Read Kuranko 1 Timoti 6 Bible Online

1 Timoti 6 - Kuranko bible

1 Timoti 6

¹Yɔɔn bɛɛ ni a lɔn ko a bɛnta, anu ni anu tigi gbiliya. Ni anu ya wonu gbiliya, mɔgɔ-wo-mɔgɔ ti kuma-yogomɛ fɔ Alla anubɛ mala karan ma.

²Wole minnu bi dɛnkɛninya-mɔgɛnu kɔrɔ, wo kana wo tiginu nafɛya bawo wo na-kelen-nyɔgɛ le wonu na. Wo ni wɔli kɛ anu ye bɛrɛkɛ, bawo anu bi tɔnɛ sɔrɔnna wola wɔlɛ wonu fɛ, ado wo diyana-dɛnkɛninya-mɔgɛ le wonu na. I ni koe kɛnu karan ka mɔgɛnu makawandi.

³Ni mɔgɔ-wo-mɔgɔ ya karan-gbɛrɛ do kɛ, ado a ma sɔn Mari Yisa, Allata-Mɔgɔ-Yabɔnɛta kumɛnu ma, hali maleta dina-karan wara-koe rɔ,

⁴wo tigi ara a nyɛrɛ kɔrɔbi ka wasi. A ma ko-wo-ko lɔn. A hɛnkili rabasannɛ. Wo si a ma, anu ni sɔsɔli kɛ kumɛnuna ko la. Sɔsɔlɛ wonu si na keliyɛ la min si a ma, wo si faralɛ lana anu tɛma. Wo kɔma, anu bi suila anu nyɔgɛnu ma,

⁵ado tuma-wo-tuma anu bi sɔsɔli sala. Mɔgɛ wonu hɛnkili tinyanɛ, tonya sa anu bolo muk! Anu bi anu mirila ko dina-koe, nɔnfulu-sɔrɔn-kilɛ le.

⁶Ado nfan, min bi ma bolo, ni wo ya ma wasa, mala dina kɛ si mɔgɛ ma nɔnfulu-tigi la, yɔ!

⁷Ma ma na fenfen na ma bolo duninya kɛ rɔ, ado ma ti ke tala fenfen na ma bolo fanan!

⁸Woletɔ ni dɔn-fan anubɛ kurɛnu bi ma bolo, wonu ni a bɔ ma bolo.

⁹Kɔnɔ minnu bi a fɛ ka ma nɔnfulu-tigi la, wonu si bui nata-yogoma-su bɛɛ rɔ. Yuwaya-koe anubɛ sɔn-yogoma-siyamɛ si ma gbɛrɛ la anu ye. Wonu bi nala buila ka don nyɛrɛ-tinya anubɛ halaki-koe rɔ

¹⁰bawo ko-yogoma-sufa-bɛɛ-dabirɛ le wodi-kenɛ la. A sɔrɔn-sɔgɛ ya mɔgɛ donu bira kati! Wonu tigi bara bɔ dɛnkɛninya-koe rɔ, ado anu yisi ara tinya mɔni siyaman bolo.

¹¹Ile Allata mɔgɛ, i ni i nyɛrɛ tanka koe wo bɛɛ ma. Telenbagayɛ wo, ka kilan Alla la wo, dɛnkɛninyɛ wo, keninteyɛ wo, munyɛ wo, dinyɛ wo, i raya kɛnu ma.

¹²I ni i se-koe-bɛɛ kɛ ka ta yarɔ dɛnkɛninya-koe rɔ, woletɔ i si habadan-nimayɛ bira i bolo filɛ la i nyɛrɛ ye. Alla ya i kele niyi wo le ma, wo tumɛ i ya sereya-nyimɛ yira dɛnkɛninya-koe rɔ sereya-siyaman yala.

¹³ N bi Alla rakelela min bi nimayɛ dila fan bɛɛ ma anubɛ Yisa Kirasiti min ya sereya-nyimɛ bɔ Pontiyasi Pailɛti yala. N bi wonu takelela ko anu ni ma n sere la.

¹⁴Alla ya i sɔ min ma-tinɛ, i ni wo bira ka a mara sɛninyɛ rɔ ha ma Mari Yisa, Allata-Mɔgɔ-Yabɔnɛ ni bɔ gbɛ rɔ tumɛ min. Ni i ya wo ma, mɔgɔ ti ke fɛɛ sala i la.

¹⁵Mɔgɛnu bi Alla min gbiliyala, ma kun-tigi-kelan, kɔni, wo si Kirasiti labɔ gbɛ rɔ a nyɛrɛta wati-latɛgɛnɛ rɔ. Allatala le mansɛnuna Mansɛ la anubɛ marinuna Mari.

¹⁶Ale kelen pe ti faga. A ye waan min tɔ, mɔgɔ-wo-mɔgɔ ti a madon wo la. Mɔgɔ-wo-mɔgɔ ma ale yen bɛ, ado mɔgɔ-wo-mɔgɔ ti ke a yenna lefan. Alamɛ gbiliyɛ anubɛ habadan-sɛnbɛ dira ale ma! Amina.

¹⁷Nɔnfuli ye minnu bolo duninya kɛ rɔ, i ni wonu makawandi ko anu kana wasi. Anu kana anu yigi sa nɔnfuli kuma iko fen de min bi mɛla. Anu ni anu yigi sa Alla kuma min bi fan bɛɛ dila ma ma foninsereyɛ la ka ma lasewa.

¹⁸I ni anu makawandi ko anu ni ko-nyimɛ kɛ anuna wodi rɔ. Anu ni ma nɔnfulu-tiginu na anuna kɛwɔli-nyimɛnu tɔ. Anu fanan ni foninsereyɛ kɛ ka mɔgɛnu kɔ.

¹⁹Anu si nɔnfuli ladɛn anu nyɛrɛ ye worɔ. Wo si ma sinan-sigi-kunya la anu ye yarɔ, ado anu si ke ka nimaya-bɛrɛ bira wo la.

²⁰Timoti, min dantɛgɛnɛ i ma, i ni wo mara gben! I kana i tole masɔ Alla lɔnbɛliya-kuma teleka-telekɛnu na anubɛ yuwaya-sɔsɔlɛnu. Anu bi a fɔla ko lɔnnɛ le sɔsɔlɛ wo la kɔnɔ a sa wo nya de,

²¹ado donu ko lɔnnɛ ye anu bolo kɔnɔ a laban, anu bara dɛnkɛninya-kilɛ to. Alamɛ Allala hinɛ tora wo dama fɛ.