Read Kuranko Yemesi 1 Bible Online

Yemesi 1 - Kuranko bible

Yemesi 1

¹ Alla anubɛ Mari Yisa, Allata-Mɔgɔ-Yabɔnɛla wɔli-kɛlɛ, Yemesi le ye kɛdi kɛ sɛbɛla. N bi Allala mɔgɛ bɛɛ kɔndɔnna minnu nyɛnsɛnnɛ duninya kan tinɛ bɛɛ rɔ.

²N na-kelen-nyɔgɛnu Kirasiti rɔ, wo wa don kɔrɔbɔli-subolo-siyamɛ rɔ tumɛ min, wo ni wo bɛɛ lɔn sewɛ la.

³Wo ni a lɔn ko anu ba wo kɔrɔbɔ wola dɛnkɛninyɛla ko la tumɛ min, wo si a ma, wo ni wo munyu.

⁴Wo ni a lɔn serr, ko wola munyɛ wo da wa fa, do si sa wola sɔn-nyimayɛ kuma alako wo da ni fa feu!

⁵Ni min hɛnkili dasanɛ, wo tigi ni Alla matara. A si hɛnkili di a ma bawo Alla le si mɔgɛ kɔ foninsereyɛ la. A si sewa wo tigi la, ado a ti mɔgɔ lafɛya.

⁶Kɔnɔ wo wa Alla matara tumɛ min, wo ni wola lanayɛ sa a kuma feu! Wo kana sika hali, ado ni min bara sika, wo tigi mani de iko kɔgɔ-yi ye ta-ni-sɛgi kɛla fɔnyɔ bolo nya min.

⁷Wo mɔgɔ-sufa kana a miri ko a si fen sɔrɔn Mari bolo

⁸bawo a ye koe min bɛɛ kɛla, a kunyɛ rabasannɛ, a ti ko-wo-ko latɛgɛ a nyɛrɛ wara-koe rɔ.

⁹Ma ta-nyɔgɛ bolo-kolɔnnu ni sewa bawo Alla ara anu lɔn nɔnfulu-tigi la.

¹⁰Alla wa ma ta-nyɔgɛ nɔnfulu-tiginu famayigi, wonu bɛrɛn ni sewa bawo anuna nɔnfuli si ban tiriya iko kɔn-fere.

¹¹Tele wa yɛlɛ, a wuyan si kɔn-fere wo lafɔsɔ. A fere si yalan. Ala kinyɛ si tinya pɔ! Nɔnfulu-tiginu fanan wara-koe si ka-a-la wo nya na le anu tenbi anuna ko ladannu na.

¹²Mɔgɔ-sewanɛ le wo mɔgɛ la min si lanayɛ kɛ kɔrɔbɔlɛ rɔ bawo ala kɔrɔbɔlɛ wa ban tumɛ min, a si barayi min sɔrɔn, wo le a niyi-bɛrɛ la. Minnu bara Alla keni, Alla ara lanyiri kiri wonu ye ko a si barayi di anu ma.

¹³Ko-yogoma-kɛ-sɔgɛ wa mɔgɛ do bira, a kana a fɔ ko Alla le ya a sɔ wo ma-tinɛ bawo ko-yogoma-kɛ-sɔgɛ ti Alla bira, ado Alla fanan ti mɔgɔ-wo-mɔgɔ sɔ ko-yogoma-ma-tinɛ.

¹⁴Sɔn-yogoyɛ min bi mɔgɔ yisi rɔ, wo le si a ma, a ni ko-yogomɛ kɛ.

¹⁵Ata ko-yogomɛ min bi a yisi rɔ, wo si buyi bi ka mui hakɛ la. Hakɛ wa tagbaya a kuma tumɛ min, a si a laban sayɛ ma.

¹⁶N diyana na-kelen-nyɔgɛnu, mɔgɔ kana wo yanfa!

¹⁷Kɔ-fen-nyimɛ-bɛɛ anubɛ kɔ-fen-kanbalinɛ-bɛɛ ye bɔla Arinyɛni tɔ. A ye yigila ka bɔ Alla bolo min ya san-koleta wan-takɛ-fannu dan. Ale Alla ti yɛlɛma iko ninɛ yɛlɛmanɛ ye nya min.

¹⁸Ka a tɛgɛ ala keninteyɛ ma mala ko la, a ya ma ma ala dan la kamasɔrɔn a ya tonya-bɛrɛ di ma ma iko a ya a latɛgɛ nya min. A ya wo ma alako male ni sɔ-tina-fɔlɔtɛ sɔrɔn ala dali-fan bɛɛ tɛma. A halalɛ le male la gbɛ!

¹⁹N diyana-mɔgɛnu, wo ni wo hɛnkili to kɛ ko! Mɔgɛ bɛɛ ni a kaliya ko-lamɔɛnna kɔnɔ a kana kuma yona. A kana diminya yona,

²⁰ado mɔgɔta diminyɛ ti Allala telenbagayɛ labɔ gbɛ ma iko a ya a latɛgɛ nya min.

²¹Wo ni ko-latinyanɛ bɛɛ boloka anubɛ kɛ-nya-yoge bɛɛ. Wo ni sɔnnaya Alla ye ka ala kumɛ bira min siginɛ wo yisi rɔ, ado kumɛ wo si ke wo kisila le.

²²Wo kana wo tole masɔ Allala kumɛ la gbansan fɔ ka a kɛ le serr! Wo kana wo nyɛrɛ mayuwaya tolo-masɔɛ dɔrɔn na!

²³Ni min bi a tole masɔla kumɛ la kɔnɔ a sa a birala, wo mani de iko kei min bi a nyɛrɛ mafɛlɛnna nyɛrɛ-mafɛlan rɔ. A si ke ala fɛɛ bɛɛ yenna kɔnɔ a sa wo fenfen tabɛnna.

²⁴A wa a nyɛrɛ mafɛlɛn, a ni ta a ye, wo kɔma, a ye nya min nun, a ni nyina wo ko salon!

²⁵Kɔnɔ Allala tɔn-kanbalinɛ min si mɔgɔ hɔrɔya, mɔgɛ ni to wo mafɛlɛnna. Mɔgɔ-wo-mɔgɔ wa a yigi sa a rɔ, ado a ma a tole masɔ dɔrɔn ka a yili bɔ kumɛ wonu ko, Allatala ye nyinina min ma, a ye wo bɛɛsi mala. Wo tigi wa a bole bila ko-wo-ko rɔ, Alla si a lasabati.

²⁶Ni mɔgɛ do ya a miri ko Allata mɔgɛ le ale la, ni a ma a dɛ mara, fuyi le ala dina wo la. A ye a nyɛrɛ mayuwaya tinɛ le dɔrɔn.

²⁷Ma Fa Alla si sɔn dina min ma, wo le kɛ la. Wo tigi ni kelennɛnu anubɛ kɛɛ-musinu dɛnbɛ anuna tɔrɔyɛ rɔ. A ni a nyɛrɛ sɛninyanɛ mara duninya-ko-yogomɛ-bɛɛ ma. Dina kɛ, fɛɛ-wo-fɛɛ sa a la, ado dina-latinyani ma.