Read Kuranko Kɛlɛ-Kurugbɛnu 11 Bible Online

Kɛlɛ-Kurugbɛnu 11 - Kuranko bible

Kɛlɛ-Kurugbɛnu 11

¹Kaliyadila den-kei Yɛfɛta, kerinte le kɔnɔ yɛlan le a na la.

²Kaliyadi halala-musu-furunɛ fanan ya den-keminɛ donu sɔrɔn a ye. Dan wonu koloyara tumɛ min, anu ya Yɛfɛta gben bɔn la. Anu ya a fɔ ale Yɛfɛta ma ko, “Musu-gbɛrɛkɛ-dan le ile la, woletɔ ile ti ma fa kɛɛ-wo-kɛɛ sɔrɔn.”

³Yɛfɛta ya a buri a fala dannu kɔrɔ. A tara a sigi nyamanɛ do rɔ min tɔgɛ Tobu. Kemini-karagbɛlɛnu nara anu nadɛn a fɛ. Ale mara wonuna kun-tigi la.

⁴Wati tenbinɛ, Amonnu tara bui Isirɛla mɔgɛnu ma ka anu kɛlɛ.

⁵Kɛlɛ buinɛ, Kaliyadi mɔgɔ-banu tara Yɛfɛta kele tinɛ Tobu nyamanɛ rɔ

⁶ka a fɔ a ye ko, “Na, i ni ma mala kɛlɛ-kurugbɛ la ka Amonnu kɛlɛ ma ye.”

⁷Yɛfɛta ko, “Wo ara n kɔn nun ha n bara n fa warɛ boloka. Nfenna gbɛ wo ye n kelela bawo wo ara don tɔrɔyɛ rɔ?”

⁸Mɔgɔ-ba wonu ya a fɔ Yɛfɛta ye ko, “Hali wo, ma ara ma ya-lamunun i la bawo a sɔgɛ ye ma la, i ni ma mata kɛlɛ-kurugbɛ la ma dama kun na Kaliyadi nyamanɛ rɔ ka Amonnu kɛlɛ ma ye.”

⁹Yɛfɛta ya a fɔ anu ye ko, “Ni n tara Amonnu kɛlɛ tinɛ, Mari ni a ma, n ni anu nɔ, nba, nde le ye mala wola kun-tigi la worɔ de!”

¹⁰Mɔgɔ-ba wonu ko, “Ma ara sɔn wo ma. Mari le ma sere la. Ma si a ma iko ma ara a fɔ i ye nya min.”

¹¹Yɛfɛta bilara mɔgɔ-ba wonu fɛ. Anu tara. Anu ke Kaliyadi nyamanɛ rɔ, anu ya a ma anuna kɛlɛ-den-kunyɛ la. Anu ke Misipa dagɛ rɔ, anubɛ mɔgɔ-banu ya kumɛ minnu fɔ anu nyɔgɔn tɛma, Yɛfɛta ya kumɛ wonu takaran Mari anubɛ mɔgɛnu yala.

¹²Yɛfɛta ya kilayɛ lata Amonnuna mansɛ ma, anu yogenu, kɔni. A ko, “Sɔsɔli nyamintan[20] bi ma tɛma min bi a tola, i ye nala buila nna nyamanita-mɔgɛnu ma?”

¹³Amonnuna mansɛ wo ya kilayɛ wo kɔfili, a ko, “Ila nyamani ma wo la de! Isirɛla mɔgɛnu bɔra Iyipiti tumɛ min, anu ya mata nyamanɛ le bi ma bolo ka a bi Anɔn bɛ ma ha ka ta a sigi Yabɔki bɛ la Yorodan bɛ tele-bɔɛ wara la. Anu ya wo dama bi male le bolo. Fɔ wo ni a lasɛgi ma ma yisi-kimɛ rɔ.”

¹⁴Yɛfɛta fanan ya kilayɛ lata Amonnuna mansɛ wo ma ko,

¹⁵“Ka a fɔ ko Isirɛla mɔgɛnu bara Amonnuna nyamanɛ anubɛ Mohabu kɛnuna nyamanɛ bi anu bolo, tonya sa wo rɔ.

¹⁶A mara nya min, wo le kɛ la. Isirɛla mɔgɛnu bɔmatoe Iyipiti nyamanɛ rɔ, anu bɔra wula-da-rakolɔn kilɛ la ka na tenbi Kɔgɔ-Yi-Wulen bolɔn doi dafɛ ha anu tara ke Kɛdɛsi soe ma.

¹⁷ Anu ya kilayɛ lata Idɔm mansɛ ma ka a manyinika ko ni a si sɔn anu tenbi-koe ma ala nyamanɛ wo rɔ. Kɔnɔ Idɔm mansɛ wo ma sɔn mumɛ! Wo ya kilɛ tɛgɛ anu ma. Anu ya Mohabu mansɛ fanan manyinika alako anu ni tenbi wo fananna nyamanɛ rɔ kɔnɔ wo fanan ma sɔn nun. Woletɔ ma benbanu ya anu daga makɛ Kɛdɛsi soe burɔ.

¹⁸ “Wo kɔma, anu sɛgira anu kɔma kilɛ la wulɛ rɔ tun alako anu ni Mohabu anubɛ Idɔm nyamanɛnu masangba. Anu ke Anɔn bɛ ma, anu ya anu daga makɛ nyɔ. Anu ma don Mohabu nyamanɛ worɔ bawo bɛ wo, Mohabu kɛnuna nyamani-dan le wo la.

¹⁹Anu ya kilayɛ lata Amoranuna Mansa Saihɔn Hɛsibɔn soe burɔ. Anu ya a manyinika ni a si sɔn alako anu ni tenbi ata nyamanɛ wo rɔ ka ta anu halala-nyamanɛ rɔ.

²⁰Kɔnɔ Mansa Saihɔn ma sɔn Isirɛla mɔgɛnuna tenbi-koe ma nun ata nyamanɛ rɔ. Yanni a ni kilɛ di Isirɛla mɔgɛnu ma, a sɛgira ala kɛlɛ-dannu denu bila ka kilɛ tɛgɛ Isirɛla mɔgɛnu ma Yehasi soe dafɛ ka anu kɛlɛ.

²¹“Kɔnɔ Isirɛla mɔgɛnuta Mari Alla ya a ma, anu ya Mansa Saihɔn anubɛ ala kɛlɛ-dannu nɔ ka Amoranuna nyamanɛ bi anu bolo.

²² Ka a bi Anɔn bɛ ma dugula ha ka ta a sigi Yabɔki bɛ la kantɔ, ka a bi Yorodan bɛ ma ha ka ta a sigi wulɛ la tele-bɔɛ wara la, anu ya wo bɛɛsi bi anu bolo tɛrr!”

²³Yɛfɛta ya a fɔ ale mansɛ ye ko, “Isirɛla mɔgɛnuta Mari Alla le ya Amoranu gben ata mɔgɛnuna ko la. Ile mansɛ lara a la ko sereya i bolo ka nyamanɛ kɛ bi ma bolo?

²⁴Wola bɛsɛ min tɔgɛ Kimɔsi, wo ara nyamanɛ min bɛɛ di wo ma, wo ti wonu namara wo nyɛrɛ ye, wa? Mata Mari Alla ara minnu di male fanan ma, ma ti wonu namara ma nyɛrɛ ye?

²⁵ Ile lara a la ko i tenbira Mohabu Mansa Belaki la, Sipɔla dan, kɔni? Wo ma Isirɛla mɔgɛnu kɛlɛ tele-kelen-bɛrɛni!

²⁶A san kɛmɛ sawɛ le kɛ la, Isirɛla mɔgɛnu siginɛ Hɛsibɔn soe wo, Arɔra soe wo, anubɛ wo dafɛ-so-mɛsɛnu tɔ anubɛ soe minnu bi Anɔn bɛ dafɛ tala. Wo ma wo miri anu bi-koe ma ma bolo fɔ bi, wa?

²⁷Nde ma ko-yogoma ma wo la. A sɔgɛ ye wole la, wo ni ko-yogomɛ ma male la ka ma kɛlɛ? Mari min si kiti tɛgɛ, alamɛ wo ya kiti tɛgɛ wole Amonnu anubɛ male Isirɛla mɔgɛnu tɛma bi.”

²⁸Kɔnɔ Amonnuna mansɛ ma sɔn a tole masɔla Yɛfɛtata kilayɛ wo la muk!

²⁹Marita sɛnbɛ yigira Yɛfɛta kuma. A bɔra Kaliyadi nyamanɛ rɔ ka ta tenbi Manasata nyamanɛ la. A sɛgimatoe tenbira Misipa soe rɔ Kaliyadi nyamanɛ rɔ. A bɔra nyɔ le ka ta Amonnu kan ma.

³⁰Yɛfɛta ya a dakan-don Mari ye ko, “Ni i ya Amonnu don n bolo,

³¹kɛlɛ wa ka-a-la, n ba sɛgi n barɛ tumɛ min, ni fenfen bɔra nna bɔn la ka n nabɛn, n si wo di ile Mari ma, ni wo ma ka a ma sarakɛ la.”

³²Yɛfɛta ya Yorodan bɛ tɛgɛ Amonnu kɛlɛ tinɛ. Mari ya a ma, a ya Amonnu nɔ.

³³A ya anuna so-kun mogan kasara. Ka a bi Arɔra soe ma ka ta a sigi Miniti soe la ha ka ta a sigi nɔnbɔ-sɛnɛ[21] la min bi Rabati soe dafɛ, a ya nyɔ-mɔgɛnu nɔ. Isirɛla kɛlɛ-dannu ya Amonnu kɛlɛ ka anu nɔ feu!

³⁴Yɛfɛta sɛgimatoe a warɛ bɔn la Misipa, a ya ala den-sunkurɔn yen bɔla dɔn kɛla a bolo bɔn la ka ta a labɛn tinɛ. A ye tanban fɔla, ado den-sunkurun kelen pe wo le a bolo.

³⁵ Yɛfɛta ya ala dunmusi wo yen tumɛ min, a ya ala duruki rafara yisi-tinya bolo. A ko, “E, nna den, i wara a ma, n yisi ara tinya. N bara n dakan-don Mari ye n ti ke min tinyana.”

³⁶Ala dunmusi wo ya a fɔ a ye ko, “N fa, ni Mari ara a ma, i wara i yogenu nɔ, i wara lanyiri-wo-lanyiri kiri a ye, i ni wo lakanbali.”

³⁷A ya a fɔ a fa ye ko, “N fa, i yandi, i si sɔn ko kelen ma? Karɛ fila di n ma alako mabɛ n ta-nyɔgɛnu ni ta tagama kɔnkɛnu tɔ. Ma ni di bawo nde sa tola kei ye.”

³⁸A fa sɔnta a ta-koe ma karɛ filala ko la. Anubɛ a ta-nyɔgɛnu tara di-kɛ-tinɛ kɔnkɛnu tɔ bawo ha a si faga, a ti kei-ko lɔn, ado a ti den sɔrɔn.

³⁹Karɛ filɛ wo banta tumɛ min, a nara a fa wara tun. A fa ya a kuman-kan latɔnbagaya iko a ya a fɔ Mari ye nya min. Sunkurɔn wo fagara kɔnyɔyɛ le tɔ.[22] Ka a dabira wo wati ma, anu ya namu do dabira.

⁴⁰San-bo-san, tele nanɛ kɔrɔ, Isirɛla sunkurɔnnu kɛnɛna dila wulɛ rɔ alako ka anu miri Kaliyadi kɛ Yɛfɛtala den-sunkurɔn ma.