wɛnu.

³Wobɛ ila kɛlɛ-dannu, wo ni soe lafoo kinyama kelen tele-wo-tele, tele wɔrɔ kɔrɔ.

⁴Saraka-masɔla mɔgɔ wɔrɔnfila ni ta buri wɔrɔnfila la wo yarɔ. Saraka-masɔlɛnu ni ta tɔn-kenkirɛ yarɔ. A tele wɔrɔnfila nyɔgɛ ma, wobɛ ila kɛlɛ-dannu ni soe lafoo kinyama wɔrɔnfila.

⁵Anu ni buri fɛ anu nyɔgɔn fɛ wɛ kɛ. Isirɛla mɔgɛnu ba wo lamɔɛn tumɛ min, anu ni gbele-gbelen wɛ kɛ. Soe tarɛ si bui. Kɛlɛ-dannu si don soe burɔ worɔ.”

⁶Yasowa ya a fɔ saraka-masɔlɛnu ye ko, “Wo ni tɔn-kenkirɛ bi ka ta mɔgɛnu yarɔ. Wo mɔgɔ wɔrɔnfila ni ta buri la wo bolo tɔn-kenkirɛ yarɔ.”

⁷Yasowa ya a fɔ ala mɔgɛnu ye ko, “Faan ye kɛlɛ-dan minnu bolo, wonu ni ta saraka-masɔlɛnu yarɔ ka soe lafoo.

⁸Wo kana sɔnkɔ-sɔnkɔ hali ka kuma doni bɛrɛni, fɔ n ba a fɔ wo ye tumɛ min ko wo ni gbele-gbelen. Wo ni gbele-gbelen wo rɔ kati!” Yasowa banta kumɛ kɛ fɔla tumɛ min, saraka-masɔla mɔgɔ wɔrɔnfila tara buri fɛla. Marila tɔn-kenkirɛ tora anu kɔma. Kɛlɛ-dan donu tara saraka-masɔlɛnu yarɔ, donu tora kenkirɛ kɔma. Kɛ bɛɛ rɔ, anu bi buri fɛla.

¹¹Anu ya soe lafoo iko kelen. Wo kɔma, anu sɛgira anu kɔma anu daga makɛ tinɛ rɔ.

¹²Wo banda kɛ sɔgɔma subaga, Yasowa anubɛ saraka-masɔlɛnu anubɛ kɛlɛ-dannu wulita ka soe lafoo iko anu ya a ma nya min fɔlɔn.

¹⁴Anu sɛgira anu kɔma anu daga makɛ tinɛ rɔ. Anu ya a ma wo nya tele wɔrɔ kɔrɔ.

¹⁵A tele wɔrɔnfila nyɔgɛ subaga ma anu wulita. Anu ya soe lafoo wo nya kinyama wɔrɔnfila tele kelen wo rɔ.

¹⁶A wɔrɔnfila nyɔgɛ, saraka-masɔlɛnu ya buri fɛ tumɛ min, Yasowa ya a fɔ mɔgɛnu ye ko, “Wo ni gbele-gbelen. Mari ara soe kɛ nɔ ma ye.”

¹⁷Yasowa ya Mari kuman-kan latenbi mɔgɛnu ma nun ko, “Yɛrikɔ wa halaki tumɛ min, fan bɛɛ si ma Maritɛ la. Rehabi anubɛ ala mɔgɛ minnu bi ala bɔn la, wonu dɔrɔn si kisi bawo ale Rehabi ya Isirɛla mɔgɔ filɛ wonu nakisi minnu tara so lakɔrɔsi tinɛ. Wo kana fenfen bi wo nyɛrɛ ye. Ni wo ya wo ma, wo si tɔrɔyɛ lana Isirɛla mɔgɛnu kuma. Fan minnu nadannɛ wodi-gbɛ anubɛ sɛnɛ la anubɛ silɛɛ anubɛ nɛgɛ-dogbɛrɛnu na, wo bɛɛ ni di Mari ma ka to Marita fen namara tinɛ rɔ.”

²⁰Saraka-masɔlɛnu ya burinu fɛ. Isirɛla mɔgɛnu ya wo lamɔɛn tumɛ min, anu gbele-gbelenta wɛ kɛ. Tarɛ buira fugbu!

²¹Kɛlɛ-dannu ya soe bira-a-la ka mɔgɛnu faga faan la, kei wo, musu wo, anubɛ anuna dennɛnu. Anu ya kolo-fan fanan bɛɛ faga.

²²Kei filɛ minnu tara Yɛrikɔ lakɔrɔsi tinɛ fɔlɔ nun, Yasowa ya a fɔ wonu ye ko, “Wo ni ta Rehabila bɔn la ka na anubɛ ala denbayɛ la iko wo ya lanyiri kiri a ye nya min nun.”

²³Anu nara Rehabi la anubɛ a fa ani a na anubɛ a na-kelen-nyɔgɛ bɛɛsi. Anu ya anu to Isirɛla dagɛ kɔma.

²⁴Anu ya soe bɛɛ mintan fɔ fan minnu nadannɛ sɛnɛ la anubɛ wodi-gbɛ anubɛ silɛɛ anubɛ nɛgɛ-dogbɛrɛnu. Anu ya wo bɛɛ di Mari ma ka wonu to Marila fen namara tinɛ rɔ.

²⁵ Kɔnɔ Yasowa ya Rehabi anubɛ ala denbayɛ bɛɛ lakisi bawo a ya mɔgɔ filɛ wonu kisi minnu tara Yɛrikɔ lakɔrɔsi tinɛ. Ata denbayɛ tora Isirɛla mɔgɛnu tɛma ha bi.

²⁶ Wo wati rɔ, Yasowa ya tɔn gbɛlɛya mɔgɛnu ye ko, “Mɔgɔ-wo-mɔgɔ wa soe kɛ sɔ a kurɛ la tun, wo tigi si to Marita dankɛ kɔrɔ. Mɔgɛ min ba soe kɛ tarɛ sɔɛ dabira, wo si foo ala den-kei fɔlɔtɛ la. Min ba tarɛ dɛ kɛ ladan, wola den laban si faga.”

²⁷Mari ye Yasowa fɛ. A ya min bɛɛ ma, a tɔgɛ wo tara pɔn!