Read Kuranko 1 Yɔni 2 Bible Online

1 Yɔni 2 - Kuranko bible

1 Yɔni 2

¹N diyana-dannu, n bi kɛ sɛbɛla wo ma alako wo kana hakɛ kɛ kɔnɔ ni wo do ya hakɛ kɛ, Yisa Kirasiti ye ma bolo. Mɔgɔ-latelennɛ le ale Yisa wo la min bi ma Fa Alla matarala mala ko la,

²ado Kirasiti nyɛrɛ mara sarakɛ la min ya ma hakɛnu makoto. Male dɔrɔnta hakɛ ma, fɔ mɔgɛ bɛɛtɛ.

³Ma ya Allala tɔnnu bira min kɛ, ma ara la a la worɔ ko ma ya ale lɔn!

⁴Kɔnɔ ni mɔgɛ do ko a ya Alla lɔn kɔnɔ a sa ata tɔn birala, foninya-fɔlɛ le mɔgɛ wo la. Tonya sa a bolo.

⁵Ni min bi Allala kumɛ birala, mɔgɛ le wo la minna keninteyɛ ara kanbali Alla wara la. Ni min ko a tonɛ Alla rɔ tuma-wo-tuma, fɔ a ni ko ladan iko Yisa Kirasiti ya a ma nya min. Ma si a lɔn wo le fɛ ko ma ye Alla rɔ.

⁷ N diyana-mɔgɛnu, n bi tɔn min sɛbɛla wo ma kɛ la, a kura ma. Tɔn-kɔrɔ-kɔrɔmɛ le wo la min bi wo bolo kebi fɔlɔfɔlɔ. Karan le wo la, wo ara min namɔɛn nun.

⁸Hali wo, n bi tɔn-kurɛ do sɛbɛla fanan. Tonya-karan wo si yen wobɛ Kirasiti rɔ, ado pinpi ye nala tenbila ka ban. Wan-bɛrɛ ye bɔla le kaka.

⁹Ni min ko a ye waan rɔ kɔnɔ hali wo, gboyanayɛ ye anubɛ a na-kelen-nyɔgɛ do tɛma, wo tigi ye pinpi le tɔ ha kaka.

¹⁰Ni min bi a na-kelen-nyɔgɛ kenina, wo tigi ye waan rɔ. Nba, fenfen sa ale nyɛrɛ rɔ min si mɔgɔ-gbɛrɛkɛ ladon hakɛ rɔ.

¹¹Kɔnɔ ni gboyanayɛ ye anubɛ a na-kelen-nyɔgɔn tɛma, wo tigi ye pinpi rɔ. A ye tagamana pinpi rɔ. A ma a ta-tinɛ lɔn hali, bawo pinpi ara a fiyonya.

¹²N diyana-dannu, n bi do sɛbɛla wo ma bawo wo hakɛ ma ara koto Kirasiti tɔgɛla ko la.

¹³N fanu, n bi do sɛbɛla wo ma bawo wo ya Alla lɔn min bi nyɔ kebi fɔlɔfɔlɔ. Fonikenu, n bi do sɛbɛla wo ma bawo wo ara Setanɛ nɔ.

¹⁴Nna dannu, n bi do sɛbɛla wo ma bawo wo ya ma Fa Alla lɔn. N fanu, n bi do sɛbɛla wo ma bawo wo ya ale lɔn min bi nyɔ kebi fɔlɔfɔlɔ. Fonikenu, n bi do sɛbɛla wo ma bawo sɛnbɛ ye wole bolo. Allala kumɛ siginɛ wo yisi rɔ, ado wo ara Setanɛ nɔ.

¹⁵Wo kana duninya keni, anubɛ fan minnu bi duninya rɔ. Ni wo ya duninya keni, ma Fa Alla keni-ko sa wo yisi rɔ worɔ.

¹⁶Fɛrɛ-bɔnku-nata wo, mɔgɛnu yɛ si bɔ min na wo, min sɔgɛ si mɔgɛ bira wo, anubɛ fenfen min bi duninya kɛ rɔ, kɛ fenfen ma bɔ ma Fa Alla bolo. Mɔgɛnu wasinɛ wonuna ko la. Duninyatɛ le kɛ bɛɛ la.

¹⁷Duninya anubɛ fan min bɛɛ ye a rɔ, min sɔgɛ si mɔgɔ bira, wonu bi tenbila le. Kɔnɔ ale min bi Alla diyana-koe kɛla, wo ye tola le habadan!

¹⁸Nna dannu, tele-laban-lunyɛ ara gbɛrɛn! A fɔra wo ye ko Kirasiti-yogo-finma-wɛ wo si na. Nba, Kirasiti yogo siyaman bara ban bɔla gbɛ rɔ hali kaka. Woletɔ ma ya a lɔn ko tele-laban-lunyɛ ara gbɛrɛn.

¹⁹Mɔgɔ-yogomɛ kɛnu bi ma kurun tɔ nun kɔnɔ anu bɔra ma fɛ. Ni mala mɔgɔ-bɛrɛbɛrɛ le anu na nun, anu si to ma fɛ nun. Kɔnɔ anu bɔra ma fɛ min kɛ, a ara bɔ gbɛ rɔ worɔ ko anu fenfen sa ma kurun tɔ tun.

²⁰Kɔnɔ Kirasiti ara ata Ni-Sɛnimɛ labɔn wole kuma nun. Woletɔ wo dama ara tonyɛ lɔn.

²¹Ka a fɔ ko n bi kɛdi sɛbɛla wo ma bawo wo ma tonyɛ lɔn, wo ma de! N bi wo mala le bawo wo ya tonyɛ lɔn, ado wo ya a lɔn fanan ko foninyɛ ti bɔ tonyɛ rɔ muk!

²²Foninya-fɔlɛ ye yon na? Min bi a fɔla Yisa ma ko Allala-Mɔgɔ-Yabɔni ma, ale Kirasiti-yogo-finma-wɛ le wo tigi la. Foninya-fɔlɛ le wo la. Wo tigi ye a banna ma Fa Alla anubɛ ala den Yisa la,

²³ado min bi a banna Allala dan la, wo tigi ye a banna ma Fa Alla fanan na. Min bi Allala dan rabirala, ma Fa Alla fanan bi wo tigi bolo.

²⁴Wo ya karan min namɔɛn fɔlɔ, wo kana nyina wo ko. Wo ni a mara wo yisi rɔ gben! Wo ya min namɔɛn fɔlɔ, ni wo tora wo yisi rɔ, wo si to Allala dan anubɛ a Fa rɔ worɔ tuma-wo-tuma.

²⁵Kirasiti nyɛrɛ ya lanyiri min kiri ma ye, wo le kɛ la. A ko a si habadan-nimayɛ di ma ma.

²⁶Minnu bi anu tayala ka wo yanfa, n bi kɛdi kɛ sɛbɛla wonu ma wonuna ko la.

²⁷Kirasiti ara ata Niyi labon wole kuma. Fananta ala Niyi ye wo rɔ wo mako sa karan-mɔgɔ la tun, ado ata Ni-Sɛnimɛ ye wo karanna koe bɛɛ la. A ye karan min kɛla, tonyɛ le, foninya ma de! Wo ni ata Ni-Sɛnimɛla karan bira worɔ iko a ya wo karan nya min ko wo ni to Kirasiti rɔ.

²⁸Ɔnde, n diyana-dannu, wo ni to ale rɔ. Woletɔ a wa bɔ gbɛ rɔ tumɛ min, ma si fa yisi-latɛgɛ la. A wa na wo tele rɔ, ma ti ma dogon a ma miliyɛ bolo.

²⁹Wo hɛnkili ni to kɛ ko. Kirasiti, mɔgɔ-latelennɛ le. Wo ni a lɔn worɔ ko min bɛɛ si ko-latelennɛ kɛ, Allata dan le wo tigi la.