Read Kuranko Kɛlɛ-Kurugbɛnu 18 Bible Online

Kɛlɛ-Kurugbɛnu 18 - Kuranko bible

Kɛlɛ-Kurugbɛnu 18

¹Wo wati ya a taran, mansa mumɛ sa Isirɛla mɔgɛnu kun na. Wo wati ya a taran fanan, Dan bɔnsɔn-mɔgɛnu bi dugu-nyinɛ la anu si anu sigi kan min bawo anu ma anu halala-nyamanɛ sɔrɔn bɛ Isirɛla mɔgɛnu tɛma.

²Anu ya mɔgɔ-kerinte loli yabɔ ka wonu ma ko-lakɔrɔsilɛnu na. Anu bɔra Sora soe anubɛ Ɛsateyoli soe ka ta nyamani-lakɔrɔsi-tinɛ. Anu ke Ifɛrɛm kɔnkɔ-nyamanɛ rɔ, anu yiyara Maikala bɔn la saraka-masɔlɛ Lifayi bɔnsɔn-mɔgɛ wo siginɛ kan min.

³Anu bi nyɔ tumɛ min, anu ya a lɔn a kuma-nya ma ko Lifayi bɔnsɔn-mɔgɛ do le. Anu ya ale keminɛ wo manyinika ko, “Yon nara i la yan? Ile ye nfen mala yan?”

⁴Keminɛ wo ko, “N siginɛ Maika le fɛ yan ka saraka-masɔ-wɔlɛ kɛ a ye. A ye n sarala wola ko la.”

⁵Anu ya a fɔ a ye ko, “I yandi, n fa, Alla manyinika ma ye ni mala tagama si diya.”

⁶Saraka-masɔlɛ wo ko, “Hali wo yisi ma tinya. Mari ye wo fɛ wola tagama kɛ rɔ.”

⁷Ko-lakɔrɔsila mɔgɔ lolɛ kɛnu bɔra nyɔ. Anu tara ha Leyisa soe burɔ. Anu ke nyɔ, anu ya so-burɔ-mɔgɛ wonu makimanɛ taran sigini iko Saidon kɛnu siginɛ nya min. Anu sa bagala mɔgɛ ma, mɔgɛ sa bagala anu ma. Nɔnfulu-tigi le anu na, ado anu fɛ-yan Saidon kɛnu na. Wo kɔma, anu ti sɔn basanna mɔgɔ-gbɛrɛkɛnu na, anu siginɛ minnu dafɛ.

⁸Ko-lakɔrɔsilɛ wonu sɛgira anu barɛ Sora anubɛ Ɛsateyoli tumɛ min, anuna mɔgɛnu ya anu manyinika ko, “Wo ni wo dantɛgɛ.”

⁹Anu ya a fɔ anu ye ko, “Ma ya anuna nyamanɛ yen, a kin dɔgɔma-ma-de! Ma ta wona tiriya ka ta bui Leyisa soe ma ka a bi anu bolo. Ma kana to sigini wo nya fufafu!

¹⁰Ma si ta wonu natɛrɛna nyɔ rɔ. Anu ti ko-wo-ko lɔn a rɔ. Nyamanɛ wo kolo dɔgɔma-ma-de! Mɔgɛ ye fenfen nyinina duninya rɔ, wo ye nyɔ. Alla ara nyɔ don ma bolo.”

¹¹Dan bɔnsɔn-mɔgɔ kɛmɛ wɔrɔ (600) ya anu mabɛn kɛlɛ wo kan ma ka bɔ Sora soe anubɛ Ɛsateyoli soe burɔ.

¹²Anu tara anu daga makɛ Yirɔm soe tele-yigi Yuda nyamanɛ rɔ. Ha bi,[32] anu bi kan-tinɛ wo kelela “Dan Bɔnsɔnna Dagɛ.”

¹³Anu bɔra nyɔ. Anu tara Maika warɛ Ifɛrɛm kɔnkɔ-nyamanɛ rɔ.

¹⁴Ko-lakɔrɔsila mɔgɔ loli wo minnu tara Leyisa soe lakɔrɔsi-tinɛ, wonu ya a fɔ anu ta-nyɔgɛnu ye ko, “Wodi-gbɛ sanɛ anuna bɛsi-kɔlɔma do ma bɔn do la yan. Fɔlɔnfalan do ye nyɔ fanan mɔgɔ si Alla sako lɔn min fɛ. Bɛsi-dogbɛrɛnu bi nyɔ. Ma si nfen ma wona?”

¹⁵Anu damasi tara Maikala bɔn magbenna Lifayi-keminɛ wo ye kan min. Anu ke nyɔ, anu ya Lifayi-keminɛ wo kɔndɔn.

¹⁶Kɛlɛ-den kɛmɛ wɔrɛ (600) wonu sɔra bɔn wo sansan-don-dɛ fɛ.

¹⁷Ko-lakɔrɔsila mɔgɔ loli wonu donta bɔn la ka ta saraka-masɔya-fɔlɔnfalan wo bi anubɛ kɔlɔma-malɛsɛnɛ wodi-gbɛ leenɛ min ma. Anu ya bɛsɛ doi wonu fanan bi. Kɔnɔ saraka-masɔlɛ wo tora sɔni kɛlɛ-den-mabɛnni mɔgɔ kɛmɛ wɔrɛ wonu tɛma. A ya bɛsɛ wonu yen anu bolo la tumɛ min, a ya anu manyinika, a ko, “Wo ye nfen kun na wo la?”

¹⁹Anu ya a fɔ a ye ko, “I rade don! Bila ma fɛ. I ni ma ma hɛnkili-kɔlɛ la ka saraka-masɔ-wɔli kɛ ma ye. Yanni i ni saraka-masɔ-wɔli kɛ denbaya kelan ye, i ti saraka-masɔ-wɔli kɛ male Dan bɔnsɔn-mɔgɛnu ye?”

²⁰Kumɛ wo ya a diya don keminɛ wo rɔ. A sewara. Ale nyɛrɛ ya bɛsɛ wonu bira a bolo tɔ. A bilara anu fɛ.

²¹Anu bara wuli tala, anu ya anuna denbayɛnu anubɛ anuna kolo-fannu sɔ anu yarɔ. Kɛlɛ-dannu tora kɔma.

²²Anu tɛ gbada, Maika ya a sigi-nyɔgɛnu kele Dan bɔnsɔn kɛlɛ-koe la. Anu ya anu sagaran. Anu gbɛrɛn anu ma,

²³anu ya anu takele. Dan bɔnsɔn wonu ya anu tintan anu na ka Maika manyinika, anu ko, “Nfen mara i wara mɔgɔ-siyamɛ kɛnu nadɛn ma kan ma?”

²⁴Maika ko, “Wo ara nna saraka-masɔlɛ bi n bolo anubɛ n ya bɛsɛ minnu nadan, wo ye a fɔla n ma ko, ‘Nfen mara?’ Wo ya nfen to n bolo gbɛ?”

²⁵Dan bɔnsɔn-mɔgɛ wonu ya a fɔ ko, “Hali ma ma wo kuman-kan lamɔɛn ma tɛma yan tun! Ni wo ma, kemini-karagbɛlɛ kɛnu si wobɛ ila denbayɛnu faga tɛrr!”

²⁶Dan bɔnsɔn-mɔgɛ wonu ya kilɛ bira tun. Maika ya a yen min kɛ, anu ti wonu nɔ, anu sɛgira anu kɔma bɔn la.

²⁷Dan bɔnsɔn-mɔgɛ wonu tɛ Maikala saraka-masɔlɛ la, anu tara bui Leyisa soe ma. Leyisa soe anubɛ Bɛti-Rihobu soe ye lɛɛ kelen de rɔ, ado Leyisa mɔgɛnu makimani de! Anu miri sa kɛlɛ ko ma. Dan bɔnsɔn-mɔgɛnu tara anu natɛrɛna ka anu faga. Anu ya soe wo mintan. Leyisa so-burɔ-mɔgɛ wonu ma anu dɛnbɛna sɔrɔn ka bɔ Saidon soe burɔ bawo anu fɛ-yan wonu na, ado anu ti sɔn basanna mɔgɔ-gbɛrɛkɛnu na iko komi wonu si na anu dɛnbɛ. Dan bɔnsɔn-mɔgɛ wonu ya soe wo sɔ a kurɛ kɛ tun ka anu sigi nyɔ.

²⁹Anu ya Leyisa soe wo tɔgɛ yɛlɛma ka anu benba Yakobala den Dan tɔgɛ sa nyɔ kuma.

³⁰Anu ya Maikala kɔlɔma-malɛsɛnɛ min bi a bolo, anu ya bɛsɛ wo sigi bɔn do la, anu si a kɔ kan min. Anu ya Musa mamanɛ Yonatan ma anuna saraka-masɔlɛ la, Kɛrisɔnla dan, kɔni. Wo kebilɛ tora mala saraka-masɔlɛ la Dan bɔnsɔn-mɔgɛnu ye ha kɛlɛ tara anu na.

³¹Allata Fani-Bɔn taranta Sailo soe burɔ wati mumɛ kɛ bɛɛ rɔ. Maikata bɛsɛ kɛ fanan taranta Dan bɔnsɔnnu bolo nyɔ.