Read Kuranko Hiburunu 2 Bible Online

Hiburunu 2 - Kuranko bible

Hiburunu 2

¹Wo le ya a to, ma ara tonyɛ minnu namɔɛn, ma ni wonu bira gben! Wo si a ma, ma ti porokɔlɔ ka bɔ a rɔ.

²Alla ya tɔn minnu di ma benbanu ma melikanu baraka rɔ, wonu gbɛlɛ ma kuma, ado minnu ma tagama iko tɔn wo ya a fɔ nya min, a bɛnta, a ni tɔrɔyɛ min nyɔgɛ sɔrɔn, a si wo sɔrɔn.

³Min tenbira wo la, ma Mari Yisa nyɛrɛ fɔlɔn ya kisi-koe min nabɔ gbɛ rɔ ma ye, ni ma ma ma tole masɔ kisi-ko-wɛ wo la, ma kunyɛ si bɔ a rɔ kama? Minnu ya a lamɔɛn, wonu ya a yira ma la ko tonyɛ le.

⁴Wo wati nyɛrɛ rɔ, Alla ya kabana-koe anubɛ kɛwɔli-sɛnbɛma-su-siyaman kɛ. A ya ata sereyɛ labɔ gbɛ rɔ kabana-koe wonu fɛ. A ya ata Ni-Sɛnimɛta kɔ-fannu fanan tafara iko a di a ye nya min.

⁵N bi kɛ-nya-kurɛ-su min ma, Alla ma wo ladon melikanuna kun-tigiyɛ kɔrɔ.

⁶Kɔnɔ iko a sɛbɛnɛ Allata kitabu kan tinɛ do rɔ nya min, a ko, “E, Alla, nfen bi hadama-dan la min bi a tola, i ye i mirila a ma? Nfenna gbu, i miriya ye kɛla mɔgɔni-finyɛ ma?

⁷I ya melikanu natenbi ale la wati-kundu-ni kɔrɔ. I ya mansaya-gbiliyɛ anubɛ bonyɛ di a ma

⁸ka a ma fan bɛɛ kun-tigi la.” A sɛbɛnɛ ko Alla ya ale le ma “Fan bɛɛ kun-tigi la,” ado fan bɛɛ ara don ala sarati kɔrɔ feu! Kɔnɔ ma sa ale yenna kun-tigiyɛ kɛla fan bɛɛ kun na kaka.

⁹Kaka, ma ye Yisa le yenna mansayɛ kɛla bonyɛ anubɛ gbiliyɛ rɔ ka a tɛgɛ ata saya-tɔrɔyɛ ma. Melikanu tenbira a la nun wati-kundu-ni kɔrɔ alako a si faga mɔgɛ bɛɛ ye nya min Allata hinɛ baraka rɔ.

¹⁰Alla min bi dali-mansɛ la, a bɛnta ko a ni Yisa lakanbali tɔrɔyɛ fɛ. A ya wo ma alako Allata den siyamɛnu si ata gbiliyɛ sɔrɔn a fɛ nya min, ado Yisa le sɔra anu yarɔ anu kisi-koe la.

¹¹A ye mɔgɛnu sɛninyala ka anu bɔ anuna hakɛnu tɔ. Nba, Yisa wo, a ye minnu sɛninyala wo, anu dama Fa kelen de anu na. Woletɔ a ma miliya ka anu kele ko a na-kelen-nyɔgɛnu.

¹² A ya a fɔ Alla ye ko, “E, Alla, nna mɔgɛnu ba anu nadɛn i bato tinɛ tumɛ min, n si ila koe fɔ anu ye ka i tanto-bɛtinu bɔ.”

¹³ A ko fanan, “N si n yigi sa Alla kuma.” Wo kɔma, a ko, “Alla ara dan minnu di n ma, mabɛ wonu bi yan.”

¹⁴Nba, dan wonu, fɛrɛ-bɔnkɛ anubɛ yele le anu na. Yisa nyɛrɛ mara iko anu denu ka anuna mɔgɔyɛ-nyɔgɔn bi. A ya wo ma alako a si Setanɛta sɛnbɛ kasara nya min ata sayɛ fɛ, ado sɛnbɛ ye Setanɛ bolo nun ka mɔgɛnu faga.

¹⁵Ata sayɛ ya ma hɔrɔya bawo male minnu kilannɛ sayɛ ma nun, ma mani de nun iko yɔɔnnu sayɛla kilan kɔrɔ.

¹⁶A gbɛnɛ ko Yisa ma na melikanu dɛnbɛn-tinɛ bawo a sɛbɛnɛ Allala kitabu rɔ ko, “A ye Iburayima bɔnsɔnnu denu dɛnbɛna.”

¹⁷Woletɔ fɔ a ni ma iko male, a na-kelen-nyɔgɛnu, koe bɛɛ rɔ. A ni wo ma alako a si kinikini ma ma nya min ka wɔli Alla ye a yisi bɛɛ la. A mara mala Saraka-Masɔla-Kun-Tigi-Wɛ la min kɛ, a ya sarakɛ bɔ ma ye ma hakɛnuna ko la.

¹⁸Nba, minnu bi magbɛrɛnkɛ rɔ kaka, a si ke wonu dɛnbɛna bawo a nyɛrɛ magbɛrɛnkɛnta ka tɔrɔ.