Read Kuranko Kɛlɛ-Kurugbɛnu 21 Bible Online

Kɛlɛ-Kurugbɛnu 21 - Kuranko bible

Kɛlɛ-Kurugbɛnu 21

¹Kɔnɔ yanni Isirɛla bɔnsɔn tan-ni-kelan ni kɛlɛ dabira, anu ya anu kundɛn kan-tina-kelen Misipa soe burɔ nun. Anu dama kunta kan kelen ma nyɔ ka anu nyɛrɛ ladanka, anu ko, “Male bɔnsɔn tan-ni-kelan kɛ, mɔgɔ-wo-mɔgɔ kana ala dunmusi di Bɛnyamɛ bɔnsɔn-mɔgɛ ma.”

²Kɔnɔ kɛlɛ kanɛ a la, bɔnsɔn tan-ni-kelan wonu nimisanɛ tara Bɛtɛli soe burɔ ka telen dila Alla dala ha wurɛ la.

³Anu bi a fɔla di-kɛ-tinɛ ko, “E, Isirɛlata Mari Alla, nfenna ko-su kɛ ara ma male Isirɛla mɔgɛnu na? Nfenna Bɛnyamɛ bɔnsɔn kelan ye tununa ma tɛma?”

⁴Wo wulun sɔgɔma subaga, anu ya saraka-mintan-tinɛ ladan. Anu ya saraka-mintantɛnu bɔ anubɛ yisi-kima-sarakɛnu.

⁵Anu ya a fɔ ko, “Isirɛla mɔgɔ yon tora min ma kofu ma ma ladɛn rɔ Mari yakɔrɔ Misipa soe burɔ? Ma ma a fɔ wo wati rɔ ko ni mɔgɛ min ma ta ladɛn wo rɔ, ma si wo tigi faga?”

⁶Kɔnɔ hali wo, anu nimisanɛ anu na-kelen-nyɔgɛ Bɛnyamɛ bɔnsɔn-mɔgɛnuna ko la. Anu bi a fɔla ko, “Ma ara foo Isirɛla bɔnsɔn kelen na bi.

⁷Bɛnyamɛ bɔnsɔn-mɔgɛ toe minnu tora, ma si ke musi dila wonu ma kama bawo ma ara ban ma datola nun ko ma ti mala dunmusinu di anu ma?”

⁸Anu bi ko-fɛ-birɛ wo la ka a lɔn minnu ma na anuna ladɛn wo rɔ Misipa soe burɔ, anu ya a lɔn ko Yebɛsi so-burɔ-mɔgɛ minnu bi Kaliyadi nyamanɛ rɔ, wonu ma sɔn na-koe ma anuna ladɛn wo rɔ.

⁹Anu ya mɔgɛnu tɔgɛ rakele min kɛ, anu ya a yen, hali mɔgɔ-den-kelen fanan ma bɔ soe wo burɔ ka ta kɛlɛ rɔ.

¹⁰Woletɔ anu ya kɛlɛ-dan mɔgɔ waga tan-ni-fila (12,000) bi. Anu ya a fɔ wonu ye ko, “Wo ta Yebɛsi so-burɔ-mɔgɛnu faga, kei wo, musu wo, dennɛnu wo, fɔ sunkurɔn minnu ma kei koe lɔn bɛ.”

¹²Anu ban mɔgɛnu fagala nyɔ, anu nara sunkurɔn mɔgɔ kɛmɛ nani (400) na Sailo soe burɔ min bi Kenan nyamanɛ rɔ.

¹³Isirɛla bɔnsɔn tan-ni-kelan ya kilayɛ lata Bɛnyamɛ mɔgɛ toenu ma minnu bi Rimɔn farɛ wara la ka a fɔ anu ye ko, “A sɔgɛ ye ma la ka kɛlɛ ban ma tɛma ka to yisi-kimɛ rɔ.”

¹⁴Wonu ya kumɛ wo lamɔɛn tumɛ min, anu sɛgira anuna nyamanɛ rɔ. Bɔnsɔn tan-ni-kelan ya sunkurun mɔgɔ kɛmɛ nanɛ wonu bi ka wonu di Bɛnyamɛ mɔgɛnu ma. Kɔnɔ wonu ma a bɔ wonu bolo.

¹⁵Hali wo, anu na-kelen-nyɔgɛ wonu kinikinita anu ma tun bawo Mari ya a ma, woe ara to Isirɛla mɔgɛnu tɛma.

¹⁶Anuna bɔnsɔn-kun-tiginu ko, “Musu ma to Bɛnyamɛ mɔgɛnu tɔ. A bɛɛ ara faga tɛrr! Bɛnyamɛ bɔnsɔn kei minnu ma musu sɔrɔn bɛ kɛ la, wonu si musu sɔrɔn kama?

¹⁷A ma di ma ye Isirɛla bɔnsɔn kɛ do tɔgɛ ni tuni. Fɔ ma ni hɛnkili nyini kɛnuna musu-sɔrɔn-koe ma.

¹⁸Ma ti ke mala dunmusinu dila anu ma bawo ma ara ma nyɛrɛ ladanka. Ma ko ma ti mala dunmusinu di Bɛnyamɛ bɔnsɔn ma.”

¹⁹Anu ya a fɔ ko, “Ma si ladiyɛ min kɛ Mari ye san la Sailo soe burɔ, wo wati ara gbɛrɛn.” (Sailo kɛ, a ye Bɛtɛli soe kan tɔ le, Lɛbona soe dugu la. Kilɛ min bi Bɛtɛli soe anubɛ Sɛkɛm soe tɛma, Sailo ye wo tele-bɔɛ wara la le.)

²⁰Bɛnyamɛ bɔnsɔn-kei minnu ma musi sɔrɔn bɛ wo la, anu ya a fɔ wonu ye ko, “Wo ta wo dogon nɔnbɔ-sɛnɛ rɔ Sailo soe kɔma. Wo ni wo yɛ bɛn. Ni sunkurɔn minnu bi dɔn-kɛ-tinɛ ladiyɛ wo kuma, wo ni wonu bira ka ta wonu na wo bolo wo warɛ nyamanɛ rɔ. Wo kelen-kelennamɛ-bɛɛsi ye a mala wo nya na le.

²²Ni dunmusi minnuna mɔgɛnu nara ka ma makuma, ma si a fɔ wo tigi ye ko, ‘Wo yandi, wo ni anu to anu bolo bawo ma ma anu denuta musi sɔrɔn kɛlɛ rɔ. Wo ti danka sɔrɔn bawo wo ma anu di anu ma fanan.’ ”

²³Bɛnyamɛ bɔnsɔn-toe ya a ma iko anu ya anu nabila nya min. Sunkurɔn minnu bi dɔn-kɛ-tinɛ Sailo soe burɔ, kei wonu kelen-kelennamɛ-bɛɛsi ya atɛ bira sunkurɔn wonu tɔ ka anu ma anuna musinu na. Wo kɔma, anu tara anu na anu barɛ. Anu ya anuna soenu sɔ tun ka anu sigi nyɔ.

²⁴Wo wati nyɛrɛ le tɔ, Isirɛla bɔnsɔn tan-ni-kelen bɛɛsi sɛgira a warɛ iko anu siginɛ nya min nun.

²⁵ Kɛnu bi mala wati min, wo ya a taran, mansa sa Isirɛla mɔgɛnu kun na. Bɛɛ ye ata diyana-koe mala iko a di a nyɛrɛ ye nya min.