Read Kuranko 1 Yɔni 4 Bible Online

1 Yɔni 4 - Kuranko bible

1 Yɔni 4

¹N diyana-mɔgɛnu, mɔgɛ min ko Allata Ni-Sɛnimɛ ye a bolo, wo kana la wo bɛɛ la fɔ ka a kɔrɔbɔ. Wo ni wo ma alako niyi min bi a bolo, wo ni a lɔn ni wo bɔnɛ Alla le bolo. Wo ni wo ma bawo foninya-nɛbi-siyaman bara wuli kan bɛɛ rɔ.

²Wo si a lɔn wo le fɛ ni Allatalata Niyi le a fɛ—min bɛɛ si a lawasa a dɛ la ko Yisa Kirasiti le hadama-dan la, Allala Niyi ye wo tigi bolo.

³Kɔnɔ ka a fɔ ko Yisa Kirasiti mara hadama-dan la, ni min si wo masɔsɔ, Allala Niyi sa wo yisi rɔ. Niyi min bi mɔgɛ wo rɔ, wo bɔnɛ Kirasiti-yogo-finma-wɛ le bolo, ado wo ara a lamɔɛn nun ko a yogo-finma-wɛ wo ye nala. Nba, kaka a ara na duninya rɔ.

⁴N diyana-dannu, Allatɛ le wole la. Wo ara foninya-nɛbi wonu nɔ bawo ata Ni-Sɛnimɛ min bi wole rɔ, wo sɛnbɛ kolo doinuta niyi ko, duninyatɛ ye minnu na, kɔni.

⁵Duninyatɛ ye nɛbi wonu na min kɛ, anu bi duninya-koenu fɔla. Woletɔ duninyata mɔgɛnu bi anu tole masɔla anu na.

⁶Kɔnɔ Allatɛ le male la. Ma si dan-nafarɛ lɔn tonya-niyi anubɛ foninya-niyi tɛma kɛ le fɛ—min ya Alla lɔn, wo si a tole masɔ male la. Allata ma min na, wo ti a tole masɔ ma la.

⁷N diyana-mɔgɛnu, ma ni ma nyɔgɔn keni bawo keninteyɛ bɔnɛ Alla le bolo. Keninteyɛ ye min bolo, Allala dan le wo tigi la. A ya Alla lɔn.

⁸Keninteya sa min bolo, wo tigi ma Alla lɔn bawo Alla le keninteyɛ la.

⁹Alla ya ala keninteyɛ yira ma la kɛ le fɛ ko a ya ala den kelen pe lana duninya rɔ alako ma ni nimayɛ sɔrɔn a fɛ.

¹⁰Keninteya-bɛrɛ le kɛ la—ka a fɔ ko ma ya Alla keni, wo ma, fɔ ko ale ya male keni. A ya ala den Yisa lana alako a ni ma sarakɛ la min ya mala hakɛ makoto.

¹¹N diyana-mɔgɛnu, ni Alla ara male keni wo nya le, a fisa, male fanan ni ma nyɔgɔn keni wona!

¹² Mɔgɔ ma Alla yen fɔlɔn. Kɔnɔ ni ma ya ma nyɔgɔn keni, Alla ara sigi ma yisi rɔ. Ala keninteyɛ ara kanbali male wara la.

¹³A ara a Niyi di ma ma min kɛ, ma ya a lɔn ko male ye Alla rɔ, Alla ye male rɔ.

¹⁴Ma ara a yen ka a fɔ doinu ye ko ma Fa Alla ara ala dan, Yisa lana alako a ni ma duninya kisilɛ la.

¹⁵Min si a lawasa a dɛ la ko Yisa, Allala dan le, Alla ye wo tigi rɔ, ado wo ye Alla rɔ.

¹⁶Male nyɛrɛ ya keninteyɛ wo lɔn min bi Alla bolo male ye, ado ma lanɛ keninteyɛ wo la gben! Alla le keninteyɛ la. Min tonɛ keninteyɛ rɔ, wo tigi ye Alla rɔ, Alla ye ale fanan tɔ.

¹⁷Ma si a lɔn kɛ le fɛ ko ni Allata keninteya-kanbalinɛ ye male rɔ, ado ni ma sigi-bole duninya kɛ rɔ wonubɛ Kirasititɛ, kelen de, ma ti kilan kiti-tɛgɛ-lunyɛ ma.

¹⁸Kilan-ko sa keninteyɛ rɔ mumɛ! Allata keninteya-kanbalinɛ si kilan bɔ ma rɔ. Woletɔ kilan ye min tɔ, keninteya-kanbalini sa wo tigi rɔ bawo kilan-koe tugunnɛ tɔrɔyɛ le la.

¹⁹Ma si ma nyɔgɔn keni bawo Alla fɔlɔn ya male keni.

²⁰Ni mɔgɛ ko a ara Alla keni, hali wo, a na-kelen-nyɔgɛla ko lamaranɛ a yisi rɔ, foninya-fɔlɛ le wo tigi la. Ma ara ma na-kelen-nyɔgɛ min yen, ni ma ma wo keni, Alla don, ma ma min yen bɛ? Ma si a fɔ kama ko ma ye wo kenina?

²¹Kirasiti ya tɔn kɛ di ma ma—a ko min bi Alla kenina fɔ wo ni a na-kelen-nyɔgɛ keni fanan.