Read Kuranko Lankɛnimayɛ 1 Bible Online

Lankɛnimayɛ 1 - Kuranko bible

Lankɛnimayɛ 1

¹Yisa, Allata-Mɔgɔ-Yabɔnɛ ya koe minnu yira, wonu denu sɛbɛnɛ kitabu kɛ rɔ. Alla le ya wonu di a ma alako koe minnu ti mɛ nala, a ni wonu yira Allata wɔli-kɛlɛnu na, ado Kirasiti[1] ya ala melika sɔ ka ala wɔli-kɛla Yɔni lalɔn-koe wonu na.

²Yɔni ya min bɛɛ rayen, a ya wo bɛɛ fɔ. Yɔnita dantɛgɛlɛ le kɛ la ka a bɛn Allala kumɛ anubɛ Yisa ma, Allata-Mɔgɔ-Yabɔnɛ wo ya tonyɛ min yira a la, kɔni.

³Mɔgɔ-sewanɛ le wo mɔgɛ la min bi kitabu kɛ karanna. Mɔgɔ-sewanɛ le wonu na minnu bi anu tole masɔla wɔlɔyiya-kumɛ kɛnu na anubɛ min sɛbɛnɛ kitabu kɛ rɔ ka wonu bira, ado koe kɛ bɛɛ kɛ-tumɛ ara gbɛrɛn.

⁴ Nde, Yɔni le ye kɛ sɛbɛla ka a lata chɔchi wɔrɔnfilɛnu ma minnu bi Esiya nyamanɛ rɔ. Alla min bi yan kaka, a ye nyɔ kebi fɔlɔ, ado a ye nala le, alamɛ wo ya hinɛ anubɛ yisi-kimɛ di wole chɔchinu ma ka bɔ Allata Ni-wɔrɔnfila[2] rɔ minnu bi ala mansaya-sigi-fan yakɔrɔ.

⁵ Hinɛ anubɛ yisi-kimɛ wonu ni na fanan ka bɔ Yisa, Allata-Mɔgɔ-Yabɔnɛ bolo, dɛnkɛninya-sereyɛ, kɔni, ado a fɔlɔtɛ le Yisa la min nawulita ka bɔ furinu tɛma. A ye kun-tigiyɛ kɛla duninya-mansɛnu kun na fanan. A ara ma keni ka ma hɔrɔya mala hakɛnu ma ala sayɛ fɛ.

⁶ A ya ma ma saraka-masɔlɛnu na alako ma ni ma sibolo kelen na ka wɔlɛ kɛ a Fa Alla ye. Alamɛ gbiliyɛ anubɛ sɛnbɛ dira Yisa, Allata-Mɔgɔ-Yabɔnɛ ma habadan! Amina.

⁷ Wo ni wo yɛ lana! A ye nala banda-finyɛ rɔ! Mɔgɛ bɛɛ si a yen nala hali minnu ya a sɔgɔ tanbɛ la. Duninya-mɔgɛ bɛɛ si di ala ko la, ado a ye mala wo nya na le! Amina.

⁸ Mari Alla min bi yan kaka, a ye nyɔ kebi fɔlɔ, ado a ye nala le, Sɛnbɛ-Bɛɛ-Tigi, kɔni, wo ye a fɔla ko a fɔlɔtɛ anubɛ a laban[3] le ale la.

⁹Yɔni le nde la. Wo na-kelen-nyɔgɛ le nde la. Ka a tɛgɛ Yisa ma, ma bɛɛ kelen tɔrɔyɛ anubɛ Allata mansayɛ rɔ. Ma bɛɛ ye ma munna tɔrɔyɛ wo kɔrɔ ma nyɔgɔn fɛ. Anu ya n nana yi-tɛma-dugi kɛ rɔ min tɔgɔ Patamasi bawo n bara Allala kumɛ fɔ ka Yisa wara-koe gbɛ mɔgɛnu ye.

¹⁰Sulen-Tele ma, Allata Ni-Sɛnimɛ ya n bi ata sɛnbɛ la. N ya kuman-kan-wɛ lamɔɛn. Wo kuli manɛ de iko buru-fɛ-kan. A ye kumala n kɔma kilɛ la.

¹¹A ko, “I ye nala min yenna, i ni wo sɛbɛ. I wa ban wo sɛbɛla, i ni kitabu wo lata chɔchi wɔrɔnfilɛ kɛnu ma, Ɛfɛsa wo, Simirina wo, Pɛragama wo, Tayataira wo, Sadisi wo, Filadɛlifiya anubɛ Leyodisiya.”

¹²N ya n tintan alako min bi kumala n ye, n ni wo yen. N ya sɛnɛ-lɛnpu-sigi-fen wɔrɔnfila yen.

¹³ N ya dali-fan do yen wonu tɛma min manɛ iko hadama-dan. Duruki ye a kan na min yiginɛ fɔɔ a kin-nɔlɔnɛ. Sɛnɛ-butɛ-kiri-fan kirinɛ a kɔgɛ ma.

¹⁴ A kun-sigi-gbɛnɛ iko saga-siyi anubɛ bɛgi-gbɛ. A kolan manɛ iko ta-mɛlan.

¹⁵ A kiannu bi malan-malanna iko sila-laleenɛ min kaganɛ. A kuman-kan manɛ iko wasa-sɛnbɛlamɛ.

¹⁶Lolo wɔrɔnfilɛ biranɛ a bolo-nyimɛ rɔ. Faan-da-filɛ min dɛ ye a la bɛrɛkɛ, wo ye bɔla a da rɔ. A yakɔrɛ ye malanna iko tele tenbi bɔla tele latelan.

¹⁷ N ya a ragbɛ min kɛ, n buira a kin kɔrɔ iko mɔgɔ-faganɛ. A ya a kɔɛn-nyimɛ sa n ma. A ko, “I kana kilan! A fɔlɔtɛ anubɛ a laban le nde la.

¹⁸Nimalamɛ le nde la! N faganɛ le nun kɔnɔ kaka, n bi n niyi la tolon, ado sarati ye n bolo sayɛ anubɛ lakira kuma.

¹⁹Nba, i wara minnu tayen, minnu bi kaka wo, minnu si na kɛ kɔma wo, i ni wo bɛɛ sɛbɛ.

²⁰Lolo wɔrɔnfilɛ minnu bi n bolo-nyimɛ rɔ yan anubɛ sɛnɛ-lɛnpu-sigi-fen wɔrɔnfilɛ kɛnu, wonu gbundu-ko-kɔrɛ le kɛ la. Lolo wɔrɔnfilɛ wo, chɔchi wɔrɔnfilɛta melika-misalɛ le wonu na. Sɛnɛ-lɛnpu-sigi-fen wɔrɔnfilɛ wo, chɔchi wɔrɔnfilɛ misalɛ le wonu na.