Read Kuranko Yasowa 7 Bible Online

Yasowa 7 - Kuranko bible

Yasowa 7

¹Mari ya a fɔ Isirɛla mɔgɛnu ye nun ko, “Wo ni Yɛrikɔ soe halaki ka fen bɛɛ tinya a rɔ tɛrr!” Kɔnɔ mɔgɔ kelen bi nyɔ min tɔgɛ Ekan, wo ma Marila kumɛ bira. Mari diminyara Isirɛla mɔgɛnu ma wola ko la. (Ekan wo, a fa tɔgɛ Kami, a benba tɔgɛ Sabadi. A bɔra Serahata denbayɛ rɔ Yuda bɔnsɔn rɔ.)

²Yasowa ya mɔgɛ donu nata Eyai ka bɔ Yɛrikɔ. Eyai soe ye Bɛtɛli soe tele-bɔɛ wara la. A ma fɛ-yan Bɛti-Efɛn soe la. Yasowa ya a fɔ mɔgɛ wonu ye ko, “Wo ta ka Eyai mafɛlɛn.” Anu tara wati min,

³anu nara ka anu dantɛgɛ Yasowa ye ko, “Hali i ma mɔgɔ-siyaman nata. Ni i ya mɔgɔ waga fila, ni wo ma, sawa nyɔgɔn nata, wonu si soe wo nɔ. Nyɔ-mɔgɛnu ma siya.”

⁴A ya mɔgɔ waga sawa nyɔgɔn lata Eyai mɔgɛnu kɛlɛ tinɛ kɔnɔ Eyai mɔgɛnu ya Isirɛla mɔgɛnu gben

⁵ka dabira tarɛ dɛ ma ha ka ke fara-gbaran ma. Anu bi yigila kɔnkɛ la tumɛ min, anu ya mɔgɔ bi-sawa ani mɔgɔ wɔrɔ (36) faga. Isirɛla mɔgɛnu yisi tinyanta kilan bolo.

⁶Yasowa anubɛ Isirɛla mɔgɔ-banu ya anuna durukinu tafara yisi-tinyɛ bolo. Anu ya anu nyɛrɛ fɛrɛn dugu la Marila tɔn-kenkirɛ yakɔrɔ. Anu ya gbangban kɛ anu kunyɛ rɔ ka a yira ko anu bara nimisa. Anu telenta sani dugu ma gbɛn!

⁷Yasowa ya a fɔ ko, “Mari, nfenna i ya Yorodan bɛ gbala ka na ma la nyamanɛ kɛ rɔ yan ma faga-koe la Amora mɔgɛnu bolo? Nfenna ma ma to Yorodan bɛ kɔma nun?”

⁸A ko tun, “E, Mari, n si nfen ma mɔgɛ kɛnu ye? Anu bara anu buri anu yogenu kɔrɔ.

⁹Ni Kenan mɔgɛ kɛnu ya koe kɛ lamɔɛn tumɛ min, anu si na ka ma bira ka ma ban feu! Wo ti ma i tɔgɔ-tinya-koe la, wa?”

¹⁰Mari ya a fɔ Yasowa ye ko, “I lasɔ. I sanɛ dugu ma nfenna?

¹¹Isirɛla mɔgɛnu bara hakɛ kɛ. Anu ma nta kumɛ bira bawo anu ya kankanya-fan wonu ma anutɛ la Yɛrikɔ, a bɛnnɛ nun ka min halaki. Anu ya foninyɛ fɔ ka fan wonu ma anutɛ la.

¹²Wola ko la, Isirɛla mɔgɛnu ma anu yogenu nɔ. Wo le ya a ma, anu ya anu nyɛrɛ halaki. N ti to wo fɛ tun fɔ wo wa tubi ka fan bɛɛ tinya minnu bi wo bolo ka bɔ Yɛrikɔ soe burɔ.

¹³Ta mɔgɛ wonu sɛninya ka anu tabɛn alako anu ni anu sɔ n yakɔrɔ sina. Nde, anu benba Isirɛlata Mari Alla ko fan donu bi anu tɛma a bɛnnɛ ka minnu halaki nun. Ni anu ma wonu nabɔ gbɛ rɔ, anu ti ke anu kɛlɛ-nyɔgɛnu nɔla.

¹⁴A fɔ anu ye ko sina sɔgɔma, bɔnsɔn bɛɛ ni na kelen-kelenyɛ ma. Ni n ya bɔnsɔn min bira, wonu si na kebilɛ ma fanan. N ba kebilɛ min yabɔ, wonu fanan si na denbayɛ ma. N ba denbayɛ min yabɔ, wonu fanan si na kelen-kelenyɛ ma.

¹⁵N si mɔgɔ kelan wo bira min ya fan wo kankan. Wo si yiliki ka mintan tɛ la anubɛ ala denbayɛ bɛɛ anubɛ fan min bɛɛsi ye a bolo. A ara nta kumɛ tinya ka miliya-ko-wɛ lana Isirɛla mɔgɛnu kuma.”

¹⁶Wo banda kɛ sɔgɔma subaga, Yasowa nara Isirɛla bɔnsɔnnu na kelen-kelenyɛ ma. Mari Alla ya Yuda bɔnsɔn yabɔ.

¹⁷A nara Yuda bɔnsɔn kebilɛnu na kelen-kelenyɛ ma. Mari ya Seraha kebilɛ yabɔ. A nara Seraha kebila-mɔgɛnu na kelen-kelenyɛ ma. Mari ya Sabadila denbayɛnu yabɔ.

¹⁸A nara Sabadila denbayɛ la kelen-kelenyɛ ma. Mari ya Kamila den Ekan yabɔ.

¹⁹Yasowa ya a fɔ Ekan ye ko, “Nna dan, i ni tonyɛ fɔ Isirɛlata Mari Alla ye kaka ka i sɔ i hakɛ la. I ya min ma, wo fɔ n ye kaka. I kana ko-wo-ko dogon n ma.”

²⁰Ekan ya a yabi ko, “Tonyɛ le. N bara hakɛ kɛ Isirɛlata Mari Alla la. N ya min ma, wo le kɛ la.

²¹N ya Babilɔn duruku-kinyanɛ do yen Yɛrikɔ soe burɔ anubɛ wodi-gbɛ anubɛ sɛnɛ-gbu kelen. Wonu sɔgɛ ya n bira, woletɔ n ya anu bi. I si anu taran nna fani-bɔn la, a sanɛ dugu kɔrɔ. Duruki anubɛ sɛnɛ, wo sanɛ wodi-gbɛ kuma.”

²²Yasowa ya mɔgɛnu nata tiriya ka duruki anubɛ sɛnɛ sanɛ yen wodi-gbɛ kuma Ekanla fani-bɔn la.

²³Anu ya miran wonu bi ka na anu na Yasowa wara Isirɛla mɔgɛ bɛɛ yala. Anu ya fan wonu sa Mari yakɔrɔ.

²⁴Ale Ekan wo, duruki wo, sɛnɛ wo, wodi-gbɛ wo, ala dannu wo, ala ninkinu wo, ala sofɛlɛnu wo, ala sagɛnu wo, ala fani-bon wo, anubɛ min bɛɛsi ye a bolo, Yasowa anubɛ Isirɛla mɔgɛ bɛɛ tara wo bɛɛ la Nanparan folo-wɛ[9] la.

²⁵Yasowa ya a fɔ ko, “Nfenna i ya tɔrɔyɛ kɛ lana ma kuma ka? Mari si tɔrɔyɛ lana ile kuma bi!” Isirɛla mɔgɛ bɛɛ ya Ekan anubɛ ala denbayɛ anubɛ a bolo-fan bɛɛ mabon kuri la ha anu fagara. Mari ma diminya tun wola ko la. Anu ya wo bɛɛ mintan tɛ la.

²⁶Anu ya kuru-kundinu nadɛn Ekan bugurɛ kuma. Wo ye nyɔ ha bi.[10] Woletɔ ha bi, anu bi folo-wɛ wo kelela ko Nanparan fole.