Read Kuranko 2 Pita 2 Bible Online

2 Pita 2 - Kuranko bible

2 Pita 2

¹Foninya-nɛbinu bi fɔlɔ-mɔgɛnu tɛma nya min nun, foninya-karan-mɔgɛnu si taran wo fanan tɛma wo nya na le. Anu si na foninya-karan la, min si halakilɛ kɛ. Mari min ya anu hɔrɔya, anu ya anu kan-kɔ sɔ wo la. Wo si halaki-lakalimɛ lana anu nyɛrɛ kuma.

²Hali wo, mɔgɔ siyaman si bila anu sɔn-yogomɛ fɛ. Mɔgɛnu si kuma-yogomɛ fɔ ka a bɛn kila-bɛrɛ ma foninya-karan-mɔgɔ wonuna ko-ladan-nya ma.

³Ka a tɛgɛ foninya-karan-mɔgɛ wonuna wasabɛlitayɛ ma, anu si to tɔnɛ sɔrɔnna wo kuma anuna foninya-kumɛnu fɛ. Anuna kiti-tɛgɛlɛ rabɛnnɛ le, bi ma, ado anu halakiyi ye a yɛ la feu!

⁴Melika minnu fɔlɔn ya hakɛ kɛ, Alla ma wonu yamasansan. A ya anu nakɛ Nyahanama rɔ ka yɔlɔkɛ kɛ anu ma pinpi rɔ kiti-tele makɔnɔ tinɛ nyɔ.

⁵ Alla ma fɔlɔ-mɔgɛnu fanan yamasansan. A ya yi-wa-belebele lana mɔgɔ-yogomɛ wonu kuma. A ya minnu kisi, fɔ Nowa anubɛ ala denbayɛ mɔgɔ wɔrɔnfila. Nowa ya kawandili bɔ ka a bɛn telenbagayɛ ma.

⁶ Alla ya Sɔdɔm anubɛ Kɔmɔra soenu kiti ka anu halaki tɛ la. A ya anu ma misalɛ la min si ma ko-yogoma-kɛlɛnu na ka wo yira anu na yarɔ.

⁷ Mɔgɔ-nyimɛ do siginɛ anu tɛma min tɔgɛ Lɔti. Wo ye anu kɛ-nya-yogomɛ wonu tayenna ka a lamɔɛn tele-wo-tele. A sɔndɔmɛ tɔrɔta anuna tɔn-tinyɛla ko la kati! Woletɔ Alla ya a kisi.

⁹A melika-yogoma wo, a fɔlɔ-mɔgɔ wo, a Sɔdɔm anubɛ Kɔmɔra kɛnu wo, Mari ya wonu halaki-nya lɔn min kɛ, a ya Allata mɔgɛnu kisi-nya lɔn anuna kɔrɔbɔlɛnu tɔ wo nya na le. A ya a lɔn fanan, a si ko-yogoma-kɛlɛnu mara nya min tɔrɔyɛ rɔ ha kiti-tɛgɛ-lunyɛ.

¹⁰Ado minnu bi tagamana anu fɛrɛ-bɔnku-nata fɛ, hali ka Allala mansayɛ lafɛya, a si a lagbɛlɛya wonu kuma. Foninya-karan-mɔgɛ wonu wasira. Anu si anu nyɛrɛ kɔrɔbi kati! Melika-gbiliyanɛ minnu bi san ma, anu ti wonu gbiliya mumɛ, fɔ ka to wonu mɔɛnna.

¹¹Hali melika-nyimɛ minnu sɛnbɛ kolo foninya-karan-mɔgɔ wonutɛ ko pon, anu ti melika-yogomɛ wonu nafɛya Mari yakɔrɔ.

¹²Anu ma koe minnu nya-yen, anu bi wonu nafɛyala. Anu manɛ iko firarɔ-soge minnu ti anu miri anuna ko-ladan-nyanu ma fɔ ka bila anu kun fɛ. Anu nadannɛ anu bira-koe anubɛ anu faga-koe le la tun, ado anu si na halaki iko firarɔ-sogenu.

¹³Anu bara mɔgɛnu tɔrɔ min kɛ, anu si na tɔrɔyɛ wo sarɛ sɔrɔn. Min si anu fɛrɛ-bɔnku-nata wasa hali tele rɔ, anu diyana-koe le wonu na. Anu ba kofu wo ma fen dɔn tinɛ tuma-wo-tuma, anu si na miliyɛ anubɛ lafɛyɛ la anu bolo. Anu bi sewala anuna kisimiriya-koenu tɔ tolon!

¹⁴Anu ba musu-wo-musu yen, anu bi nyinina wo ma. Nata-yogomɛ min bi anu yisi rɔ, wo ti anu wasa mumɛ! Mɔgɛ minna dɛnkɛninyɛ sɛnbɛ sa, anu bi wonu nadonna hakɛ rɔ iko gbɛrɛ-lasiginɛ. Anu burɛ lafanɛ nata la, ado anu bi Allala dankɛ kɔrɔ!

¹⁵Anu bara kila-telennɛnu boloka, ha kilɛ wo ara to-a-rɔ anu ma. Anu bara bila Beyorila den Belamta kilɛ fɛ bawo wo duruta wodi sɔrɔnna ala ko-yogoma-kɛ le tɔ,

¹⁶ado Belamta sofɛlɛ ya mɔgɔni-gbu-kan fɔ ka ale Belam makuma ala tɔn-tinyɛla ko la. Wo kumara a ye alako nɛbi wo ni sɛgi ka ata yuwayɛ boloka.

¹⁷Foninya-karan-mɔgɔ wonu mani de iko tenke min gbalanɛ a wɔrɔn la. Anu mani de fanan iko fɔnyɔ wa sigi banda-finyɛ min kɔrɔ. Alla ara pinpi-fin-bɛ mara anu denu denu ye.

¹⁸Anu bi anu nyɛrɛ matɔgɔla gbɛ ko-fuyinu tɔ. Anu bi nata-yogomɛnu kɛla alako ka wonu bira minnu kisi-san ka bɔ mɔgɔ-samanɛnu tɛma.

¹⁹Anu bi lanyiri kirila wonu ye hɔrɔyɛla ko la kɔnɔ anu nyɛrɛ ye yɔɔnyɛ rɔ halakiyi bolo, ado fenfen si mɔgɔ nɔ, wola yɔɔn le ile la.

²⁰Minnu bara ma Mari anubɛ ma Kisilɛ Yisa Kirasiti lɔn ka bɔ duninya ko-tinyanɛnu ma, ni anu sɛgira ko-tinyanɛ wonu ma tun, ha wonu ni anu nɔ, mɔgɛ wonuna ban si yogoya ka tenbi a fɔlɔtɛ la.

²¹Yanni anu ni bɔ kila-bɛrɛ fɛ, anu ya min lɔn kɔrɔma la, a fisa nun, hali wonu ma telenbagaya-kilɛ wo lɔn nun ka anu kan-kɔ sɔ Allata tɔn-sɛnimɛnu na min bara di anu ma fɔlɔn.

²² Tili min ko, “Wuli ara sɛgi tun ka a teseri dɔn,” wo ara ma tonyɛ la. Tili min ko, “Kɔsɔ-kunɛ, wo ara sɛgi ka a sa bore rɔ tun, tonyɛ le wo fanan na.”