Read Kuranko Hiburunu 12 Bible Online

Hiburunu 12 - Kuranko bible

Hiburunu 12

¹Nba, ma ara mɔgɛ min bɛɛla ko fɔ wo ye nun, ma lafoonɛ wonu na. Anu bara anuna dɛnkɛninyɛ lagbɛ ma ye. Woletɔ koe min bɛɛ si a ma, ma ni bui, ma ni wonu boloka. Hakɛ min bara ma bira gben, ma ni wo bɛɛ boloka! Nyɔgɔn-to-buri min bi ma yarɔ, ma ni ma tunadiya wo ma wona.

²Ma ni la Yisa la dɛɛ bawo ale le ye mala dɛnkɛninyɛ dabirɛ anubɛ ala ban la. A ma a ban faga-koe ma kɔlɔma ma! Miliyɛ wo bɔrɔ ma taran a ye. A fonde latɛgɛnɛ sewɛ wola ko la min siginɛ a yarɔ, ado a siginɛ Alla kɔɛn-nyimɛ rɔ kaka.

³Yisa ya min bɛɛ ma wo ye, wo ni wo miri wo le ma. A ya a munyu hakɛ-tiginuna wunduyogoyɛ kɔrɔ. Woletɔ wo yigi kana tɛgɛ. Wo kana bandan mumɛ!

⁴Wo ma hakɛ kɛlɛ wɛ, ha ka faga wola ko la.

⁵ Alla ya a fɔ wole, ala dannu ye ko, “Nna dan, nde, Mari tenbi i latelennna, i ni i tole masɔ n na a kin na! N tenbi i makumala, i yisi kana tinya, ado nde, Mari ara min bɛɛ keni, n si wonu bɛɛ kolo. N bi min bɛɛ rabirala iko nna dannu, n bi wonu denu tɔrɔla.” Wo ara nyina makawandili-kumɛ wonu ko, wa?

⁷Wo ye tɔrɔla wo fala kolole min bolo, wo ni wo munyu wo fanan kɔrɔ bawo wo ye tɔrɛ min kun na, wo ye a yirala ko Alla le ye wo birala iko ala dannu. Dan do ye nyɔ, min fa ti a kolo?

⁸A ye ala dan bɛɛ kolola le. Ni a ma wo kolo, wo kɔrɛ le ko a nyɛrɛta den ma wo la worɔ. Fɔ ni wo mara nyɔ-mɔgɔ-dan la worɔ.

⁹Ma fa minnu bi duninya kɛ rɔ, wonu bi ma kolola, ado ma ye wonu gbiliyala. Ni ma ye wonu gbiliyala, ma fa min bi Arinyɛni tɔ don? A fisa, ma ni ma famayigi wo kɔrɔ alako ma si ni-bɛrɛ sɔrɔn nya min.

¹⁰Ma fa minnu bi duninya kɛ rɔ, wonu bi ma kolola wati-kundu-ni kɔrɔ iko a bɛnnɛ anu yala nya min. Alla ye wo kɛla ma dɛnbɛn-koe le la alako ma si ata sɛninyɛ sɔrɔn nya min.

¹¹Ma tenbi kolole kɔrɔ, a ti ma sewɛ la ma ye wo wati kɔrɔ. A gbɛlɛ, ado a si ma ladiminya. Kɔnɔ tɔ-a-la, min bara a munyu kolole wo kɔrɔ, wonu si yisi-kimɛ sɔrɔn bawo wonu bi ko-latelennɛ le kɛla.

¹² Wo bole anubɛ wo kunbelan minnu takunnɛ, wo ni wonu tagbɛlɛya tun.

¹³ Wo ni tagama kila-latelennɛnu fɛ, woletɔ minnu kian ra ma gbɛlɛ, wonu kana bui, ado anu kiannu ta si gbɛlɛya.

¹⁴Wo ni wo raya ka to yisi-kimɛ rɔ mɔgɛ bɛɛ fɛ. Wo ni wo raya ka ma mɔgɔ-sɛninyanɛnu na bawo mɔgɔ-wo-mɔgɔ ti Mari yen sɛninyɛ kɔma.

¹⁵ Wo ni a ma wo fɛrɛma ko mɔgɔ-wo-mɔgɔ kana a kan-kɔ sɔ Allala hinɛ la. Wo tigi kana ma iko kɔn-suli-kunayanɛ bawo a si a matii ka a marɛ ranyɛnsɛn mɔgɛ bɛɛ tɛma min si anu sɔndɔmɛ latinya.

¹⁶ Wo ni a ma wo fɛrɛma ko mɔgɔ-wo-mɔgɔ kana ma sɔn-yogoma-tigi la. Wo kana ma iko Isɔ min ya ata sɔ tinɛ mayira a dɔgɛ ma dɔn-fen-nɛla ko la.

¹⁷ A banta wo mala tumɛ min, a ye nyinina a fa ni duwa a ye kɔnɔ a fa ma sɔn. A ara min ma nun, fɛrɛ sa a ye ka wo yɛlɛma tun. Hali a ya-yi bɔra biribiri, a ti ke wo sɔrɔnna tun.

¹⁸Iko Isirɛla mɔgɛnu nara Sinayi kɔnkɛ dafɛ ta-mɛlan ye min dafɛ, wole ma na wɛ kɔnkɔ-su wo ma. Anu ya pinpi anubɛ banda-finyɛ anubɛ fɔn-digidigi-wɛ min tayen, wole ma wonu tayen.

¹⁹Anu ya buru-fɛ-kan anubɛ kuman-kan min namɔɛn, wole ma wonu namɔɛn. Isirɛla mɔgɛnu ya Allata kuman-kan wo lamɔɛn tumɛ min, anu kilanta ha anu ya a madiya alako anu kana wo su lamɔɛn tun

²⁰ bawo tɔn min sigira, wo ya anu takilan kati! Alla ko, “Hali soge, ni wo ya a kian sɔ kɔnkɛ wo ma, wo ni a mabon kuri la ha a ni faga.”

²¹ Anu ya min tayen kɔnkɛ wo kuma, wo ya a ma, anu kilanta kati! Hali Musa nyɛrɛ ko, “N fɛrɛ bɛɛ ye yɛrɛyɛrɛnna kilan bolo!”

²²Kɔnɔ wole ara ke Sayɔn kɔnkɛ min ma, Mansa Dawudata kɔnkɛ le wo la anubɛ Alla-nimɛta soe, Yerusalɛm min bi Arinyɛni tɔ, kɔni. Allata melika waga siyamɛ minnu nadɛnnɛ nyɔ, sewɛ ye wonu yisi rɔ.

²³Wo ara na bɛn Allata den-fɔlɔtɛnuna ladiyɛ ma. Wonu damasi tɔgɛ sɛbɛnɛ Arinyɛni tɔ. Alla siginɛ soe wo le burɔ, mɔgɛ bɛɛ Kitilɛ, kɔni. Mɔgɔ-nyimɛ minnu kanbalinɛ Alla yala, wonu bi a fɛ nyɔ.

²⁴ Sarama-kan-kurɛ ara kiri Yisa yele min fɛ, wo ara ke wo fanan ma, ado a yele-purupurunɛ tenbira Ebɛli yele[2] la.

²⁵ Wo ni a ma wo fɛrɛma worɔ. Alla wa kuma, wo kana wo tengberenya wo lamɔɛn-koe ma. Minnu ya anu ban nun wo lamɔɛn-koe ma, wonu denu ma kisi. Nba, min bi kumala ma ye ka bɔ Arinyɛni tɔ, ni ma ya ma tengberenya wola kuma-bira-koe ma, male si kisi kama worɔ gbɛ?

²⁶ A kuman-kan ya dugu-kole layɛrɛyɛrɛn wo wati rɔ kɔnɔ kaka, a ara lanyiri kiri ko, “N si dugi layɛrɛyɛrɛn iko kelen tun, yɔ! Dugu-kole dɔrɔn ma de, fɔ san-kole fanan.”

²⁷Alla wa a fɔ ko, “iko kelen tun,” wo ye a yirala ka a gbɛ ko fan min bɛɛ danta, wonu na si yɛrɛyɛrɛn ka bɔ anu gbɛ rɔ. Kɔnɔ fan minnu ti maga anu gbɛ rɔ, wonu si to anu gbɛ rɔ tolon!

²⁸Nba, ma ni Alla tanto ka baraka bira a ye bawo a ye mansayɛ la dinkirɛ min, wo ye ma bolo. Wo ti ke bɔla a gbɛ rɔ muk! Ma ni ma raya ka a hɛnɛ a kilɛ fɛ gbiliyɛ anubɛ kilan bolo,

²⁹ ado mata Alla mani de iko tɛ min si fan bɛɛ mintan gburr!