Read Kuranko Kɛlɛ-Kurugbɛnu 16 Bible Online

Kɛlɛ-Kurugbɛnu 16 - Kuranko bible

Kɛlɛ-Kurugbɛnu 16

¹Lunyɛ do, Samsin tara Filisitinuna soe do rɔ min tɔgɛ Kesa. A ya musu-yɛlan do taran nyɔ. A ya a sa wo fɛ.

²Kesa mɔgɛnu ya a lɔn tumɛ min ko Samsin ye soe wo burɔ, anu ya anu kundɛn ka ta a makɔnɔ soe wo tarɛ-don-dɛ la kikudu! Anu ya a fɔ anu nyɔgɔn ye wɛwɛ rɔ ko, “Bandɛ wa ka, ma ni a faga.”

³Su-talɛ ma, Samsin ya a lasɔ. A tara soe tarɛ kankan anubɛ a kɔlɔmanu wurun burutu! A ya wonu sa a kan ma. A tara anu na ha kɔnkɛ do kuma min bi Hiburɔn soe kuma.

⁴Wo kɔma, Samsin yɛ bɔra musi do la Sɔrɛki lɛɛ rɔ. A tɔgɛ Dɛlaila.

⁵Filisitinuna mansɛnu nara musi wo wara. Anu ya a fɔ a ye ko, “Samsin si a fanka sɔrɔn nya min, i ni fɛrɛ nyini a bolo ha a ni a fɔ i ye. Ni i ya wo ma, ma kelen-kelennamɛ-bɛɛ si wodi-gbɛ-gbu waga kelen kɛmɛ kelen (1,100) di i ma. I ni fɛrɛ nyini ma ye, ma si a bira nya min ka a kiri.”

⁶Dɛlaila ya a fɔ Samsin ye ko, “Samsin, i yandi, i si i sɛnbɛ sɔrɔn nya min, wo fɔ n ye. Mɔgɛ si nfen ma i la min si a ma, i ni foo i sɛnbɛ la alako i si kiri nya min.”

⁷Samsin ya a fɔ a ye ko, “Anu ni fasa-kuran wɔrɔnfila bi ka n kiri wonu na. Ni min ya wo ma n na, wo si n fanka bɔ n na.”

⁸Dɛlaila tara wo fɔ Filisiti mɔgɔ-ba wonu ye. Wonu nara fasa-kuran wɔrɔnfila la ka anu don ala sunkurɔn Dɛlaila bolo. A ya Samsin kiri wonu na.

⁹Wo le ya a taran, Filisiti fonike donu dogonnɛ Dɛlaila bolo bɔn burɔ nyɔ. Dɛlaila ya Samsin takele, a ko, “Filisitinu bara na i kan ma de!” Tiriyante wo rɔ, a ya a lasɔ ka fasɛ wonu tatɛgɛ a ma iko tɛ wa yesekari mintan. Anu ma ke ka a gbundu lɔn ala fanka wo wara-koe rɔ.

¹⁰Dɛlaila ya a fɔ Samsin ye ko, “Yaga, i ye n mayuwaya tinɛ le nun ka foninyɛ fɔ n ye. I kiri-mɔlɔni-bɛrɛbɛrɛ fɔ n ye.”

¹¹Samsin ya a fɔ a ye ko, “Ni mɔgɛ ya n kiri yili-kolo-kurɛ la fen ma kiri wɛ min na fɔlɔn, n ti fanka sɔrɔn wo rɔ. N si ma kuluba, iko mɔgɛ donu.”

¹²Dɛlaila ya yili-kolo-kurɛ bi ka a kiri wo la lɛnlɛn! A ya Samsin takele, a ko, “Filisitinu bara na de!” Wo ya a taran, kei wonu bi anu gbɛ rɔ nyɔ, yɔ! Samsin ya yili-kolo-kurɛ wo ratɛgɛ a ma iko yesekari.

¹³Musi wo ya a fɔ ale Samsin ye ko, “Ha bi, i ye n mayuwaya-tinɛ le. Tonyɛ fɔ n ye. N si i kiri nya min, wo fɔ n ye.” Samsin ko, “Fɔ i ni n kun-sigi kɛ fara sigi tina wɔrɔnfila la ka a ma iko yesi-kole. I ni n kun-sigi wo kɛ niri rɔ ka a dan iko kurɛ ka ta a sore wonu kiri kɔlɔma la min gbangbannɛ dandan ma. Ni i ya wo ma, n na si tinya iko mɔgɛ bɛɛ.” Dɛlaila ya a ma ha Samsin kinɔgɔra a kian kuma. A ye kinɔgɛ wo rɔ tumɛ min, Dɛlaila ya Samsin kun-sigi wo dan

¹⁴iko a ya a fɔ a ye nya min. Musi ya a maban kinɔgɔ rɔ ka a fɔ a ye ko, “Filisitinu bara na de!” A barata kinɔgɔ rɔ ka a kun-sigi wonubɛ a gbangban kɔn wonubɛ niri wo wurun dandan ma.

¹⁵Dɛlaila ya a fɔ Samsin ye tun ko, “Ile le ye a fɔla ko n di i ye. Diyanayɛ ladan-bole le kɛ la, wa? A sawa nyɔgɛ le kɛ la gbɛ i ye n mayuwayala. Ha bi, i ma i burɛ gbɛ wɛ n ye? Ni n di i ye, a ma, n ni i sɛnbɛ wara-koe lɔn.”

¹⁶Tele-wo-tele, a ye kirinkonaya-kuma-kelan wo le fɔla Samsin ye. Musi wo ya a yakɔrɔ-mamɔ wola ko la ha a kɔndɔfilita.

¹⁷Tɔ-a-la, Samsin ya tonya-kumɛ fɔ a ye ko, “Kebi nde sɔrɔnta ha bi, nde kunyɛ kɛ ma matɛgɛ. Kebi n ma sɔrɔn bɛ, n dantɛgɛnɛ Mari ma iko Nansarannu.[30] Ni mɔgɛ ya n kun-sigi kɛ matɛgɛ, n si foo n sɛnbɛ la.”

¹⁸A lɔn Dɛlaila bolo ko Samsin ara tonya-bɛrɛbɛrɛ le fɔ a ye wo la, a ya kilayɛ lata Filisiti mɔgɔ-ba wonu ma ka anu kele. “Wo na kɛ kelan rɔ. A ara tonya-bɛrɛbɛrɛ le fɔ n ye kɛ la gbɛ!” Anu ya a yili-madiya wodi-gbɛ minna ko la, anu nara wo la.

¹⁹Dɛlaila ya Samsin sa a kian kuma ha kinɔgɛ tenbira a ma a kian kuma nyɔ. Dɛlaila ya kun-matɛgɛlɛ do kele. Wo nara a soro wɔrɔnfilɛ wonu matɛgɛ. A ya Samsin takele, a ko, “Samsin, Filisitinu bara na de!” Musi wo ya Samsin nɔ bawo a ara foo a fanka la. Samsin kundennɛ, a ya a lɔn ko a sɛnbɛ ye a gbɛ le tɔ. Ale miri ko a wa a lasɔ, a si ke le a rasaganna mɔrɔtɔtɔ, ka yili ratɛgɛ a ma iko fɔlɔ. A ma a lɔn ko Mari ara a boloka.

²¹Filisitinu ya a bira ka a ya-filɛ tii. Anu ya a bi ka ta a la Kesa soe burɔ. Anu ya a kiri yɔlɔkɛ la minnu nadannɛ silɛɛ la. Anu ya ale Samsin ma dɛgɛ-bundennɛ la anu ye yele la.

²²Kɔnɔ a kun-sigi donta koloyɛ rɔ tun.

²³Wati-tenbinɛ, Filisitinuna mansɛnu ya anu kundɛn ka saraka-belebele-wɛ bɔ anuna bɛsɛ do ye min tɔgɛ Degɔn. Anu nyagalennɛ ye kulan dɔnna. Anu bi a fɔla ko, “Mata bɛsɛ ara ma yoge Samsin don ma bolo!”

²⁴Anu bi sewɛ wo rɔ, anu ya a fɔ ko, “Wo ni Samsin labɔ ka na a la ma tɛma alako ma ni a mayɛlɛn.” Anu ya a labɔ yele la tumɛ min, anu ya a ma mayɛlɛnma-fan la. Anu donta anuna bɛsɛ wo matɔgɔ rɔ. Anu bi sigi sala ko, “Ma yoge kɛ ara mala nyamanɛ tinya. Ma yoge kɛ ara ma mɔgɔ-siyaman faga. Mala bɛsɛ ara wo le don ma bolo kɛ la.” Anu tara ale Samsin sɔ anuna bɛsi-kɔ-tinɛ wo sɛnbɛrɛn-kɔn filɛ tɛma.

²⁶Samsin ya a fɔ a bolo-biralɛ ye ko, “N bole tugu sɛnbɛrɛn-kɔnnu na alako n ni n gbɔnkun a rɔ.”

²⁷Wo ya a taran, bɛsi-bɔn wo lafanɛ mɔgɛnu na pin! Filisitinuna kun-tigi bɛɛsi ye nyɔ. Mɔgɔ waga sawa (3,000) fanan ye san-bɔn kuma nyɔ,[31] musi wo, kei wo. Anu yɛ bɛnnɛ Samsin ma, a ye a dɔnna.

²⁸Samsin ya Mari rakele ko, “E, n tigi Alla, n bara i madiya, i miri n ma. Nna fanka lasɛgi n ma kɛ kelan rɔ alako n ni n tayili sara Filisiti kɛ kɛnu na minnu bara n ya-filɛ tii kɛ la.”

²⁹Sɛnbɛrɛn-kɔn filɛ minnu sɔnɛ bɔn wo kɔrɔ, Samsin sɔra wonu tɛma ka wonu bira.

³⁰A ya a fɔ ko, “Hali mabɛ Filisitinu fagara ma nyɔgɔn fɛ, tana ma wo la.” A ya a sɛnbɛ bɛɛ labɔ ka sɛnbɛrɛn-kɔn wonu natuntun. Bɔn wo kerita. A buira anubɛ mansa lolɛ wonu kuma anubɛ mɔgɛ min bɛɛsi ye nyɔ. Samsin-fagamatoe ya mɔgɛ min nyɔgɔn faga wo wati rɔ, wonu siya ata mɔgɔ-faganɛnu ko wo tumɛ a ye a kɛndɛ la.

³¹Ala mɔgɛnu nara a furi bi ka ta a togon a fa Manowata kaburu-soe rɔ Sora soe anubɛ Ɛsateyoli soe tɛma. Samsin ya san mogan le bɔ kɛlɛ-kurugbayɛ la Isirɛla mɔgɛnu kun na.