Read Kuranko Kɛlɛ-Kurugbɛnu 5 Bible Online

Kɛlɛ-Kurugbɛnu 5 - Kuranko bible

Kɛlɛ-Kurugbɛnu 5

¹Tele wo nyɛrɛ rɔ, Dɛbora anubɛ Abinowamta den Bɛraki ya kulan dɔn kɛlɛ wola ko la. Anu ko,

²Ma si baraka bira Mari ye ka a tanto bawo Isirɛla kun-tiginu sɔra yarɔ kɛlɛ rɔ, ado Isirɛla mɔgɛnu ya anu nyɛrɛ niyi fili kɛlɛ rɔ.

³Wole mansɛnu anubɛ wole mɔgɔ-banu, n bi bɛti min bɔla Isirɛla mɔgɛnuta Mari Alla ye, wo ni wo wɔlɔ matɔlɔ bɛti-diyamɛ wo la.

⁴ Ile Mari min nara ila mɔgɛnu na ka bɔ Idɔm[9] kɔnkɔ-nyamanɛ rɔ, dugi yɛrɛyɛrɛnta wulɔn, bandɛ nara, kɔnkɛnu magara anu gbɛ rɔ. Wo bɛɛ mara ile Isirɛla mɔgɛnuta Mari Alla yala, ale min bi Sinayi kɔnkɛ kuma, kɔni.

⁶“Anatila den Samiga anubɛ Yeyɛlita wati rɔ, mɔgɛnu ti sisi bɔla kila-wɛnu fɛ fɔ kila-nɛnu.

⁷Mɔgɛnu ya anu buri ka anu bɔ Isirɛla so-mɛsɛnɛnu tɔ. A ara to mala wo nya na le ha nde, Dɛbora ara ma Isirɛla mɔgɛ bɛɛsi na la.

⁸Kɛlɛ buira Isirɛla mɔgɛnu kuma tumɛ min, kɛlɛ-kɛ-fen wo fenfen ma taran mɔgɔ waga bi-nanɛ wo fenfen bolo. A mara wo nya bawo anu bara anu kan-kɔ sɔ Mari la ka anu don bɛsi-kɔ-koe rɔ.

⁹N si baraka bira Isirɛla kun-tiginu ye anubɛ Isirɛla mɔgɛnu ye bawo anu ya anu nyɛrɛ bɔ ka anu niyi fili kɛlɛ rɔ. Ma ni baraka bira Mari ye wola ko la.

¹⁰Wole nɔnfulu-tigi minnu bi sigila kirikɛnu kuma wola sofɛli-gbɛnu na, wole bolo-kolɔn minnu bi tagamana wo kiannu na, wa wo yili to kɛ ko.

¹¹Mɔgɛnu bi Marita ko-nyimɛ rakaranna ma yogenu nɔ-koe rɔ yi-bi-tinɛ. Wo ni wo wɔlɔ matɔlɔ wonu na.” “Marita mɔgɛnu ya anu nadɛn tarɛ-don-dɛ la. Anu ko,

¹²‘Dɛbora, sɔ ma yarɔ ka sigi sa. Abinowamta den Bɛraki, i fanan sɔ ma yarɔ. I ni ta yɔɔnnu bira ka anu sɔ i yarɔ.’ ”

¹³“Wo kɔma, bɔnsɔn donu nara anuna kun-tiginu bara. Marita mɔgɛnu nara nde, Dɛbora wara ka ta kɛlɛ rɔ.

¹⁴Kɛlɛ-dannu nara ka bɔ Ifɛrɛm bɔnsɔn rɔ ka na ke lɛɛ rɔ kɛlɛ-kɛ-tinɛ. Bɛnyamɛ bɔnsɔn fanan sɔnɛ anu yarɔ. Kɛlɛ-den-kunyɛnu anubɛ anuna kɛlɛ-dannu bɔra Manasala den Makiri anubɛ Sɛbulɔn bɔnsɔnnu tɔ.

¹⁵Kun-tigi minnu bi Isakari bɔnsɔn rɔ, nde, Dɛbora anubɛ Bɛraki tara wonu na lɛɛ wo rɔ kɛlɛ-kɛ-tinɛ. Kɔnɔ wole Rubɛn bɔnsɔn-mɔgɛnu sa ma fɛ bawo wo faranɛ. Wo ma sɔn tala ma fɛ kɛlɛ rɔ.

¹⁶Nfenna wola sagɛnu-kele-kan di wo ye ka tenbi kɛlɛta tɛ la? Wole Rubɛn bɔnsɔn farani de!

¹⁷Wole Kadi bɔnsɔn sigini tora Yorodan bɛ kɔgɔma. Wole Dan bɔnsɔn tora wɔlila wola kulɔnnu tɔ. Wole Asɛra bɔnsɔn sigini tora kɔgɔ-yi fɛ. Wo ma sɔn tala ma fɛ kɛlɛ rɔ.

¹⁸Kɔnɔ wole Sɛbulɔn bɔnsɔn anubɛ Nafatali bɔnsɔn, wo ya wo niyi fili kɛlɛ-kɛ-tinɛ.”

¹⁹“Kenan mansɛnu nara ma kɛlɛ yi do dafɛ min bi Teyanaka soe anubɛ Magidɔ soe tɛma kɔnɔ anu ma ke tala mala nɔnfuli fenfen na anu bolo.

²⁰Hali san-kole ya ma dɛnbɛ Sisara kɛlɛla bawo wan-takɛ ya ma dɛnbɛ.

²¹Bandɛ ya a ma, Kisɔn bɛ fara. A yigira ma yogenu na pon! Woletɔ male fanan ya sɛnbɛ sɔrɔn ka to tala kɛlɛ rɔ.

²²Sisarala soeenu-kinta-kan ye nala ma magbenna.

²³Marita melika ko, ‘Merɔsi so-burɔ-mɔgɛnu si gbalo sɔrɔn bawo anu ma ta Marita mɔgɛnu dɛnbɛn tinɛ kɛlɛ rɔ.’ ”

²⁴“Duwɛ ye Hiberala musi Yeyɛli fɛ Kena mɔgɛ, kɔni. Musi min bɛɛ siginɛ fani-bɔnnu na, duwɛ ye Yeyɛli fɛ ka tenbi wo bɛɛ la.

²⁵Sisara ya yi tara ale le ma, a ya fɛnɛ di a ma miran-nyimɛ rɔ.

²⁶Ale Yeyɛli le ya fani-bɔn balan-kɔlɔma-lasulennɛ do bi a maran la. A ya kundu-wɛ bi a bolo-nyimɛ la ka kɔlɔma wo gbangban a kunyɛ rɔ. A kunyɛ ratiira.

²⁷Sisara ya a kian radu, a ya a rasagan. A ya a radu musi wo kin kɔrɔ ka a rasagan mɔrɔtɔtɔ! A sanɛ tora. A niyi bɔra musi kin kɔrɔ.”

²⁸“Sisara na-musu-kɔrɛ yɛ tora kilɛ la. A ya a fɔ bɔn la ko, ‘Nfen ya a to, nna dan anubɛ ala kirindi ara mɛ bi? Ala soeenu bi mintɔ bi wo?’

²⁹Musu-kɔrɛ anubɛ a ta-nyɔgɔ-musinu tora a fɔla ko,

³⁰‘Tumado nɔnfulu-tala-koe le wara anu mɛ kɔrɛ. Tumado kɛlɛ-dan donu si musu fila-fila sɔrɔn. Donu si kelen-kelen sɔrɔn. Tumado Sisara ara duruku-bonni-hakikɛ do sɔrɔn kɔrɛ. A si na kura-hakikɛ do la n ye kɔrɛ.’ ”

³¹“E, Mari, alamɛ i yoge bɛɛ halakira iko Sisara mara nya min. Kɔnɔ minnu bara i keni, alamɛ wonu malanta iko tele.” Wo kɔma, san bi-nani, anu bi yisi-kimɛ rɔ Dɛbora anubɛ Bɛraki bolo.