Read Kuranko Kɛlɛ-Kurugbɛnu 10 Bible Online

Kɛlɛ-Kurugbɛnu 10 - Kuranko bible

Kɛlɛ-Kurugbɛnu 10

¹Abimɛlɛki faganɛ, Dodo mamanɛ, Puwala den Tola mara kɛlɛ-kurugbɛ la Isirɛla mɔgɛnu kuma. Isakari bɔnsɔn-mɔgɛ do le wo la. A siginɛ Semiri soe burɔ Ifɛrɛm kɔnkɔ-nyamanɛ rɔ.

²San mogan-ni-sawa kɔrɔ, a ye Isirɛla mɔgɛnu kun na. A fagara tumɛ min, anu ya a togon Semiri soe burɔ.

³Tolata fagɛ kɔma, Yeya bɔra Kilayadi nyamanɛ rɔ. San mogan-ni-fila ale fanan ye Isirɛla mɔgɛnu kun na.

⁴A ya den-kei mɔgɔ bi-sawa le sɔrɔn nun. Wo bɛɛsi sofɛlɛ kelen-kelen. Anu mɔgɔ bi-sawɛ kɛnu bi kun-tigiyɛ la so-kun bi-sawa kun na Kilayadi nyamanɛ rɔ. Ha bi,[17] anu bi soe wonu kelela ko Yeya soenu.

⁵Yeyata fagɛ kɔma, anu ya a togon Kemɔn soe burɔ.

⁶Isirɛla mɔgɛnu ya hakɛ kɛ Mari la tun. Anu tara anuna bɛsɛnu Beyali anubɛ Asitɔra kɔ tinɛ. Wo kɔma, Siriyanuna bɛsɛnu wo, Saidon kɛnutɛ wo, Mohabu kɛnutɛ wo, Amon kɛnutɛ wo, Filisitinuna bɛsɛnu wo, anu ya wo bɛɛ kɔ. Anu ya anu kan-kɔ sɔ Mari la ka anu ban a bato-koe ma.

⁷Mari fonde bɔra Isirɛla mɔgɛnu kuma. A sɔnta ko Isirɛla mɔgɛnu ni to Amonnu anubɛ Filisitinu kɔrɔ.

⁸Isirɛla mɔgɛ minnu siginɛ Amoranu tɛma Yorodan bɛ tele-bɔɛ wara la Kilayadi nyamanɛ rɔ, Filisitinu anubɛ Amonnu bi anu yakɔrɔ-mamɔla san tan-ni-segin kɔrɔ.

⁹Yuda bɔnsɔn-mɔgɔ wo, Bɛnyamɛ bɔnsɔn-mɔgɔ wo, Ifɛrɛm bɔnsɔn-mɔgɔ wo, Amon kɛnu ya Yorodan bɛ tɛgɛ ka ta wonu kɛlɛ. Woletɔ Isirɛla mɔgɛnu tora yakɔrɔ-mamɔ-belebele-wɛ kɔrɔ.

¹⁰Isirɛla mɔgɛnu dira Mari Alla dala ka a fɔ a ye ko, “Ma ara ile mata Alla boloka ka don Beyali bɛsɛnu kɔ-koe rɔ. Ma ara hakɛ kɛ i la.”

¹¹Mari ya anu manyinika ko, “Nde le ma wo lakisi Iyipiti kɛnu anubɛ Amoranu ma, wa? Nde le ma wo lakisi Amonnu anubɛ Filisitinu ma nun, ba?

¹²Nde le ma wo lakisi Saidon kɛnu anubɛ Amalɛkinu anubɛ Midiyan kɛnu[18] ma nun, ba? A fɔlɔtɛ, anu ya wo tɔrɔya kɔnɔ tɔ-a-la, wo dira n dala, n ya wo kunka.

¹³Kɔnɔ hali wo, wo ya nde, Mari boloka ka ta bɛsɛnu nyini wo nyɛrɛ ye, wo si minnu kɔ. Woletɔ n ti wo lakisi tun.

¹⁴Wo ni ta di wola bɛsɛ wonu dala wo ara min nyini wo nyɛrɛ ye. Ni wo ye tɔrɔyɛ le tɔ, nba, anu denu ni wo lakisi.”

¹⁵Kɔnɔ Isirɛla mɔgɛnu ya a fɔ Mari ye ko, “Tonyɛ le, ma ara hakɛ-bɛrɛbɛrɛ-wɛ kɛ. Ni ko-wo-ko diyara i ye, i ni wo ma ma la kɔnɔ i yandi Mari, ma kisi ma yogenu ma bi.”

¹⁶Tiriyante wo rɔ, Isirɛla mɔgɛnu bara don bɛsɛ minnu kɔ-koe rɔ nun, anu bara wonu tinya. Anu donta Mari kelen pe batoe rɔ tun. Mari ara a fonde layigi anuna tɔrɔyɛla ko la.

¹⁷Amonnuna kɛlɛ-dannu ya anu kundɛn ka ta anu daga makɛ Kilayadi. Isirɛla mɔgɛnu fanan ya anu kundɛn ka anu daga makɛ Misipa[19] soe burɔ Kilayadi nyamanɛ rɔ.

¹⁸Isirɛla mɔgɛnuna bɔnsɔn-kunyɛnu ya dunbu kiri. Anu ya a fɔ anu nyɔgɔn ye ko, “Ni min sɔra ma yarɔ ka Amonnu kɛlɛ, Kilayadi nyamanɛ kɛ ye tola wo le bolo.”