Read Kuranko Kɛlɛ-Kurugbɛnu 12 Bible Online

Kɛlɛ-Kurugbɛnu 12 - Kuranko bible

Kɛlɛ-Kurugbɛnu 12

¹Ifɛrɛm bɔnsɔn-mɔgɛnu fanan ya anu mabɛn kɛlɛ-kɛ-koe la. Anu ya Yorodan bɛ tɛgɛ ka ta Sefon soe burɔ Yorodan bɛ tele-bɔɛ wara la. Anu ya a fɔ Yɛfɛta ye ko, “Nfenna i tara Amonnu kɛlɛ, i ma ma kele? Ma si ila bɔn mintan i kuma.”

²Kɔnɔ Yɛfɛta ya a fɔ anu ye ko, “Mabɛ nna mɔgɛnu anubɛ Amonnu bi kɛlɛ-wɛ kun na tumɛ min, n ya wo kele kɔnɔ wo ma na ma bɔ Amonnu bolo la.

³N ya a yen min kɛ ko wo sa nala, n ya n niyi fili ka belen Amonnuna nyamani-dan kun na ka anu kɛlɛ, ado Mari ya a ma, n ya anu nɔ. Nfenna gbɛ, wo ye nala n kɛlɛla?”

⁴(Ifɛrɛm kɛnɛna a fɔla nun anu bɔnsɔn-mɔgɛ doinu ma Kaliyadi nyamanɛ rɔ ko, “Wole Kaliyadi kɛnu, fenfen ma wo le la bawo wo ya wo buri male Ifɛrɛm anubɛ Manasa sorɔ-mɔgɛnu kɔrɔ.”) Bawo Ifɛrɛm bɔnsɔn-mɔgɛ minnu bi Kenan nyamanɛ rɔ, wonu bara kuma-yogomɛ kɛ su fɔ anu na-kelen-nyɔgɛnu ma minnu tara sigi Kaliyadi nyamanɛ rɔ, wo le ya a ma, Yɛfɛta ya Kaliyadi kɛlɛ-dannu nadɛn Kaliyadi nyamanɛ rɔ ka ta Ifɛrɛm mɔgɛnu kɛlɛ tinɛ. Yɛfɛta ya nɔ-ko sɔrɔn Ifɛrɛm bɔnsɔn-mɔgɛnu ma.

⁵Kaliyadi kɛnu ya kilɛ tɛgɛ Ifɛrɛm bɔnsɔn-mɔgɛnu ma Yorodan bɛ tɛgɛ tinɛnu tɔ alako anu kana na sɛgi ka ta anu barɛ nyamanɛ rɔ tun. Ifɛrɛm bɔnsɔn-mɔgɛ minnu ba wuli tenbila nyɔ, anu si a manyinika ko, “Ifɛrɛm bɔnsɔn-mɔgɛ do le ile la?” Ni a ya a fɔ ko, “Ade!”

⁶Nba, anu si a manyinika kumɛ do ma a dɛ ra ma di min fɔɛ ma. Ni min ma ke wo fɔla, anu si a bira ka a faga nyɔ bawo a ma ke kumɛ wo fɔla a kila-bɛrɛbɛrɛ fɛ. Wulɔn tele rɔ, Kaliyadi kɛnu ya Ifɛrɛm bɔnsɔn-mɔgɔ waga bi-nani ani mɔgɔ waga fila (42,000) faga.

⁷San wɔrɔ kɔrɔ, Yɛfɛta ye kɛlɛ-kurugbayɛ la Isirɛla mɔgɛnu kun na. Yɛfɛta faganɛ, anu ya a togon soe do rɔ Kaliyadi nyamanɛ rɔ.

⁸Ebisan min bɔra Bɛtalehɛm soe burɔ, wo le sigira Yɛfɛta gbɛ rɔ Isirɛla mɔgɛnu kun na.

⁹A ya dunmusi mɔgɔ bi-sawa anubɛ den-kei mɔgɔ bi-sawa le sɔrɔn. A ya ala dunmusi wonu di kebila-gbɛrɛkɛ mɔgɛnu ma. A ya dunmusu mɔgɔ bi-sawa fanan furu kebila-gbɛrɛkɛ mɔgɛnu ma ka wonu furu ala den-keinu ye. San wɔrɔnfila kɔrɔ, Ebisan ye Isirɛla mɔgɛnu kun na.

¹⁰A fagara tumɛ min, anu ya a togon Bɛtalehɛm.

¹¹Sɛbulɔn kɛ min tɔgɛ Ilɔn, wo sigira Ebisan gbɛ rɔ. San tan kɔrɔ, a ye kɛlɛ-kurugbayɛ la Isirɛla mɔgɛnu kun na.

¹²A faganɛ, anu ya a togon a nyɛrɛta nyamanɛ rɔ Aiyalɔn soe burɔ.

¹³Helɛlila den-kei Abadan min bɔra Pairetɔn soe burɔ, wo sigira Ilɔn gbɛ rɔ.

¹⁴A ya den-kei mɔgɔ bi-nani sɔrɔn anubɛ a mamani keimɛ mɔgɔ bi-sawa. Sofɛlɛ bi-wɔrɔnfila ye wonu bolo. San segin kɔrɔ, Abadan ye kɛlɛ-kurugbayɛ la Isirɛla mɔgɛnu kun na.

¹⁵A fagara tumɛ min, anu ya a togon Pairetɔn soe burɔ Amalɛkinu tɛma Ifɛrɛmta kɔnkɔ-nyamanɛ rɔ.