Read Kuranko 1 Yɔni 5 Bible Online

1 Yɔni 5 - Kuranko bible

1 Yɔni 5

¹Min lanɛ a la ko Allata-Mɔgɔ-Yabɔnɛ le Yisa la, Allala dan le wo tigi la. Ma Fa Alla di min ye, ma Fa Allala dan di wo fanan ye.

²Ma ya a lɔn ko ma ara Allala dan keni kɛ le fɛ bawo ma ye Alla kenina ka ata tɔnnu bira.

³ Ka Alla keni, wo le ko ma ni ala tɔnnu bira, ado ala tɔn-bira-koe ma gbɛlɛ ma kuma

⁴bawo Allala dan bɛɛ si ke duninya nɔla. Ma si duninya nɔ mala dɛnkɛninyɛ le fɛ.

⁵Yon si ke duninya nɔla? Fɔ wonu dɔrɔn minnu lanɛ a la ko Yisa, Allala dan le.

⁶Yisa Kirasiti nara yi anubɛ yele[1] le fɛ. A ma na yi gbansan fɛ fɔ a filɛ bɛɛ, yi wo, yele wo. Ata Ni-Sɛnimɛ nyɛrɛ ye a mayirala ko tonyɛ le kɛ la bawo ata Ni-Sɛnimɛ, tonyɛ le,

⁷ado sereya sawa ye nyɔ—

⁸Allata Ni-Sɛnimɛ wo, yi wo, anubɛ yele. A sawɛ bɛɛ, kan kelen.

⁹Ni ma lanɛ mɔgɔna-sereyɛ la, nfenna ma ti la Allala sereyɛ la? Wo kolo mɔgɛnutɛ ko, ado Alla ara ban sereyɛ bɔla ala danla ko la.

¹⁰Woletɔ ni min lanɛ Allala dan la, sereyɛ kɛ ye wo bolo a yisi rɔ. Kɔnɔ min ma la Alla la, wo ara Alla ma foninya-fɔlɛ la bawo Alla ara sereyɛ min bɔ ata danla ko la, a ma la wo la.

¹¹ Wo sereyɛ le kɛ la ko Alla ara habadan-nimayɛ di male ma, ado mala nimayɛ kɛ ye ala dan, Yisa bolo.

¹²Allata dan ye min bolo, nimayɛ kɛ ye wo bolo. Allata dan sa min bolo, nimaya sa wo tigi bolo.

¹³N bi kɛ sɛbɛla wo ma alako wo ni a lɔn ko habadan-nimayɛ ye wo bolo, wole min bara dɛnkɛninya Allala den Yisa ma, kɔni.

¹⁴Wo le ya a to, yisi-latɛgɛ ye ma bolo Alla yala ko ni ma ya a matara fenfenna ko la, ale sako ye min na, a si ma kan lamɔɛn,

¹⁵ado ma wa a matara tuma-wo-tuma, a ye ma kan lamɔɛnna. Ma ya a lɔn ko tonyɛ le kɛ la. Ma ya a lɔn fanan ko ma wa a matara min na, a ara ban wo dila ma ma.

¹⁶Min ba a na-kelen-nyɔgɛ yen hakɛ kɛla, min ti a ma, a ni foo habadan-nimayɛ la, a ni Alla madiya mɔgɛ wo ye. Alla si niyi di hakɛ-tigi wo ma. Minta hakɛ ti a ma, a ni foo habadan-nimayɛ la, n bi wonu denu ma. Kɔnɔ hakɛ do ye nyɔ min si a ma, a ni foo habadan-nimayɛ la.[2] N ma a fɔ ko wo ni Alla madiya wola ko la.

¹⁷Koe min bɛɛ ma telen, hakɛ le wo la kɔnɔ hakɛ do ye nyɔ min si a ma, a ni foo habadan-nimayɛ la.

¹⁸Ma ya a lɔn ko Allala den-bɛrɛ ye minnu na, wonu fenfen ti to hakɛ kɛla bawo Allala dan ye anu kandanna. Setanɛ ti ke anu madumala.

¹⁹Ma ya a lɔn fanan ko Allatɛ le male la kɔnɔ duninya bɛɛ ye Setanɛta sɛnbɛ kɔrɔ.

²⁰Min tugunnɛ wo la, ma ya a lɔn ko Allala dan ara na nun, ado a ara hɛnkili di ma ma alako ma ni Alla-bɛrɛ lɔn. Wo ara a yira ko mabɛ Alla anubɛ ala den Yisa Kirasiti min bi Allayɛ la, ma ara tugun ma nyɔgɔn na ka to ko kelen tɔ. Habadan-nimayɛ le ale la fanan.

²¹Woletɔ n diyana-dannu, wo ni wo nyɛrɛ matanka bɛsi-kɔ-koe ma!