Read Kuranko 2 Tɛsalonaika 2 Bible Online

2 Tɛsalonaika 2 - Kuranko bible

2 Tɛsalonaika 2

¹ Ma Mari Yisa, Allata-Mɔgɔ-Yabɔnɛ wa na, a si ma damasi ladɛn a fɛ. Nba, ma na-kelen-nyɔgɛnu, koe do ye ma bolo ka a fɔ wo ye. Ka a tɛgɛ wo ma,

²ni mɔgɔ do ya a fɔ ko Mari na-tumɛ ara tenbi, wo kɔndɔ kana fili kumɛ wo la. Wo kana kilan. Donu si a fɔ ko kumɛ wo bɔra anu ye wɔlɔyiya-kumɛ le tɔ, ni wo ma, kawandili do rɔ. Donu si a fɔ fanan ko male ara wo sɛbɛ kɛdi rɔ.

³Wo kana sɔn, mɔgɔ-wo-mɔgɔ ni wo yanfa kila-wo-kila fɛ. Yanni ma tigi ni na tumɛ min, mɔgɔ siyaman si anu kan-kɔ sɔ Alla la, ado ale min bi Alla kɛlɛla, ale fanan si bɔ gbɛ rɔ.

⁴ Mɔgɛnu bi bɛsɛ min bɛɛ matɔgɔla, anubɛ anu si min gbiliya Alla gbɛ rɔ, “Kirasiti-yogo-finma-wɛ” wo si wuli wo bɛɛ kan ma. A si a nyɛrɛ sigi wo bɛɛ kun na. A si a tui ka don Alla-Bato-Bɔn la ka a fɔ a nyɛrɛ ma ko Alla le ale la.

⁵N bi wo fɛ tumɛ min nun, n ya kɛ bɛɛ rakaran wo ye. Wo hɛnkili ma to wo ko, wa?

⁶Ado nfan, wo ya a lɔn min bi a mabelila ko a kana na kaka. Nba, a wati-latɛgɛnɛ wa ke tumɛ min, “Kirasiti-yogo-finma-wɛ” wo si bɔ gbɛ rɔ, yɔ!

⁷“Kirasiti-yogo-finma-wɛ” wo ye wɔlila kaka kɔnɔ mɔgɛ kelen de nyɔ min bi a mabelila, ado ale kelan si to a mabelila ha a ni kilɛ di a ma.

⁸ Nba, “Kirasiti-yogo-finma-wɛ” wo wa bɔ gbɛ rɔ tumɛ min, Mari Yisa si a faga a darɔ-fɔnyɔ la. Marila nɛ si a halaki ala gbiliya-makawanɛ la.

⁹ “Kirasiti-yogo-finma-wɛ” wo si na Setanɛta sɛnbɛ rɔ ka foninya-tamaserenu anubɛ foninya-kabana-ko-su-bɛɛ kɛ.

¹⁰Minnu bi nala halakila, a si yanfa-yogoma-su bɛɛ don wonu ma min si a ma, anu ni halaki. Wonu si halaki bawo anu ma tonyɛ bira, ado ni anu ya tonyɛ keni nun, anu si kisi worɔ.

¹¹Wola ko la, Alla si kɔndɔfili-belebele lana alako mɔgɛnu ni la foninyɛ wo la.

¹²Anu bɛɛ si tɔrɔyɛ sɔrɔn bawo ko-yogomɛ di anu ye tonya-birɛ ko.

¹³Ma na-kelen-nyɔgɛnu, Mari ara wo keni. Wo le ya a to, ma si baraka bira Alla ye wolela ko la tumɛ bɛɛ. Kebi fɔlɔ, Alla ya wole yabɔ alako wo ni kisi ata Ni-Sɛnimɛ baraka rɔ. A ara wole ma a nyɛrɛta mɔgɛ la bawo wo lara tonyɛ la.

¹⁴Ma ya kibara-nyimɛ min nake wo ma, wo sebu le ya wo kele Alla wara. A ya wo kele alako wo ni wotɛ sɔrɔn Mari Yisa, Allata-Mɔgɔ-Yabɔnɛta gbiliyɛ rɔ.

¹⁵Woletɔ ma na-kelen-nyɔgɛnu, wo ni wo sɔ yiri! Ma ya wo karan tonyɛ min na kawandilɛ anubɛ kɛdi rɔ, wo ni wo bira gben!

¹⁶Alamɛ ma Mari Yisa, Allata-Mɔgɔ-Yabɔnɛ-nyɛrɛ anubɛ ma Fa Alla ya wo sɛnbɛ don. Alla ya ma keni ka habadan-yisi-kimɛ anubɛ yigi-nyimɛ di ma ma ala hinɛ le tɔ.

¹⁷Mari ni yisi-kimɛ di wo ma ka wo sɛnbɛ don alako wo ye min kɛla wo, wo ye min fɔla wo, min bɛɛ kin, wo ni wonu kɛ.