Read Kuranko Hiburunu 8 Bible Online

Hiburunu 8 - Kuranko bible

Hiburunu 8

¹ Ma ye koe min fɔ tinɛ wo ye kɛ la, wo kunyɛ le kɛ la. Saraka-masɔla-kun-tigi-wɛ ye ma bolo min siginɛ Allata mansaya-waganɛ kɔɛn-nyimɛ rɔ Arinyɛni tɔ.

²A ye saraka-masɔlayɛ la Sɛnima-Sɛnima-Tinɛ rɔ fani-bon-bɛrɛ la Arinyɛni tɔ. Fani-bon-bɛrɛ kɛ, mɔgɔ ma wo sɔ fɔ Mari nyɛrɛ.

³Saraka-masɔla-kun-tigi-wɛ bɛɛta wɔlɛ ye min na, wo le ka kɔ-fannu anubɛ sarakɛnu masɔ Alla ye. Woletɔ fɔ fan do ni taran mata saraka-masɔla-kun-tigi-wɛ fanan bolo a si min bɔ.

⁴Ni Yisa taranta dugu-kole kɛ kuma ha bi, a ti ma saraka-masɔlɛ la nun bawo saraka-masɔlɛnu bi nyɔ minnu bi sarakɛnu masɔla iko Yahudiyanuna tɔn ye nya min.

⁵ Anu bi saraka-masɔ-wɔlɛ kɛla fani-bɔn min na Arinyɛni tɔ, wo mamunnɛ le yantɛ la dɔrɔn, ado Nɛbi Musa ye fani-bɔn sɔ-koe rɔ tumɛ min, Alla ya a fɔ a ye ko, “I ni fan bɛɛ ladan yati, iko n ya a yira i la nya min kɔnkɛ kuma.”

⁶Kɔnɔ saraka-masɔ-wɔlɛ min dira Yisa ma, wo kolo doi wonutɛ ko pirr! Yisa ya sarama-kan-kurɛ min kiri Alla anubɛ mɔgɛnu tɛma, wo kolo a kɔrɔmɛ ko, ado sarama-kan-kurɛ kɛ kirinɛ fen-kɛndɛnuna ko la minnu bi ma yarɔ.

⁷Ni fɛɛ ma taran sarama-kan-kɔrɔmɛ wo la nun, mɔgɔ mako ti taran a kurɛ la nun.

⁸Kɔnɔ Alla ya fɛɛ yen ala mɔgɛnu na sarama-kan-kɔrɛ fɛ bawo a ye a fɔla ko, “Wo ni wo yɛ lana. Wo tumɛ ye nala n bi sarama-kan-kurɛ kirila mabɛ wole, Isirɛla anubɛ Yuda kɛnu tɛma.

⁹Mabɛ wo benbanu sarata min ma, a ti ma wo su la tun. N ya anu bole bira tumɛ min ka anu nabɔ Iyipiti nyamanɛ rɔ, sarama-kan-kɔrɛ wo kirita tumɛ wo le tɔ. Ma sarata min ma wulɔn, anu ma sarama-kan wo latɔnbagaya. Woletɔ, nde, Mari ara n kan-kɔ sɔ anu na.

¹⁰“Nba, mabɛ Isirɛla mɔgɛnu bi sarama-kan-kurɛ min kirila, wo le kɛ la.” Mari ko, “Wo telenu ba ke tumɛ min n si nna tɔnnu sa anu hɛnkili rɔ. N si anu sɛbɛ anu yisi rɔ. N si ma anuta Alla la. Anu si ma nta mɔgɛnu na.

¹¹Ado nfan, hali anu ma anu sigi-nyɔgɛnu karan nde, Mari wara-koe ma. Anu fenfen ti a fɔ anu kebila-nyɔgɛ ye ko a ni na Mari lɔn bawo anu dama si a wara-koe lɔn tɛrr! Ka a dabira a dɔgɔmɛnu ma ha ka a sigi a kinamɛnu ma, bɛɛ si nde, Mari lɔn a kila-bɛrɛbɛrɛ fɛ.”

¹²Alla ko, “N si anu hakɛ makoto. N ti n hɛnkili to anu sɔn-yogomɛ ko tun.”

¹³Alla ya sarama-kan-kurɛ kiri min kɛ, a fɔlɔtɛ ara ma a kɔrɔmɛ la, ado fan min bara kɔrɔya ka tinya, wo ti mɛ tununa yen!