Read Kuranko Kɛlɛ-Kurugbɛnu 14 Bible Online

Kɛlɛ-Kurugbɛnu 14 - Kuranko bible

Kɛlɛ-Kurugbɛnu 14

¹Lunyɛ do, Samsin tara Timina soe burɔ, a yɛ bɔra sunkurɔn do la nyɔ.

²A sɛgira a fa warɛ ka a fɔ a fa anubɛ a na ye ko, “N ya Filisitinuna dunmusi do yen Timina soe burɔ. A sɔgɛ ye n na, wo ni a furu n ye.”

³A fa anubɛ a na ya a fɔ a ye ko, “Ile ma musi nyini i na-kelen-nyɔgɛnu tɛma, fɔ i ni ta Filisiti-kemininyabɛlɛ wonu barɛ musi nyini tinɛ?” Samsin ya a fɔ a fa ye ko, “A sɔgɛ ye n na, wo ni wo le furu nde ye bawo wo lela ko di n ye.”

⁴Kɔnɔ a fa anubɛ a na ma a lɔn ko Mari le ye Samsin natuntunna kɛ rɔ. Mari ye kilɛ nyinina anu kunka-koe ma Samsin bolo. Wo wati ya a taran, Isirɛla mɔgɛnu bi Filisitinu kɔrɔ.

⁵Woletɔ anubɛ a sɔrɔnnɛnu bi tala Timina soe burɔ tumɛ min, a ye tenbila nɔnbɔ-kurinu kɔrɔ soe wo da la. Samsin ya yara-bulan bɔrɔndɔ-bɔrɔndɔ-kan lamɔɛn. Yarɛ wo ye nala a magbenna.

⁶Marita sɛnbɛ yigira ale Samsin kuma. A ya yarɛ wo bira a bole la ka a rafara iko baa-bulan. Kɔnɔ a ma yarɛ wo faga-koe fɔ a fa anubɛ a na ye.

⁷A ke Timina soe burɔ, a kumara sunkurɔn wo la. Sunkurɔn wo wara-koe diyara a ye.

⁸Wati tenbinɛ, Samsin tamatoe sunkurɔn wo furu tinɛ, a ke nɔnbɔ-kuri wonu kɔrɔ, a ya yarɛ min faga nun, a tara wo suyi mafɛlɛn. A ya a taran, li-kolenu siginɛ yarɛ wo kolenu ma. Anu bara anu kɛɛn sa nyɔ.

⁹A ya a bole ladon ka li-sɛngban do sagan. A tara wo dɔnna a bolo fɛ kilɛ la. A ke a na anubɛ a fa ma kilɛ la, a ya wonu kɔ liyi wo do rɔ. Wonu fanan ya a dɔn. Kɔnɔ a ma a fɔ anu ye ko a ya a bɔ yara-kole le tɔ.

¹⁰Anu ke Timina, a fa tara dunmusi wo wara. Samsin ya dɔn-fen siyaman rabɛn ka ladiyɛ kɛ iko fonikenu namunyɛ ye nya min.

¹¹Dunmusi wola mɔgɛnu ya Samsin yen ladɛn rɔ tumɛ min, anu ya fonike mɔgɔ bi-sawa bɔ ka to a fɛ anubɛ minnu si to kirabɔla.

¹²Samsin ya a fɔ wonu ye ko, “N bi sɔgɔsɔgɔma-tili[25] do sala wo ye. Ni wo kera wo kɔrɛ fɔla n ye ladɛn-tele wɔrɔnfilɛ kɛ kɔrɔ, n si duruku-ba-hakika bi-sawa di wo ma. Wo kɔma, n si kura bi-sawa di wo ma wo si wo mayɛlɛma minnu tɔ.

¹³Kɔnɔ ni wo ma ke nna tili wo kɔrɛ fɔla n ye, wo kelen-kelennamɛ-bɛɛ si duruku-hakika kelen-kelen anubɛ kura kelen-kelen bɔ ka a di n ma.” Mɔgɔ bi-sawɛ wonu ko, “Ila tili tɛgɛ le gbɛ! Ma ni ma tole masɔ a la.”

¹⁴A ya a fɔ anu ye ko, “Dɔn-fan bɔra fen-dɔnnɛ rɔ. Fen-diyamɛ bɔra sɛnbɛ-tigi rɔ.” Tele sawa anu bi ala tili kɛ kɔrɛ nyinina kɔnɔ anu ma a nya-yen.

¹⁵A tele nani nyɔgɛ ma, anu ya a fɔ Samsinna musu-nɛ ye ko, “Wo ya ma kele wola ladiyɛ kɛ kuma alako ka ma bolo kolonya, nyɛ? A ma, ila kei ni tili kɛ kɔrɛ fɔ i ye woletɔ ma si a lɔn i bolo. Ni wo ma, ma si tɛ tugu i fala bɔn la ka wo dama mintan gburr!”

¹⁶Samsinna musu-nɛ ya a manugu-nɛgɛ diyi-kɛ la a bolo. A ya a fɔ a ye ko, “I ko n di i ye kɔnɔ n ma la wo la. I wara tili tɛgɛ nna mɔgɛnu ye kɔnɔ i ma a kɔrɛ fɔ nde ye.” Samsin ya a fɔ a ye ko, “N ma min fɔ n na anubɛ n fa ye, n si wo fɔ ile le ye, wa?”

¹⁷Tele wɔrɔnfilɛ wo toe min tonɛ, a tora Samsin yakɔrɔ-mamɔla diyi-kɛ la. A tele wɔrɔnfila nyɔgɛ wo ma, Samsin ya a kɔrɛ fɔ ala musu-nɛ ye bawo tuma-wo-tuma a ye a fɔla a ye diyi-kɛ la a bolo. Ala musu-nɛ wo tara tili wo kɔrɛ fɔ Filisitinu mɔgɔ bi-sawɛ wonu ye.

¹⁸Wulɔn wo wurɛ la, mɔgɔ bi-sawɛ wonu nara Samsin wara ka a fɔ a ye ko, “Nfen sufa di liyi ko? Nfen sufa ragbɛlɛ yarɛ ko?” Samsin ya a fɔ anu ye ko, “Ni wo ma nna nyɛnkumɛ kɛ manugu-nɛgɛ nun, wo ti ke tulɛ kɛ bɔla a dɛ la nun, wo ti nna tili kɛ kɔrɛ lɔn nun muk!”

¹⁹Wo kɔma, Marita sɛnbɛ yigira Samsin kuma ka fanka di a ma. A tara Asikalɔn soe burɔ. A ya fonike mɔgɔ bi-sawa faga nyɔ. A ya wonuna kurɛnu bɔ anu ma ka anu gbu-makolɔn sani to. A tara wonuna kurɛ wonu di fonike mɔgɔ bi-sawɛ wonu ma minnu ya ala tili wo kɔrɛ fɔ. A yisi bɔnɛ tara a fa wara bɔn la.

²⁰A biran-kei ya Samsinna musi kɛ wo bi ka wo di ala sanka-dunɛ wo ma min bi ladɛn wo rɔ kɔnɔ a ya wo ma dogon tɔ.