Read Kuranko Yemesi 5 Bible Online

Yemesi 5 - Kuranko bible

Yemesi 5

¹Nba, wole nɔnfulu-tiginu, wo ni wo tole masɔ bɛrɛkɛ! Wo ni gbele-gbelen ka di yakɔrɔ-mamɔɛ wola ko la min bi nala wo yarɔ!

²Wola nɔnfulinu bara tuli ka ban feu! Kisinu bara wola kura-hakikɛnu dɔn sa!

³Wola sɛnɛ anubɛ wodi-gbɛ, mɔlɔn[3] sa a la tun. Wo ara nɔnfuli ladɛn tele-laban kɛnu kɔrɔ kɔnɔ wo si ma sereyɛ la wo kan ma ka wo fɛrɛ-bɔnkɛnu don tɛ rɔ pon!

⁴ Mɔgɛ minnu wɔlita wo ye wola sɛnɛnu tɔ, wo ya wonu kensunya. Alla ara wola yasere-masa-kan lamɔɛn. Nba, minnu ya wola fui-fan tɛgɛ ka a ladɛn wo ye, wonu di-kɛ-kan ara ke Mari Alla Sɛnbɛ Bɛɛ Tigi tole rɔ!

⁵Wo siyi duninya kɛ rɔ, a fanɛ ladiyɛ anubɛ nyɛrɛ-diyana-ko-gbansan le la. Wo ara wo nyɛrɛ matɔlɔ wo kan-natɛgɛ-tele ye.

⁶Wo ara mɔgɔ-magbalanɛnu yiliki ka anu faga. Sɛ sa anu ye ka wo kɛlɛ.

⁷Nba, n na-kelen-nyɔgɛnu, wo ni wo muin ha Mari ni na. Wo ni sɛni-salɛta munyu-nya mafɛlɛn. A ye ala sɛnɛ makɔnɔna munyu-ba rɔ, ha a ni banda-yi-kun-fɔlɔtɛ anubɛ a laban sɔrɔn. A ye a fɛ, ala ki-fannu ni ma-a-la ka nanfa.

⁸Wole fanan ni wo munyu! Wo ni wo yigi don gbɛn, bawo Mari na-wati ara gbɛrɛn.

⁹N na-kelen-nyɔgɛnu, wo kana gbunya wo nyɔgɔn kɔrɔ, ni wo ma, Alla si wo kiti tɛgɛ. Wo ni wo yɛ lata. Kiti-tɛgɛlɛ sɔnɛ dɛ la. A sɔgɛ ye a la, a ni don.

¹⁰N na-kelen-nyɔgɛnu, nɛbi minnu kumara Mari tɔgɛ rɔ, wo ni wo hɛnkili to wonu ko. Wonu bara anu munyu tɔrɔyɛ kɔrɔ nya min ha a laban, wo ni ma misalɛ la wo ye.

¹¹ Ma ye mɔgɔ-munyanɛnu kelela ko mɔgɔ-sewanɛ bawo anu bara anu munyu. Wo ma Yobuta munyu-koe lamɔɛn, ba? Ado nfan, Mari ya Yobu makoe nyinya nya min a laban, wo ma wo lɔn fanan, ba? Wo mara bawo Mari fanɛ kinikinɛ anubɛ hinɛ la.

¹² N na-kelen-nyɔgɛnu, kuma-kolomɛ le kɛ la. Wo tenbi lanyiri kirila tumɛ min, wo kana wo gboro. Wo kana wo gboro san-kole rɔ, ni wo ma, dugu-kole rɔ, ni wo ma fanan, fenfen tɔ. Wo ni a fɔ dɔrɔn ko, “Ɔnde,” ni wo ma, “Ade.” Wo le ya a to, wo ti hakɛ kɛ ka yiliki sɔrɔn Alla bolo.

¹³Mɔgɛ donu tɔrɔnɛ wo tɛma, wa? Anu ni Alla matara. Donu sewanɛ, wa? Anu ni tantoli-bɛti bɔ.

¹⁴ Donu kirɛ wo tɛma, wa? Anu ni chɔchi-mɔgɔ-banu kele. Wonu ni Alla matara a ye ka ɔlifi-tuli kɛ a ma Mari tɔgɛ rɔ.

¹⁵Alla-matarɛ min kɛnɛ dɛnkɛninyɛ rɔ, wo si kirayatoe lakisi. Mari si a lakɛndɛya, ado a ara hakɛ minnu kɛ, wonu ma si koto.

¹⁶Nba, wo ni wo sɔ wo hakɛnu na wo nyɔgɔn ye ka Alla matara wo nyɔgɔn ye. Wo le ya a to, wo si kɛndɛya. Sɛnbɛ-ba ye mɔgɔ-telennɛta Alla-matarɛ rɔ.

¹⁷ Nɛbi Ilaya, mɔgɛ le nun iko male. A ya Alla matara a yisi bɛɛ la ko bandɛ kana na. Bandɛ ma na dugu-kole kuma san sawa ani a tala.

¹⁸ A ya Alla matara tun. Bandɛ nara. Ki-fan minnu bi dugu-kole kuma, wonu nanfara ka sabati tun.

¹⁹N na-kelen-nyɔgɛnu, ni do samara wo tɛma ka tonyɛ boloka, ni mɔgɔ-gbɛrɛ ya a lasɛgi tonya-kilɛ ma tun,

²⁰ wo ni wo hɛnkili to kɛ ko, min ba hakɛ-tigi yɛlɛma ka bɔ a hakɛ-kilɛ fɛ, wo si hakɛ-tigi wo niyi lakisi sayɛ ma ka a ma, hakɛ siyamɛ ma ni koto.