Read Kuranko Kɛlɛ-Kurugbɛnu 7 Bible Online

Kɛlɛ-Kurugbɛnu 7 - Kuranko bible

Kɛlɛ-Kurugbɛnu 7

¹Wo wulun sɔgɔma, anu bi Kidiyɔn min kelela Yɛruba-Beyali, wonubɛ ala kɛlɛ-dannu tara anu daga makɛ Harodi tenke dafɛ. Kɔnɔ Midiyan kɛnuna kɛlɛ-dannu tara anu daga makɛ anu denu ma kantɔ lɛɛ do rɔ min bi More kɔnkɛ dafɛ.

²Mari ya a fɔ Kidiyɔn ye ko, “Bawo ila kɛlɛ-dannu siya, n ti a ma, anu ni Midiyan kɛnu nɔ. Ni anu ya Midiyan kɛnu nɔ, anu bi anu mirila anuna siyayɛ le ma. Nde, Mari ti gbiliyɛ sɔrɔn worɔ.

³ A fɔ ila kɛlɛ-dannu ye ko ni minnu kilandɔgɔ anu tɛma, wonu ni sɛgi anu kɔma. Kɔnɔ minnu ti kilan, wonu ni to sigini Kaliyadi kɔnkɛ dafɛ yan.” Mɔgɔ waga mogan-ni-fila (22,000) tɛgɛra anu na purunsan! Wonu sɛgira anu kɔma. Fɔ mɔgɔ waga tan (10,000) pe, wo le tora nyɔ.

⁴Mari ya a fɔ Kidiyɔn ye tun ko, “Hali wo, ila kɛlɛ-dannu siya fɔlɔn. Anu bi, i ni yigi anu na yi-worɔn la. N si anu yabɔ nyɔ. Ni n ya a fɔ minnu ma ko anu bi tala le, i ni wonu bi. Kɔnɔ ni n ya a fɔ minnu ma ko anu ti ta, i ni wonu nasɛgi.”

⁵Kidiyɔn yigira anu na yi-worɔn la. Mari ya a fɔ Kidiyɔn ye ko, “Ni minnu ya anu nyɛnkin ka anu min anu bolo tɔ, i ni wonu bi. Ni minnu ya anu dɛ burun yi ma iko wuli, i ni wonu nasɛgi.”

⁶Mɔgɔ kɛmɛ sawa (300) pe, wonu denu ya anu min anu bolo tɔ. A toe wonu ya anu dɛ burun yi ma.

⁷Mari ya a fɔ Kidiyɔn ye tun ko, “Wobɛ mɔgɔ kɛmɛ sawɛ minnu ya anu min anu bolo tɔ, wonu denu si Midiyan kɛnu nɔ. I ni a fɔ a toenu ye ko anu ni sɛgi anu kɔma kilɛ la.”

⁸Kidiyɔn ya Isirɛla kɛlɛ-den-toe wonu nasɛgi anu barɛnu tɔ fɔ mɔgɔ kɛmɛ sawa pe (300) wo. Anu ya anuna kɛlɛ-kɛ-buri anubɛ anuna kɛlɛ-kɛ-miran bɛɛ to mɔgɔ kɛmɛ sawɛ wonu bolo. Midiyan kɛ wonu daga makɛnɛ lɛɛ rɔ anu ma dugu la.

⁹Wulɔn suyi rɔ, Mari ya a fɔ Kidiyɔn ye ko, “Wo ni wo lasɔ. Wo ni ta Midiyan kɛnu kɛlɛ anu daga makɛ tinɛ. N si anu don wo bolo tɔ.

¹⁰Kɔnɔ ni sikɛ ye i rɔ, wobɛ ila wɔli-kɛlɛ Pura ni ta ko-lakɔrɔsi kɛ ka wo tole masɔ anu na.

¹¹Wo ni a lɔn anu bi min fɔla. Wo si a ma, wo yisi ra ni gbɛlɛya.” Wo kɔma, Kidiyɔn anubɛ ala wɔli-kɛlɛ wo tara anu tole masɔ anu yogenu na.

¹²Midiyan kɛnu anubɛ Amalɛkinu anubɛ sibolo-gbɛrɛ minnu bi tele-bɔɛ wara la nun, wonu nyɛnsɛnnɛ lɛɛ wo rɔ iko kondɔnnu. Anuna nyomɛnu siya iko ba-kɛnkɛn.

¹³Kidiyɔn kera nyɔ tumɛ min, anu ya a taran, kei do ye ala kiyo rakaranna a ta-nyɔgɛ do ye. Wo ye a fɔla ko, “N kiyora biredi latintannɛ le la bi. A ye yigila kurukurunna dagɛ rɔ. A gbesira fani-bon kelen na. Fani-bɔn wo buira. A radɛnfɛra kɔgbɔ!”

¹⁴A ta-nyɔgɛ wo ko, “Kɛ kɔrɔ-bɛrɛbɛrɛ ye min na, biredi wo, Yohasila den Kidiyɔnta faan le wo la. Alla ara ban male Midiyan kɛlɛ-dan damasi donna Isirɛla mɔgɛnu bolo tɔ.”

¹⁵Kidiyɔn ban kiyo wo kɔrɛ lɔnna, wo diyara a ye. A ya a nyɛnkin ka Mari bato. A sɛgira ala kɛlɛ-dannu bara. A ya a fɔ anu ye ko, “Wo ni wo lasɔ. Mari ara Midiyan kɛnu don ma bolo tɔ bi, yɔ!”

¹⁶Kidiyɔn ya mɔgɔ kɛmɛ sawɛ kɛnu tafara sigi tina sawa la. A ya kala-mɛlannu don anu damasi bolo, bɔnku-dagɛ burunnɛ kala-mɛlan wonu kun na. Wo kɔma, a ya burinu fanan don anu bolo.

¹⁷Kidiyɔn ya a fɔ anu ye ko, “Wo ni wo yɛ bɛn n ma. N ba ke anuna dagɛ wo dala tumɛ min, ni n ya a ma nya min, wole fanan ni a ma wo nya.

¹⁸Mabɛ nna mɔgɔ kɛmɛta buru-kan wa bɔ tumɛ min, wole fanan ni wota burinu fɛ anuna dagɛ wola foolɛ rɔ. Wo ni gbele-gbelen wo nyɔgɔn fɛ ka a fɔ ko, ‘Ma ye kɛlɛ kɛla Mari anubɛ Kidiyɔn ye.’ ”

¹⁹Wo tumɛ anu yogenu ban-san anuna kila-kandannɛnu mayɛlɛmana, Kidiyɔn anubɛ ala kɛlɛ-dan mɔgɔ kɛmɛ kera anu yoge wonuna dagɛ wo dala yanni su-talɛ ni ke. Kidiyɔn anubɛ ata mɔgɔ kɛmɛ ya anuna buri fɛ ka anuna bɔnku-dagɛ wonu tatii.

²⁰Mɔgɔ kɛmɛ filɛ doi, wonu ya a ma wo nya. Anu ya anuna kala-mɛlannu bira anu bolo maran la ka burinu bira anu bolo-nyimɛ la. Anu gbele-gbelenta, anu ko, “Ma ye kɛlɛ kɛla Mari anubɛ Kidiyɔn ye.”

²¹Anu tora sɔni anu gbɛ rɔ dagɛ wola foolɛ rɔ. Anu yogenu burimatoe ye belenna worondola kɔndɔfili bolo.

²²Kidiyɔn anubɛ ala kɛlɛ-dannu bi buru-fɛyɛ wo kun na, Mari ya a ma, anu yoge wonu donta anu nyɔgɔn kɛlɛla. Anu tara anu yogenu gbenna Sɛrɛrati kilɛ la ha Bɛti-Siti soe ma. Anu tara anu dan Abɛli-Mɛhola soe burɔ min bi Tabati soe dafɛ.

²³Kidiyɔn ya kilayɛ lata Nafatali anubɛ Asɛra anubɛ Manasa bɔnsɔn filɛnu ma tun ka anu kele ka na anu dɛnbɛ Midiyan kɛnu sagaranna.

²⁴Kidiyɔn ya kilayɛ lata Ifɛrɛm bɔnsɔn-mɔgɛnu ma minnu siginɛ nyɔ-kɔnkɔ-nyamanɛ rɔ, a ko, “Wo na ma dɛnbɛ ma yogenu kɛlɛla ka kilɛ tɛgɛ anu ma Yorodan bɛ anubɛ yi-mɛsɛnu dafɛ ma yarɔ.” Ifɛrɛm bɔnsɔn-mɔgɛnu ya Yorodan bɛ anubɛ a dafɛ yi-mɛsɛnu bira-a-la ha ka ta ke Bɛti-Bara soe burɔ iko Kidiyɔn ya a sara anu bara nya min.

²⁵Ifɛrɛm bɔnsɔn-mɔgɛnu ya Midiyan kɛnuna nyamani-tigi filɛ bira, Ɔrɛbu anubɛ Sibi. Anu ya Mansa Ɔrɛbu faga farɛ do kɔrɔ. Wo kɔma, anu ya nyɔ kele ko, “Ɔrɛbu farɛ.” Anu ya Mansa Sibi wo faga nɔnbɔ-gbɔ-yi burun tinɛ. Wo kɔma, anu ya nyɔ kele ko, “Sibita nɔnbɔ-gbɔ-yi burun tinɛ.” Anu tara mansa filɛ kɛnu kunyɛnu sigi Kidiyɔn kɔrɔ bɛ-kɔgɔma tele-bɔɛ wara la.