Read Kuranko Kɛlɛ-Kurugbɛnu 6 Bible Online

Kɛlɛ-Kurugbɛnu 6 - Kuranko bible

Kɛlɛ-Kurugbɛnu 6

¹Wo kɔma, Isirɛla mɔgɛnu bilara Mari la tun. Woletɔ Mari ya anu don Midiyan nyamanita-mɔgɛnu bolo. San wɔrɔnfila, anu bi anu kɔrɔ.

²Midiyan mɔgɛnu tagbɛlɛ Isirɛla mɔgɛnu ko. Woletɔ Isirɛla mɔgɛnu ya anu dogon farannu na kɔnkɔ-woenu tɔ.

³Isirɛla mɔgɛnu ba ta sɛni sa tinɛ kan-bo-kan, Midiyan anubɛ Amalɛki kɛnu anubɛ sibolo-gbɛrɛ donu si bɔ tele-bɔɛ wara la ka ta anu kɛlɛ nyɔ.

⁴Anu yogenu bi anu daga makɛla kan tinɛ bɛɛ rɔ alako anu si Isirɛla mɔgɛnuna sɛnɛnu tinya nya min ha ka ke Kesa soe ma. Saga wo, ninki wo, sofɛlɛ wo, anu kɛnɛna buila anu ma ka anu bi anu bolo. Anu ti fenfen to Isirɛla mɔgɛnu bolo.

⁵Anu bi nala anuna kolo-fen siyamɛnu na anubɛ anuna fani-bɔnnu iko kondɔnnu ka Isirɛla nyamanɛ rakolonya.

⁶Isirɛla mɔgɛnu ma ke anu nyɛrɛ kumafunfanna tun.

⁷Isirɛla mɔgɛnu dira Mari dala tumɛ min anu dɛnbɛn-koe la Midiyan kɛnu kɛlɛ-koe rɔ,

⁸Isirɛla mɔgɛnuta Mari Alla ya nɛbi do lana anu ma. A ya a fɔ ko, “Mari ko ale le ya wole labɔ yɔɔnyɛ rɔ Iyipiti ka wo lana yan.

⁹Ale le ya wo latanka Iyipiti anubɛ wo kɛlɛ-nyɔgɛnu-masibɛ ma nyamanɛ kɛ rɔ. Mari ko wo tenbi tala kan-bo-kan, a ye wo yogenu gbenna wo yarɔ nun. A ya wo yogenuna nyamanɛ di wo ma.

¹⁰Wo kɔma, a ya a fɔ wo ye ko wota Mari Alla le ale la. A ko wo kana kilan Amoranuna bɛsɛnu na wo siginɛ kan min kaka. Kɔnɔ Mari ko wo sa ata kumɛnu birala.”

¹¹Abiyɛsa kebila-mɔgɛ do ye Ɔfara soe burɔ. Wo tɔgɛ Yohasi. Wola den Kidiyɔn ye ala fui-fan tɛnna kan-tina-dogonnɛ do rɔ, anu si nɔnbɔ-gbɔɛnu burun kan min. A dogonnɛ nyɔ alako Midiyan kɛnu kana na a yen. Mari tara Ɔfara soe burɔ melikala muninyɛ rɔ ka a mayigi Yohasi wola kɔlɔma-kuri-latankanɛ do kɔrɔ.

¹²Melika wo ya a nyɛrɛ yira ale Kidiyɔn la. A ko, “Sɛnbɛ-tigi anubɛ kerinte le ile la. Nde, Mari ye i fɛ.”

¹³Kidiyɔn ya a fɔ a ye ko, “Kɔnɔ n fa, ni Mari ye ma fɛ, nfen ya a to, tɔrɔyɛ kɛnu bi sigila ma la? N bi n mirila kabana-koenu ma Mari ya minnu ma iko ma benbanu bi anu takaranna ma ye nya min nun. Mari le ma na anu na ka bɔ Iyipiti nyamanɛ rɔ, wa? A manɛ iko a ara ma boloka ka ma don Midiyan kɛnu bolo.”

¹⁴Mari ya a yabi ko, “Ta i sɛnbɛ damasi la ka Isirɛla mɔgɛnu kunka Midiyan kɛnu bolo. N nyɛrɛ le ye i latala.”

¹⁵Kɔnɔ Kidiyɔn ko, “Mari, nde si ke wo mala kama? Kebila-fankabɔnɛ le male la Manasa bɔnsɔn rɔ, ado, n fa warɛ bɔn la, a dɔgɔmɛ le nde la nyɔ.”

¹⁶Mari ya a fɔ Kidiyɔn ye ko, “I si a nɔ le bawo nde, Mari le ye i dɛnbɛna. I si Midiyan kɛnu tatɛn iko mɔgɔ kelan tenbi i kɔrɔ.”

¹⁷Kidiyɔn ya a fɔ a ye ko, “Ni n bara-koe ara i hɛnɛ, i ni tamasere do yira n na ko Mari le ile la.

¹⁸Nba, n makɔni yan alako n ni ta i fandɛ bi.” Mari ko, “N si i makɔni ha i ni na.”

¹⁹Kidiyɔn burimatoe tara bɔn la. A ya baa-den kelen faga ka a lakaliya wo tela. A ya dɛgɛ-munku-gbɛngbɛnnɛ pani-kunbɛ-nya tan bi ka wo ma biredi-dɛnfɛnɛ la. A ya kɛkɛ-tenɛ wo sa sende rɔ ka manfen-yi wo to dagɛ rɔ. A tara wonu to Mari ma kɔlɔma-kuri wo kɔrɔ.

²⁰Mari ya a fɔ a ye ko, “Soge wonubɛ biredi wo sigi farɛ kɛ kuma. I ni manfen-yi wo kɛ a ma.” Kidiyɔn ya a ma iko Mari ya a fɔ a ye nya min.

²¹Mari ya ala sewuri tugu soge wonubɛ biredi wo la. Tɛ bɔra farɛ wo rɔ ka biredi anubɛ soge wo mintan gburr! Wo kɔma, Mari tununta a ma yen!

²²Kidiyɔn nyɛrɛ ya a lɔn wo le fɛ serr, ko a ara Mari le yen wo la. A kilanta dɔgɔma-ma-de! A ya Mari madiya, a ko, “E, n Tigi Mari Alla, n bara ile nyɛrɛ le yen melikala muninyɛ rɔ n yɛ kɛ la serr!”

²³Mari ya a fɔ a ye ko, “I yisi ni kimɛ. Hali i ma kilan. Ko-wo-ko ti ma i la.”

²⁴Kidiyɔn ya saraka-bɔ-tinɛ sɔ Mari ye. A ya a tɔgɔ sa “Yisi-kimɛ le Mari la.” (Ha bi,[10] saraka-mintan-tinɛ wo ye Abiyɛsa bɔnsɔnnu bolo Ɔfara soe burɔ.)

²⁵Suyi wo nyɛrɛ rɔ, Mari ya a fɔ Kidiyɔn ye ko, “Ta i fala san-wɔrɔnfila-turɛ bi. I ni ta a la i fala bɛsɛnu dafɛ. Wo kɔma, i fa ya bɛsi-kɔ-tinɛ min sɔ Beyali ye, i ni wo tinya. Ala kɔlɔma malɛsɛnɛ min tɔgɛ Asura,[11] i ni ta wo fanan tatɛgɛtɛgɛ.

²⁶I ni saraka-mintan-tina-hakikɛ ladan saraka-mintan-tina-kɔrɛ wo kuma nde, Mari Alla ye ka i fala turɛ wo mintan nyɔ kuma. I ni Asura kɔlɔma kundi-kundi wonu bi ka wonu ma sarakɛ wo mintan fan la.”

²⁷Kidiyɔn ya ala wɔli-kɛlɛ mɔgɔ tan bi ka a ma iko Mari ya a fɔ a ye nya min. Kɔnɔ Kidiyɔn ya wo bɛɛ ma suyi le tɔ bawo a kilannɛ ala mɔgɛnu anubɛ so-burɔ-mɔgɛnu na.

²⁸Mɔgɛnu ya anu nasɔ min kɛ sɔgɔma subaga, anu ya anuna bɛsi-kɔ-tinɛ tinyanɛ yen. Anu ya tura-mintan-gbɛ taran saraka-mintan-tinɛ wo kuma.

²⁹Anu ya nyinikalɛ kɛ ko, “Yon gba ye kɛ la?” Anu ya a gbɛngbɛn furr, ha anu nara to a lɔnna ko Yowasila den Kidiyɔn, wo le gba ye wo la.

³⁰Anu ya a fɔ Yowasi ye ko, “Ta ila dan bi. I ni na a la ma kurun tɔ. Ma ni a faga bawo a ara mala bɛsi Beyali wo kɔ tinɛ tinya ka mala kɔlɔma-malɛsɛni-bɛsi Asura ratɛgɛtɛgɛ.”

³¹Kɔnɔ Yowasi ya a fɔ anu ye ko, “A sɔgɛ ye wo la wo ni Beyalita kɛlɛ kɛ, ado mɔgɔ-wo-mɔgɔ ya a fasaya Beyali-koe kɛ la yanni sɔgɔma, wo tigi si faga. Ni Alla-bɛrɛbɛrɛ le Beyali kɛ la, ni min ya ata saraka-bɔ-tinɛ tinya, ale ni a tayili sara wo tigi la.”

³²Bawo Yowasi ara a fɔ ko Beyali ni a tayili sara, woletɔ mɔgɛnu donta Kidiyɔn kele rɔ ko “Yɛruba-Beyali.”[12]

³³A ma mɛ wo kɔma, Midiyan kɛnuta kɛlɛ-dannu anubɛ Amalɛkinuna kɛlɛ-dannu anubɛ sibolo-gbɛrɛ minnu bi tele-bɔɛ wara la nun, wonu ya anu kundɛn ka Yorodan bɛ tɛgɛ. Anu ya anu daga makɛ Yɛsɛreli lɛɛ rɔ.

³⁴Marita sɛnbɛ yigira Kidiyɔn kuma. A ya kɛlɛ-buri fɛ alako Abiyɛsa kegeya-mɔgɛnu ni ta a fɛ kɛlɛ rɔ.

³⁵A ya kilayɛnu nata Manasa bɔnsɔn damasi ma nyamanɛ wo rɔ ka anu kele alako anu ni na a dɛnbɛn kɛlɛ la. A ya kilayɛnu nata Asɛra bɔnsɔn anubɛ Sɛbulɔn bɔnsɔn anubɛ Nafatali bɔnsɔn ma. Wonu fanan nara a dɛnbɛn tinɛ kɛlɛ rɔ.

³⁶Kidiyɔn ya a fɔ Alla ye ko, “I wara a fɔ n ye nun ko i ye n natala Isirɛla mɔgɛnu nakisi tinɛ. N si wo mafɛlɛn ni tonyɛ le wo la.

³⁷Nba, n bi tala saga-siyi do sala gbere-kole ma. Bandɛ wa ka, n ni ta saga-siyi wo mafɛlɛn. Ni n ya duri taran a ma kɔnɔ a fɛlɛ magbalanɛ, n bara a lɔn wo rɔ ko n si ma Isirɛla mɔgɛnuna kisilɛ la.”

³⁸Kidiyɔn tara wo wulɔn-sɔgɔma-subaga, a ya saga-siyi wo raburun. Yi min bɔra wo rɔ, wo ya miran do lafa tɛf, kɔnɔ a fɛlɛ magbalanɛ wuyen!

³⁹Kidiyɔn ya a fɔ Alla ye tun ko, “I yandi, i fonde kana bɔ n kuma. I ni i munyu n kɔrɔ. A ma, n ni a mafɛlɛn tun iko kelen. Ni tonyɛ le Isirɛla mɔgɛnu kunka-koe la n bolo, a ma, n ni saga-siyi-gbalanɛ taran, a fɛlɛ kimanɛ.”

⁴⁰Banda kanɛ, a ya a taran iko a ya Alla manyinika nya min. Saga-siyi wo gbalanɛ kɔnɔ a fɛlɛ kimanɛ duri la yɔdɔ!