Read Kuranko Yasowa 9 Bible Online

Yasowa 9 - Kuranko bible

Yasowa 9

¹Mansɛ minnu bi Yorodan tele-yigi wara la anubɛ mansɛ minnu bi kɔnkɔ-nyamanɛ rɔ anubɛ minnu bi kɔgɔ-yi dafɛ ha Lɛbanan dugula wara la, wonu bɔnsɔnnu tɔgɛ le kɛnu na, Hɛtinu, Amoranu, Kenannu, Perasanu, Hefanu, anubɛ Yebusinu. Mansɛ wonu ya a lamɔɛn tumɛ min ko Isirɛla mɔgɛnu bara nɔlɛ sɔrɔn, anu ya anu nyɔgɔn nadɛn ka anu miri anu si Yasowa anubɛ ala mɔgɛnu kɛlɛ nya min.

³Kɔnɔ Hefa do minnu bi Kibiyon soe burɔ, wonu ya a lamɔɛn min bara ma Yɛrikɔ anubɛ Eyai soenu na Yasowa bolo tumɛ min,

⁴anu ya yanfɛ rabɛn. Anu tara ka dɔn-fan donu tabɛn ka wo sa sofɛlɛ kuma anubɛ bɔrɔ-kɔrɛnu anubɛ gbolo-bɔrɔ-kɔrɛ minnu mabɛtɛrɛnɛ.

⁵Anu ya duruku-kore don anu kan na anubɛ sanbara-bɛtɛrɛnɛnu. Anu ya biredi-findikinɛnu fanan bi.

⁶Anu tara Isirɛla dagɛ rɔ Kiligali ka a fɔ Yasowa ye ko, “Ma bɔra nyamanɛ min tɔ, wo fɛ-yan alako wo ni lanyiri kiri ma ye ka a fɔ ko wo ti ma kɛlɛ.”

⁷ Kɔnɔ Isirɛla mɔgɛnu ya a fɔ anu ye ko, “Ma ye lanyiri kirila wo ye nfenna? Tumado, wole siginɛ ma da kɔrɔ, woletɔ ma ti lanyiri kiri wo ye.”

⁸Anu ya a fɔ Yasowa ye ko, “Ma ye ile bolo.” Yasowa ya anu manyinika ko, “Yon bi wole la? Wo bɔra mintɔ?”

⁹Anu ya a yabi ko, “Male bɔra nyamani-fɛ-yanyanɛ rɔ bawo ma ya a lamɔɛn wota Mari Alla ara min ma Iyipiti nyamanɛ rɔ.

¹⁰ Ma ya a lamɔɛn fanan a ya min ma Amora mansa mɔgɔ filɛ la Yorodan tele-bɔɛ wara la, Mansa Saihɔn min bi Hɛsibɔn soe burɔ anubɛ Mansa Ɔku min bi Asitɔra soe burɔ Basan nyamanɛ rɔ.

¹¹Mala mɔgɔ-banu anubɛ mɔgɛ min bɛɛ ye nyamanɛ wo rɔ, wonu ya a fɔ ma ye ko ma ni dɔn-fan donu tabɛn mala tagamala ko la ka na wo taran. Anu ya a fɔ ma ye ko ma ni na ka lanyiri kiri ma tɛma alako mala nyamanita-mɔgɛnu ni ma wota wɔli-kɛlɛnu na.

¹²Kɔnɔ kaka, mala biredi mafɛlɛn. Ma bɔra ma warɛ tumɛ min, a ladan-san le nun kɔnɔ kaka, a bɛɛsi ara findiki.

¹³Ma ya gbolo-bɔrɛ kɛnu nafa yi la tumɛ min, anu kurɛ le nun kɔnɔ kaka, anu mafɛlɛn, bɔrɛ bɛɛsi ara tinya. Mala kurɛnu anubɛ mala sanbarɛ bɛɛsi ara tinya tagama kɛ rɔ.”

¹⁴Yasowa anubɛ Isirɛla mɔgɔ-banu ya anuna dɔn-fan donu mafɛlɛn. Anu lara Kibiyon kɛnu na kɔnɔ anu ma Mari manyinika. Anu ya lanyiri kiri anu ye ka anu keli ko anu ti anuna nyamanɛ kɛlɛ mumɛ!

¹⁶Tele sawa wo kɔma, Isirɛla mɔgɛnu ya a lamɔɛn ko anuna dagɛ fɛ-ma-yan bɛrɛkɛ Kibiyon soenu na,

¹⁷anu wulita tele wo rɔ ka ta mɔgɛ wonuna soenu tɔ. Soe wonu tɔgɛ le kɛnu na, Kibiyon, Kɛfira, Birɔti, anubɛ Kiriyati-Yirɔm.

¹⁸Kɔnɔ Isirɛla mɔgɛnu ma anu faga bawo Isirɛla mɔgɔ-banu ya lanyiri kiri Isirɛlata Mari Alla tɔgɛ rɔ. Mɔgɛ bɛɛ donta gbunya-kuma-fɔɛnu tɔ mɔgɔ-banu ma kɛla ko la.

¹⁹Kɔnɔ mɔgɔ-banu ya anu yabi ko, “Ma ya lanyiri min kiri Isirɛlata Mari Alla tɔgɛ rɔ, ma ti wo tinya tun, hali ka ko-yoge ma anu na.

²⁰Ma si min ma, wo le kɛ la. Ma si anu kɛndɛ to iko ma ya lanyiri kiri nya min. Ni ma ya anu tinya, Mari si ma tɔrɔya.

²¹Ma kana anu faga fɔ ka anu ma sɔgɔ-nyininɛnu anubɛ yi-madununɛnu na ma ye.” Mɔgɔ-banu ya wo le tabɛn.

²²Yasowa ya Kibiyon mɔgɛ wonu kele ka anu manyinika ko, “Nfenna wo ya ma yanfa ka a fɔ ko wo bɔra wula-yan la kɔnɔ wo fɛ-ma-yan ma la?

²³Alla ara wo danka bawo wo ya foninyɛ kɛ fɔ. Ka a dabira kaka, wo si ma wɔli-kɛlɛnu na Allala saraka-bɔ-tinɛ ka sɔgɔ nyini anubɛ ka yi maduni Marila bɔn la.”

²⁴Kibiyon mɔgɛnu ya Yasowa yabi ko, “Ma ya wo yanfa bawo ma kilannɛ ma niyi kuma. Ma ya a lɔn ko Mari Alla ara Nɛbi Musa lawuli nun ka nyamanɛ kɛ bɛɛ di ile ma ka a mɔgɛ bɛɛsi faga wo yarɔ. Woletɔ ma ya kɛ bɛɛsi ma.

²⁵Kaka, ma ye wo bolo. Koe min kin wole yala, wo ni wo ma ma la.”

²⁶Yasowa ya anu kandan alako Isirɛla mɔgɛnu kana anu faga.

²⁷Kɔnɔ wo wati rɔ, a ya anu ma wɔli-kɛlɛnu na. Anu mara sɔgɔ-nyininɛnu anubɛ yi-bilɛnu na. Mari ya saraka-mintan-tinɛ min yabɔ a bato-koe la Isirɛla mɔgɛnu ye, anu bi wɔlɛ wo le kun na bɔn la nyɔ ha bi.[12]